XARİCİ İŞLƏR NAZİRLİYİNİN MƏTBUAT MƏRKƏZİ XƏBƏR VERİR
İyulun 25-də Azərbaycan Respublikasının xarici işlər naziri Vilayət Quliyev ölkəmizdə səfərdə olan YUNESKO-nun qeyri-maddi mədəni irs şöbəsinin direktoru xanım Noriko Aikavanı qəbul etmişdir.
Vilayət Quliyev qonağı səmimi salamlayaraq, ölkəmizin YUNESKO ilə əməkdaşlığa böyük əhəmiyyət verdiyini vurğulamış və Azərbaycanın qeyri -maddi mədəni irsinə göstərilən qayğıya görə qonağa təşəkkürünü bildirmişdir.
Xanım N.Aikava səfərinin məqsədini açıqlayaraq, “Bəşəriyyətin şifahi və qeyri-maddi mədəni irsinin şah əsərlərinin elan olunması” proqramına təqdim olunmaq üçün Azərbaycan muğamı barədə məlumat toplusunun hazırlanmasına və xanəndə Alim Qasımovun “Muğam mərkəzi”nin yaradılmasına yardım göstərəcəklərini bildirmişdir.
Tərəflər həmçinin YUNESKO ilə Azərbaycan arasında əməkdaşlığın genişləndirilməsi və qarşılıqlı surətdə faydalı əlaqələrin inkişaf etdirilməsi üçün birgə səylər göstərməyə hazır olduqlarını vurğulamışlar.
Görüşdə YUNESKO üzrə Azərbaycan Milli Komissiyasının Katibliyinin baş katibi, xüsusi tapşırıqlar üzrə səfir Ramiz Abutalıbov iştirak etmişdir.
Bölmənin digər xəbərləri
