Bakı, 3 fevral, Leyla Muradzadə, AZƏRTAC

XXI əsr animasiyanın sürətli inkişaf dövrüdür. Cizgi filmləri artıq uşaqlar üçün sadəcə əyləncə deyil, hər yaşda olan insanların qəlbinə toxuna bilən yüksək bədii əsərlərə çevrilib. Animasiya filmlərinin ssenaristi, rejissoru Seyla Əliyeva filmləri, Azərbaycan animasiyası və gələcək layihələr barədə AZƏRTAC-ın müxbirinə danışıb.

Seyla Əliyeva 1986-cı il dekabrın 29-da Almaniyanın Maqdeburq şəhərində dünyaya gəlib. 2009-cu ildə Azərbaycan Dillər Universitetinin İngilis dili fakültəsini bitirib. Əmək fəaliyyətinə 2007-ci ildən başlayıb, əsasən satış və marketinq sahəsində çalışıb.

O, 2020-ci ildə yutubda “KooklaTV” kanalını yaradıb. Bu kanal sayəsində minlərlə uşaq doğma Azərbaycan dilində danışmağı öyrənib. Kanalın animasiya filmləri 2022 və 2023-cü illərdə “ANIMAFILM” Beynəlxalq Animasiya Festivalının müsabiqə proqramına daxil edilib. Seyla xanım 2023-cü ildən Azərbaycan Animasiya Assosiasiyasının üzvüdür.

- Seyla xanım, animasiyaya necə gəldiyinizdən danışın. Sizi bu sahəyə nə cəlb edib?

Uşaqlıqdan bu günə qədər cizgi filmlərini seyr etməyi xoşlayıram. Onlar mənim üçün rəngarəng və xeyirxah dünyadır. Erkən uşaqlıqdan mən rəsm çəkmişəm, hekayələr yazmışam, lakin bununla peşəkar səviyyədə məşğul olmaq barədə heç düşünməmişəm.

Oğlum gec danışırdı. Hər şey də bundan başladı. Məlum olduğu kimi, buna ingilis dilində olan animasiya filmləri güclü təsir edir. Oğlum xarici ölkələrin istehsalı olan cizgi filmlərinin çoxjanrlılığını çox xoşlayırdı, təəssüflər olsun ki, onları doğma dilimizdə tapa bilmirdi. Pediatr bunu uşağın cizgi filmlərinə bir dildə baxdığı, evdə isə doğma dildə ünsiyyət qurduğu ilə izah edib.

Biz bu yola 2020-ci ildə, COVID-19 pandemiyası zamanı qədəm qoyduq. Həmin vaxt oğlumuzu loqopedin qəbuluna apara bilmirdik, ona görə də uşağa yerli cizgi filmləri vasitəsilə Azərbaycan dilini öyrətmək qərarına gəldik. Beləliklə, həyat yoldaşım ilə birlikdə animasiya filmləri yaratmağa başladıq. İlk öncə, biz bütün filmləri yaddaş kartına yükləyirdik, televizora qoşurduq, bununla da oğlumuzun diqqətini cəlb edirdik və onda maraq yarada bildik. Dərhal fikirləşdik; bəlkə yutubda bir kanal yaradaq?. Beləliklə, “Kookla TV” kanalımız yarandı.

Yutub kanalımızda yüz əllidən çox cizgi filmi təqdim olunub, abunəçilərin sayı 130 mini ötüb. “Kookla TV” videosu 50 milyondan çox baxış toplayıb. Qeyd etmək istəyirəm ki, biz buna hər hansı bir reklamdan istifadə etmədən nail olmuşuq. Kanalımız, həmçinin yutubun “Gümüş düymə” mükafatına (100 min abunəçi toplayan kanallara verilir - red.) layiq görülüb. Bundan başqa, kanalın sosial şəbəkələrdə səhifələri və “kookla.tv” saytı var.

- Bu yolda hansı çətinliklərlə üzləşmisiniz?

