“UNEC-dən dünyaya” layihəsi davam edir
Bakı, 7 yanvar, AZƏRTAC
“UNEC-dən dünyaya” layihəsi davam edir.
UNEC-dən AZƏRTAC-a bildirilib ki, layihənin budəfəki müsahibi UNEC-in Beynəlxalq İqtisadiyyat Məktəbinin (ISE) mühasibat uçotu və audit ixtisası üzrə tələbəsi Məsmə Abbasovadır. O, UNEC-in Montpellier universiteti ilə ikili diplom proqramı çərçivəsində təhsilini Fransada davam etdirir. Məsmə Abbasovanın ikili diplom proqramına qoşulmağının əsas səbəbi məzun olduqda yalnız UNEC-in deyil, həm də Montpellier Universitetinin bakalavr diplomunu əldə edə bilmək şansıdır. O əmindir ki, gələcəkdə hər iki universitetin qazandırdığı bilik və diplomları ilə uğurlu karyera qura biləcək.
Məsmə Abbasovanın sözlərinə görə, Avropa ilə Azərbaycandakı təhsil sistemi tamamilə fərqlidir. O deyib: “Bu fərq yalnız ali təhsildə deyil, orta məktəb səviyyəsində də hiss olunur. Şagirdlərə araşdırma qabiliyyəti, qrupla işləmək vərdişi məktəb illərindən aşılanır, biz isə bu sistemə yeni keçirik. Həmçinin dərs saatlarının az olması, daha yığcam şəkildə keçirilməsi, imtahanların sayının az olması, tələbənin daha çox araşdırma qabiliyyətinin inkişaf etdirilməsi, qaib sisteminin olmaması fərqli cəhətlər sırasındadır. Lakin deməzdim ki, UNEC-dəki təhsil səviyyəsi buradakından geri qalır. Təhsil aldığım Beynəlxalq İqtisadiyyat Məktəbinin müəllimlərinin böyük əksəriyyəti xaricdə təhsil alıb və dərsləri yüksək səviyyədə tədris edirlər. Bu isə ISE tələbələrinin kifayət qədər savadlı və təcrübəli mütəxəssis kimi yetişmələrinə birbaşa təsir edən amillərdəndir”.
M.Abbasova vurğulayıb ki, UNEC-də ingilis dilində təhsil aldığı üçün Montpellier universitetində çətinlik çəkmir. Xarici tələbələr müxtəlif yaş və millətlərdən olduqlarına görə, ilk vaxtlar onlarla ünsiyyət qurmaq çətin idi, amma qrup işlərində iştirak etdikcə, bu çətinlik tədricən aradan qalxıb. “Fransızların çoxu ingilis dilində danışmağa üstünlük vermədiklərindən, ilk günlərdə bir az çətinlik çəkirdim, çünki şəhəri tam tanımırdım və orada həll etməli olduğum bəzi sənəd işləri var idi. Amma tez bir zamanda yeni mühitə öyrəşdim”, - deyə azərbaycanlı tələbə bildirib.
Fransada tələbənin bir aylıq yaşayış xərclərindən danışan M.Abbasova deyib: “Bu, tələbənin büdcəsini necə bölməsindən və nəyə xərcləməsindən asılı olaraq dəyişir. Aylıq xərc vaxt keçdikcə azalmağa başlayır. Hər ay büdcədən 30-35 avro market alış-verişinə, 10-15 avro nəqliyyata, 162 avro isə yataqxana kirayəsinə ödənilir”.
Azərbaycan haqqında ona verilən sualları dolğun cavablandırmağa və ölkəsini daha yaxşı təmsil etməyə çalışdığını deyən M.Abbasova Montpellierdə təhsil alan UNEC tələbələri arasında münasibətlərin qurulduğunu da bildirib: “Biz 5 nəfər qız eyni yataqxanada qalırıq. Bura gələn ilk gündən bir-birimizə həm dərslərdə, həm də dərsdən kənarda kömək edirik. Keçən il buraya gəlmiş azərbaycanlı tələbələrdən də məlumat alırıq, onlar da öz təcrübələrini bizimlə bölüşürlər”.
M.Abbasovanın sözlərinə görə, Montpellier universitetində imtahan sistemi tamamilə fərqlidir: “İmtahanlarımız oktyabr-noyabr aylarından başlanıb. Burada UNEC-dən fərqli olaraq dərs saatları və keçilən mövzular daha azdır. Hər dərs üçün 15 saat vaxt ayrılır və tez bir zamanda yekunlaşır. İmtahan yazılı olur və tələbələrə suallar əvvəlcədən verilmir. Hər fənn üzrə maksimum 20 bal verilir. Bəzi müəllimlər qiyməti qrup işləri və imtahana əsasən, bəziləri isə yalnız yazılı imtahana əsasən verirlər. Sonuncu imtahanlarımızı da dekabrın ikinci yarısı verdik. Artıq tətil planları qurmağa başlayırıq. Mənim üçün Montpellier çox böyük təcrübə oldu. Burada yeni dostlar tanıdım, əsl tələbəlik həyatı yaşadım. Müxtəlif millətlərin nümayəndəsi olan müəllimlərdən dərs almaq və tələbələrlə eyni qrupda oxumaq imkanını əldə etdim”.
Bölmənin digər xəbərləri
