Pekin, 26 fevral, AZƏRTAC

Xocalı soyqırımı barədə həqiqətlərin Koreya Respublikasının ictimaiyyəti və siyasi dairələrinin diqqətinə çatdırılması məqsədilə Azərbaycanın Seuldakı səfirliyi və Azərbaycan diasporu geniş səpkili məlumatlandırma kampaniyası həyata keçirib.

Səfirlikdən AZƏRTAC-a bildiriblər ki, kampaniya çərçivəsində Xocalı soyqırımının tanınması və onu törədənlərin cəzalandırılması istiqamətində səylərin artırılması barədə Koreya Respublikası parlamentinin rəhbərliyinə və bütün deputatlara müraciətlər ünvanlanıb, həmçinin parlamentin rəsmi internet səhifəsində müvafiq petisiya kampaniyasına başlanılıb. Parlament üzvlərinə göndərilən müraciətlərdə və petisiyada Xocalı soyqırımının tanıdılmasında məqsədin intiqam alınması deyil, heç bir günahı olmayan, yalnız etnik mənsubiyyətinə görə mülki şəxslərə qarşı törədilmiş sözügedən cinayət üzrə ədalətin yerini tapmasının vacibliyi vurğulanıb.

Bundan başqa, Xocalı soyqırımının 30-cu ildönümü ilə əlaqədar ingilis və Koreya dillərində geniş xəbər bülletenləri və bəyanatlar hazırlanaraq, Koreya Respublikasının rəsmi qurumlarına, kütləvi informasiya vasitələrinə, ictimai-siyasi təşkilatlara və akademik dairələrə göndərilib. Bu məlumatlar əsasında yerli kütləvi informasiya vasitələrində, o cümlədən “Naewoeilbo” gündəlik qəzetində və “Korea Post” media orqanında müvafiq məqalələr dərc olunub. Məqalələrdə Xocalı soyqırımının tarixçəsi, ermənilərin törətdikləri vəhşiliklər, eləcə də bu dəhşətli soyqırımının dünya səviyyəsində tanındığı barədə geniş məlumatlar əksini tapıb.

Koreya Respublikası Prezidenti Administrasiyasının rəsmi internet səhifəsində “Xocalı soyqırımının 30-cu ildönümü ərəfəsində səsimizi eşidin!” başlıqlı petisiyanın (https://www1.president.go.kr/petitions/Temp/aeqN4v) yerləşdirilməsi təmin edilib.

Kampaniya çərçivəsində Qəbələ şəhəri ilə qardaşlaşmış Koreyanın Qyeonqcu şəhəri və Bakının Qaradağ rayonu ilə qardaşlaşmış paytaxt Seulun Yonqsan rayonunun mərkəzi küçələrində Heydər Əliyev Fondunun dəstəyi ilə 200-ə yaxın “Xocalıya ədalət” banerləri asılıb. Banerlərdə səfirliyin dəstəyi ilə BUTA Azərbaycan-Koreya Dostluq Assosiasiyası tərəfindən Koreya dilində yaradılmış Xocalı soyqırımına dair internet səhifəsi (www.khojaly.or.kr) və “Xocalıya ədalət!” beynəlxalq kampaniyasının internet səhifəsi (www.justiceforkhojaly.org) əks olunub. Bundan başqa, Heydər Əliyev Fondunun dəstəyi ilə paytaxt Seulun mərkəzində və məşhur Qanqnam rayonunun əsas küçələrində iri elektron monitorlarda 2 gün ərzində “Xocalıya ədalət!” banerləri nümayiş olunub.

Xocalı həqiqətlərinin ictimaiyyətin diqqətinə çatdırılması istiqamətində səfirliyin təşkilatçılığı ilə Xocalı soyqırımının 30-cu ildönümünə həsr olunmuş vebinar keçirilib. Tədbirdə Seuldakı diplomatik korpus təmsilçiləri, akademik və ictimai dairələrinin nümayəndələri, eləcə də bu ölkədə yaşayan azərbaycanlılar iştirak ediblər. Səfir Rəmzi Teymurov Xocalı soyqırımı barədə təqdimat edərək, 1992-ci il fevralın 25-dən 26-na keçən gecə erməni silahlı qüvvələrinin 613 azərbaycanlını, o cümlədən azyaşlı uşaq, qadın və yaşlı insanların işgəncələrə məruz qalaraq vəhşicəsinə öldürüldüyünü bildirib, Ermənistan hakimiyyətinin törətdiyi bu kimi cinayətlərə hüquqi qiymət verilməsinin vacibliyini diqqətə çatdırıb. Türkiyənin Cənubi Koreyadakı səfiri Ersin Erçin və Koreyanın Kaçon Universitetinin professoru Yun Minu çıxış edərək, 30 il bundan əvvəl Xocalıda törədilmiş soyqırımı aktının Koreya ictimaiyyəti tərəfindən bilinməsi, insanlığa qarşı yönələn bu cinayət əməlinin beynəlxalq miqyasda pislənilməsinin vacibliyini vurğulayıb, Xocalı soyqırımının beynəlxalq hüquqi aspektləri barədə məlumat veriblər. Tədbir zamanı Xocalı soyqırımına dair video-material Koreya dilində subtitrlər ilə nümayiş etdirilib.

Kampaniya çərçivəsində, həmçinin paytaxt Seulda yerləşən məsciddə Xocalı soyqırımı qurbanlarının əziz xatirələri yad edilib, dualar oxunub.

Şahin Cəfərov

AZƏRTAC-ın xüsusi müxbiri

Pekin