- Düzünü desəm, ən çətini münasib qiymətə yaxşı animator tapmaq idi. Bu sahədə yaxşı və əlçatan kadrlar çox azdır. Azərbaycanda 3D animasiyanın qiymətləri çox yüksəkdir, buna görə də imkanımız yalnız 2D animasiyaya çatır. Bu, bazarda həmin profildə kifayət qədər mütəxəssisin olmaması ilə bağlıdır.

Həmçinin qeyd etmək istəyirəm ki, yerli cizgi filmləri də çox azdır. Hesab edirəm ki, bu sahə sadəcə olaraq azgəlirli olduğu üçün inkişaf etmir. Lakin, onun vacibliyini dərk etməliyik. Axı uşaqlar bizim gələcəyimizdir. Xarici cizgi filmlərinə orijinal versiyada baxsalar, onlar üçün ana dilində danışmaq çətin olacaq və nəticədə, Azərbaycan dilinin tamamilə unudulmasına gətirib çıxara bilər.

Buna baxmayaraq, bu sahəni canlandırmağa çalışan Mədəniyyət Nazirliyinin səylərini xüsusi qeyd etmək istəyirəm. Mən buna yüksək qiymət verirəm. Əminəm ki, 5 ildən sonra Azərbaycanda animasiya yüksək səviyyəyə çatacaq.

- Kanalınız autizm sindromu olan uşaqlar üçün də nəzərdə tutulub…

- Bəli, sevgi ilə dolu olan bu uşaqlara loqopedlər yalnız bir dil öyrənməyi tövsiyə edirlər. Çünki autizm sindromu olan uşaqların təlimi üçün keyfiyyətli kanallarımız yox idi, valideynlər çətinlik çəkirdilər. Kanalı yaradarkən, valideynlərdən bu qədər müsbət rəy alacağımızı gözləmirdik. Demək olar ki, onlar şərhlər yazır, hər bir paylaşımın altında minnətdarlıq ifadə edirlər. Onların rəylərini oxuyarkən, bir daha əmin oluruq ki, düzgün yol seçmişik. Düşünürəm ki, hər birimiz qeyri-adi uşaqlara kömək etməliyik, onlara faydalı olmalıyıq.

- Filmlər üçün mövzu və süjetlər necə yaranır?

- Animasiya filmlərimiz milli nağıllar və uşaq mahnılarının motivləri əsasında yaradılır. Biz onları yeni formatda təqdim edirik. Kanalımız üçün animasiyaları Türkiyədə yaşayan həmvətənimiz yaradır. Animasiyaların əksəriyyəti təlim xarakteri daşıyır. Ssenarilərimdə, eləcə də hekayələrimdə heyvanlara sevgidən və təbiətə qayğıdan, gündəlik həyatda uşaqlar üçün təhlükəsizlik qaydalarından və s. bəhs olunur. Biz çox vaxt instaqram və yutub səhifələrimizdə sorğular aparırıq, uşaqları hansı mövzuların narahat etdiyini öyrənirik. Sorğu əsasında cizgi filmi yaradırıq. Bu, zərif və məsuliyyətli işdir, çünki biz uşaqlara erkən yaşından təlim keçirik və dürüst, yaxşı insan yetişdirməyə çalışırıq, axı onlar xalqımızın gələcəyidir.

Biz xaricdə olan həmvətənlərimizdən də məktublar alırıq. Onlar uşaqlarının ana dilində cizgi filmləri seyr etmək imkanına malik olduğuna görə bizə təşəkkür edirlər. Beləliklə, azyaşlılar milli dəyərlərimiz haqqında daha çox məlumat əldə edəcəklər.

- Yaradıcılıqda qarşınıza qoyduğunuz bütün məqsədlərə çata bildinizmi?

- Əlbəttə ki, xeyr. Biz hələ yolun tam başlanğıcındayıq. Hazırda dostluq haqqında cizgi serialının üzərində işləyirik. O, cari ilin mart ayında yayımlanacaq. Düşünürəm ki, bu il kanala daha çox insan maraq göstərəcək və fəaliyyətimiz genişlənəcək.