VƏTƏNDAŞLARDAN NARKOTİK VASİTƏLƏR GÖTÜRÜLMÜŞ VƏ ÇƏTƏNƏ KOLLARI MƏHV EDİLMİŞDİR
Daxili İşlər Nazirliyinin mətbuat xidmətindən AZƏRTAC-a bildirmişlər ki, həyata keçirilmiş əməliyyat tədbirləri nəticəsində Bakı Baş Polis İdarəsi Narkotiklərlə Mübarizə İdarəsinin əməkdaşları Bakı şəhər sakini, əvvəllər məhkum olunmuş Zaur Tağıyevdən 1,776 qram, Sabunçu Rayon Polis İdarəsinin 12-ci bölməsinin əməkdaşları isə Bakı şəhər sakini Ruslan Kazımovdan 0,602 qram heroin götürmüşlər.
Şamaxı Rayon Polis Şöbəsinin əməkdaşları Şəhriyar qəsəbə sakini, əvvəllər məhkum olunmuş Nizami Kərimovdan 132,4 qram, Sabirabad Rayon Polis Şöbəsinin əməkdaşlarının keçirdikləri əməliyyat tədbirləri nəticəsində isə Ətcələr kənd sakini, əvvəllər məhkum olunmuş Abdulla Bayramovdan 38 qram marixuana, həyətyanı sahəsindən isə kultivasiya yolu ilə yetişdirilmiş, çəkisi 252 qram olan 3 ədəd çətənə kolu aşkar edilərək götürülmüşdür. Oğuz Rayon Polis Şöbəsinin əməkdaşlarının keçirdikləri əməliyyat tədbirləri nəticəsində Xaçmaz kənd sakini Tərlan Qədirovdan 25 qram marixuana, həyətyanı sahəsindən isə kultivasiya yolu ilə yetişdirilmiş, çəkisi 150 qram olan 14 ədəd çətənə kolu aşkar edilərək götürülmüşdür.
Z.Bünyadov prospektində Ucar rayon sakini Əlvan Nəbiyevin mobil telefonunu oğurlamış Bakı şəhər sakini Aynur Paşayev Nərimanov Rayon Polis İdarəsinin 17-ci bölməsinin əməkdaşlarının keçirdikləri əməliyyat tədbirləri nəticəsində tutulmuş, ondan 0,226 qram heroin müsadirə edilmişdir.
Faktlarla bağlı araşdırmalar aparılır.
Bölmənin digər xəbərləri
