Yaponiyanın Baş Naziri İran liderləri ilə görüşə hazırlaşır
Tokio, 28 may, AZƏRTAC
Yaponiya hökumətinin rəsmi nümayəndələri Baş Nazir Şinzo Abenin İran liderləri ilə görüşmək üçün gələn ay bu ölkəyə planlaşdırılan səfərinin hazırlıq işlərini yekunlaşdırmaq üzrədirlər.
AZƏRTAC Yaponiya KİV-lərinə istinadla xəbər verir ki, ABŞ Prezidenti Donald Tramp ilə Tokioda keçirilən görüş zamanı Ş.Abe ABŞ ilə İran arasında vasitəçi kimi çıxış etmək niyyətini bir daha təsdiq edib.
Xatırladaq ki, ABŞ administrasiyası İran tərəfindən artan təhlükəni əsas gətirərək aviadaşıyıcı gəminin rəhbərliyi ilə zərbə qrupunu və bombardmançı təyyarələri Yaxın Şərqə göndərib. Bu hərəkət iki ölkə arasında vəziyyəti xeyli gərginləşdirib.
Bildirilir ki, Prezident Donald Tramp Şinzo Abenin təklifi ilə razılaşıb və səfərin tezliklə baş tutacağına ümidvar olduğunu deyib.
Yaponiyanın rəsmi nümayəndələri bundan sonra Ş.Abenin İranın ali rəhbəri Ayətullah Əli Xameneyi və Prezident Həsən Ruhani ilə iyunun ortalarına planlaşdırılan görüşünün yekun hazırlıqlarına başlayıblar.
Qeyd edək ki, Yaponiya hökuməti İran ilə xoş münasibətlər saxlayır. İki ölkə arasında əlaqələrə xüsusi diqqət yetirən Şinzo Abe Prezident Həsən Ruhani ilə müntəzəm olaraq Nyu-Yorkda BMT Baş Məclisində görüşür.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
