Qusarın intensiv alma bağlarının məhsulu xarici bazarlara çıxarılır FOTO VİDEO
Qusar, 17 oktyabr, Elxan Yusifli, AZƏRTAC
Bu il Qusar rayonunun intensiv və superintensiv meyvə bağlarında bol məhsul yetişib.
AZƏRTAC-ın bölgə müxbiri xəbər verir ki, hazırda alma və armud bağlarında meyvə yığımının qızğın çağıdır. Məhsul toplanması ilə yanaşı, sahibkarlar almanın xarici bazarlarda satışını da təşkil edirlər.
Rayonun Langi kəndində 10 hektardan çox sahədə salınan meyvə bağlarından toplanan məhsulun böyük hissəsi satış üçün Rusiya bazarlarına göndərilir. Burada almanın “Gala”, “Golden”, “Fuji”, “Granny Smith” və digər növləri becərilir.
Aqronom Elnur Osmanov bildirib ki, təsərrüfatda alma ilə yanaşı armud, gilas, şaftalı və nektarin bağları da mövcuddur. “Hazırda alma və armud bağlarından məhsul toplayırıq. Yığılan alma Yaponiyanın “Fuji” sortudur. Meyvə toplandıqdan sonra anbara yığılır. Burada əməkdaşlarımız almaları ölçülərinə və keyfiyyətinə görə çeşidləyirlər. Almalar təmiz yuyulur və qablaşdırılır. Satışa hazır məhsul soyuducu anbarda saxlanılır. Bizim soyuducu anbarımız 4,5 min ton məhsul saxlamağa imkan verir. Xarici bazardan məhsul üçün edilən təkliflər dəyərləndirilir. Bağlardan yığılan alma ən sərfəli təklif əsasında xarici bazarlarda müştərilərə satılır”,- deyə o söyləyib.
Almanın satış qiymətini bazar formalaşdırır. Kütləvi yığım zamanı toplanan məhsulun böyük hissəsi satış üçün Rusiya bazarlarına göndərilir. Superintensiv alma bağlarında becərilən xarici sort almalar müştərilərə 0,9-1 manata təklif olunur.
Qusar Dövlət Aqrar İnkişaf Mərkəzinin direktoru Rauf Minhacov bildirilib ki, ölkəmizdə, o cümlədən Qusar rayonunda intensiv bağçılığın inkişafı üçün böyük imkanlar, dövlət dəstəyi mövcuddur. Bunun bariz nümunəsi kimi Aqrar Subsidiya Şurasının qərarı ilə ölkəmizdə intensiv meyvə bağlarına görə bir çox subsidiyaların ödənilməsini göstərmək olar. Rayonda torpaq islahatları həyata keçirildikdən sonra mövcud köhnə tipli, bioloji yaş həddini keçmiş ənənəvi bağların yerində müasir tipli intensiv və superintensiv bağlar salınıb.
“Qusarda müasir meyvə bağlarının salınmasında əsas məqsəd xarici bazarlara çıxarıla bilən rəqabətədavamlı məhsul istehsal etməkdir. Qusar rayonu üzrə hazırda cəmi 13 min 600 hektar bağ sahəsi mövcuddur ki, bunun da 8 min hektara yaxınını intensiv və superintensiv bağlar təşkil edir. Bu gün Qusar rayonunda 4 min 248 hektar alma və 406 hektar armud bağı var. Bu günə kimi bu sahələrdən artıq 32 min 730 ton məhsul yığılıb. Məhsuldarlıq alma üzrə hər hektara görə 71, armud üzrə 98 sentnerdir. Sahələrdə məhsul yığımı davam edir”, - deyə Rauf Minhacov söyləyib.
Ölkə ərazisində istehsal olunan meyvənin həcminin artırılması xarici məhsula tələbatı azaltmaqla yanaşı, yerli fermerlərin iqtisadi vəziyyətinə də müsbət təsir göstərir. Məhsuldar bağların salınması ərzaq təhlükəsizliyinin təmin edilməsində və ixracın artırılmasında mühüm rol oynayır.
Bölmənin digər xəbərləri
