Vaşinqton, 6 aprel (AZƏRTAC) Vaşinqtonun aparıcı araşdırma mərkəzlərindən biri olan Ceymstaun Fondu aprelin 5-də BMT Təhlükəsizlik Şurasında Ermənistan-Azərbaycan, Dağlıq Qarabağ münaqişəsi ilə bağlı ilk qətnamənin qəbul edilməsinin 20-ci ildönümü ilə əlaqədar “Birləşmiş Millətlər Təşkilatı və Ermənistan-Azərbaycan münaqişəsi: Əsaslara baxış” adlı tədbir təşkil etmişdir.

Mərkəzi Asiya-Qafqaz İnstitutunun sədri Frederik Starın moderatorluq etdiyi tədbirdə Azərbaycanın BMT-dəki daimi nümayəndəsinin müavini Tofiq Musayev, Heritage Fondunun baş elmi işçisi Ariel Koen məruzə ilə çıxış etmişlər. “BMT-nin Təhlükəsizlik Şurasının qətnamələrinin hüquqi əhəmiyyəti” mövzusunda çıxış etmiş Tofiq Musayev beynəlxalq sülh və təhlükəsizliyin qorunub saxlanılması baxımından beynəlxalq hüququn norma və prinsiplərinə riayət olunmasının vacibliyindən danışmışdır. T.Musayev BMT Təhlükəsizlik Şurasının Ermənistanın işğalçı qoşunlarının Azərbaycan ərazilərindən çıxarılmasını tələb edən dörd qətnamənin icra edilmədən qalmasının hazırkı mərhələdə münaqişənin həllində irəliləyişə mane olan əsas amil kimi dəyərləndirmiş və Ermənistanın danışıqlarda tutduğu qeyri-konstruktiv mövqeyin heç bir beynəlxalq hüquqi əsasa malik olmadığını bildirmişdir. “Heritage” fondunun baş elmi işçisi Ariel Koen çıxışında münaqişənin həllini beynəlxalq güclərin mövqeyi, eləcə də regional reallıqlar kontekstində təhlil edərək, Minsk qrupunun həmsədrlərindən biri olan ABŞ-ın bu istiqamətdə səylərinin artırmasına ehtiyac olduğunu qeyd etmişdir.

Öz növbəsində, Mərkəzi Asiya-Qafqaz İnstitutunun sədri Frederik Star Cənubi Qafqaz regionunda sabitliyin bərqərar edilməsi naminə yeni yanaşmaların zəruri olduğunu vurğulamış və bölgənin gələcəyinin hər üç region ölkənin qarşılıqlı əməkdaşlığından asılı olduğunu bildirmişdir.

Xatırladaq ki, Kəlbəcər rayonu 1993-cü il aprelin 2-də işğal olunduqdan sonra, BMT Təhlükəsizlik Şurası aprelin 30-da Ermənistan-Azərbaycan, Dağlıq Qarabağ münaqişəsi ilə bağlı 822 nömrəli qətnamə qəbul edərək, işğalçı erməni qoşunlarının Azərbaycan torpaqlarından dərhal və şərtsiz çıxarılmasını tələb etmişdir.

Yusif Babanlı

AZƏRTAC

Vaşinqton