XALQ ARTİSTİ RAMİZ QULİYEVİN İRANA QASTROL SƏFƏRİ BAŞA ÇATMIŞDIR
O, AZƏRTAC-ın müxbirinə demişdir ki, İran Beynəlxalq Musiqi Assosiasiyasının dəvəti ilə bir aya yaxın davam edən qastrol səfərində Təbriz, Kirmanşah və Tehran şəhərlərinin hər birində yüksək səviyyədə təşkil olunmuş üç konsertin biletləri hələ səfərimizdən əvvəl satılmışdı. Dahi Üzeyir Hacıbəyovun əzəmətli musiqisi ilə başlanan konsert tamaşaçılar tərəfindən yüksək qarşılanmışdır. İranın məşhur bəstəkarı və tarzəni Keyvan Faket ilə konsertin birinci hissəsində bərabər çıxışımız da maraq doğurdu.
Ən möhtəşəm sənət ocaqlarında, musiqi salonlarında Azərbaycanın incəsənət xadimlərinin çıxışlarına ictimaiyyət və dövlət nümayəndələri, rəsmi şəxslər çox böyük maraq göstərirdilər.
Konsertlərdən sonra bir çox tanınmış musiqiçi, şair və yazıçılarla görüşlərimiz oldu. Həmçinin Əfzələddin Xəqaninin, Qətran Təbrizinin və ustad Şəhriyarın məzarlarını ziyarət etdik.
Bölmənin digər xəbərləri
