Bakı, 25 dekabr, AZƏRTAC

Prezident İlham Əliyevin 2018-ci il 27 dekabr tarixli Sərəncamı ilə təsdiq edilmiş “Azərbaycan Respublikasında yol hərəkətinin təhlükəsizliyinə dair 2019–2023-cü illər üçün Dövlət Proqramı”nın müzakirəsi və ekoloji təmiz nəqliyyat vasitələrinin təşviqinə dair dekabrın 25-də ictimai müzakirə keçirilib.

AZƏRTAC xəbər verir ki, tədbirdə çıxış edən yol hərəkəti üzrə ekspert, “Avtosfer.az” saytının rəhbəri Elməddin Muradlı tədbirin məqsədinin ötən müddət ərzində “Azərbaycan Respublikasında yol hərəkətinin təhlükəsizliyinə dair 2019-2023-cü illər üçün Dövlət Proqramı”ndan irəli gələn tələblərin yerinə yetirilməsi istiqamətində görülən işlərin, eləcə də ekoloji təmiz nəqliyyat vasitələrinin - hibrid və elektromobillərin ölkəmizə gətirilməsi, bu istiqamətdə stimullaşdırıcı addımların atılması və güzəştlərin müzakirəsi olduğunu bildirib.

Baş Dövlət Yol Polis İdarəsinin şöbə rəisi, polis polkovniki Kamran Əliyev qeyd edib ki, Dövlət Proqramı əsas beş istiqamət üzrə müəyyənləşdirilib. Bunlar yol hərəkətinin təhlükəsizliyi sahəsində idarəetmə, təhlükəsiz yollar və yol hərəkətinin təşkili, təhlükəsiz nəqliyyat vasitələri, təhlükəsiz yol hərəkəti iştirakçıları və qəzasonrası tədbirlərdir. Sözsüz ki, hər bir istiqamət üzrə konkret göstərişlər və tələblər qoyulub. Yol hərəkətinin təmin edilməsində əsas maraqlı tərəf kimi Dövlət Yol Polisinin funksiyası olduğuna görə proqramın icrasında daha çox maraqlıyıq”.

K.Əliyev bildirib ki, Dövlət Proqramın icrası ilə bağlı bir il ərzində Daxili İşlər Nazirliyinin Baş Dövlət Yol Polis İdarəsi müvafiq qurumlarla birlikdə tədbirlər həyata keçirib. Belə ki, “Yol hərəkəti haqqında” Qanunun təkmilləşdirilməsi ilə bağlı artıq müvafiq tədbirlər görülüb və aidiyyəti qurumlara göndərilib. Cari ildə görülməli olan məsələlərdən biri də qəzadan sonrakı tədbirlərin görülməsidir. Bununla bağlı Daxili İşlər, Səhiyyə və Fövqəladə Hallar nazirlikləri yol-nəqliyyat qəzaları zamanı hadisə yerinə vaxtında çatma ilə bağlı tədbirlər planı hazırlayıb. Hər üç nazirliyin rəhbərlikləri tərəfindən təsdiq edilmiş plan əsasında regionlarda təlimlərin keçirilməsinə başlanıb. Artıq belə təlimlərdən biri Gəncədə təşkil olunub. Ümumiyyətlə, yol-nəqliyyat hadisələri ilə bağlı xilasetmə, təcili və təxirəsalınmaz tibbi yardım tədbirlərini həyata keçirən aidiyyəti qurumlar arasında əlaqələndirmənin gücləndirilməsi, yol-nəqliyyat hadisələrinin qeydiyyatı sisteminin və ilk tibbi yardım göstərilməsi işinin təkmilləşdirilməsi, yol-nəqliyyat hadisələrinin müntəzəm baş verdiyi yerlərin – qəza ocaqlarının müəyyənləşdirilməsi və qəzaların səbəblərinin aradan qaldırılması işinin təkmilləşdirilməsi istiqamətində də işlər davam etdirilir.

Milli Məclisin deputatı Çingiz Qənizadə, Ekologiya və Təbii Sərvətlər Nazirliyinin şöbə müdiri Rasim Səttarzadə, Baş Dövlət Yol Polis İdarəsinin qərargah rəisi, mayor Elvin Hüseynzadə, Dövlət Avtomobil Nəqliyyatı Xidmətinin nümayəndəsi Ramin Bayramov, “Azərbaycan Dəmir Yolları” QSC-nin nümayəndəsi Nəriman Nağıyev və digərləri çıxışlarında Dövlət Proqramının icrası ilə bağlı görülən işlərdən danışıblar. Bildirilib ki, Dövlət Proqramı Azərbaycan Respublikasında yol hərəkətinin təhlükəsizliyi səviyyəsinin artırılması vasitəsilə yol-nəqliyyat hadisələrinin sayının və bu hadisələr nəticəsində ölkəyə dəyən sosial-iqtisadi zərərin azaldılması istiqamətində tədbirləri özündə ehtiva edir. Dövlət Proqramı Azərbaycan Respublikası Konstitusiyasının, ölkəmizin tərəfdar çıxdığı beynəlxalq hüquqi aktların və Azərbaycanın qüvvədə olan digər normativ hüquqi aktlarının tələbləri nəzərə alınmaqla hazırlanıb. Dövlət Proqramının əsas məqsədi yol-nəqliyyat hadisələrinin, xüsusilə də ölümlə və sağlamlığa zərər vurulması ilə nəticələnən yol-nəqliyyat hadisələrinin sayının, habelə ölkə iqtisadiyyatına və ekologiyasına dəyən ziyanın həcminin azaldılması üçün zəruri tədbirlər görməkdir. Bu istiqamətdə müvafiq qurumlar üzərlərinə düşən vəzifələri uğurla icra edirlər.

Tədbirdə Daxili İşlər Nazirliyinin Baş Dövlət Yol Polisi İdarəsinin, Bakı Şəhər Dövlət Yol Polisi İdarəsinin, Ekologiya və Təbii Sərvətlər Nazirliyinin, Dövlət Avtomobil Nəqliyyatı Xidmətinin, Bakı Nəqliyyat Agentliyinin, Azərbaycan Avtomobil Yolları Dövlət Agentliyinin və digər qurumların nümayəndələri, eləcə də nəqliyyat sahəsi üzrə ekspertlər iştirak ediblər.