Şərqi Avropa İqlim Həftəsinin Bakıda keçirilməsi ilə bağlı müzakirələr aparılır
Bakı, 25 iyun, AZƏRTAC
London İqlim Həftəsi çərçivəsində keçirilən görüşlərdə Şərqi Avropa İqlim Həftəsinin Bakıda təşkili məsələsi müzakirə olunub və tədbirlə bağlı ilkin məsləhətləşmələr aparılıb.
Bu barədə AZƏRTAC-a COP29-un Sədrliyindən bildirilib.
Qeyd olunub ki, müzakirələr zamanı London İqlim Həftəsində iştirakın əsas məqsədlərindən biri Şərqi Avropa İqlim Həftəsinin keçirilməsi ilə bağlı ilkin çağırışların edilməsi, potensial tərəfdaşlarla məsləhətləşmələrin aparılması və proqramın əsas istiqamətlərinin razılaşdırılması olub.
London İqlim Həftəsi çərçivəsində Azərbaycan Prezidentinin iqlim məsələləri üzrə nümayəndəsi Muxtar Babayev ilə Birləşmiş Millətlər Təşkilatının Baş katibi Antonio Quterreş arasında da görüş keçirilib.
Görüş zamanı Baş katib COP29 çərçivəsində əldə olunmuş nəticələri yüksək qiymətləndirərək bu uğurlardan məmnunluğunu ifadə edib.
Antonio Quterreş Azərbaycanın COP29 Sədrliyi dövründə qazandığı təcrübənin gələcək iqlim prosesləri üçün mühüm əhəmiyyət daşıdığını vurğulayıb. O, bu təcrübənin COP31-ə ev sahibliyi edəcək Türkiyə, eləcə də növbəti COP sədrlikləri ilə paylaşılmasının vacibliyini qeyd edib.
Görüşdə Azərbaycanın qlobal iqlim gündəliyində fəal rol oynadığı diqqətə çatdırılıb. Bildirilib ki, ölkə COP29-dan sonra da beynəlxalq iqlim danışıqlarında və çoxtərəfli əməkdaşlıq platformalarında təşəbbüslərlə çıxış edir, iqlim fəaliyyətinin gücləndirilməsinə töhfə verir.
Tərəflər iqlim dəyişikliyi ilə mübarizə, beynəlxalq əməkdaşlığın genişləndirilməsi və COP29-un irsinin gələcək iqlim proseslərinə inteqrasiyası məsələləri ətrafında fikir mübadiləsi aparıblar. Azərbaycanın iqlim diplomatiyasında formalaşdırdığı təcrübənin qlobal səviyyədə faydalı model kimi qiymətləndirildiyi vurğulanıb.
Müxbir - Pərvanə Qafarova
Bölmənin digər xəbərləri
