İDMAN
AZƏRBAYCAN MİLLİ OLİMPİYA KOMİTƏSİNİN PREZİDENTİ, MİLLİ MƏCLİSİN DEPUTATI İLHAM ƏLİYEV GƏNCƏDƏ
Milli Olimpiya Komitəsinin Prezidenti, Milli Məclisin deputatı İlham Əliyev iki il əvvəl bünövrəsini özü qoyduğu və tikintisi başa çatmış Olimpiya kompleksi ilə tanış olmaq üçün Gəncəyə gəlmişdir. Şəhər rəhbərliyinin və ictimaiyyətinin nümayəndələri onu kompleksin qarşısında hərarətlə salamladılar.
İlham Əliyev əvvəlcə son illərdə Azərbaycanda idmanın inkişafını və eləcə də kompleksin tikintisini əks etdirən fotostendə baxdı. Sonra o, kompleksdə ayrı-ayrı idman növləri üzrə yarışlar və məşqlər üçün nəzərdə tutulan salonlarla tanış oldu. İki ildən də az bir müddətdə “Azərborukəmərtikinti” tresti tərəfindən ucaldılmış və beynəlxalq standartlara cavab verən bu kompleks, iki geniş salondan, müxtəlif yardımçı otaqlardan ibarətdir. Bu obyektdə tikinti işlərinə daim nəzarət edən İlham Əliyev böyük qurğulardan tutmuş, ən kiçik detallaradək hər şeyin müasir tələblərə cavab verməsinə xüsusi diqqət yetirmişdir.
Milli Olimpiya Komitəsinin Prezidenti İlham Əliyev qədim Gəncə üçün son illərin ən gözəl töhfələrindən biri olan bu komplekslə ətraflı tanışlıqdan sonra bir sıra tövsiyələrini verdi.
Olimpiya kompleksinə baxışdan sonra İlham Əliyev Azərbaycan televiziyasına müsahibə verdi.
MİLLİ OLİMPİYA KOMİTƏSİNİN PREZİDENTİ,MİLLİ MƏCLİSİN DEPUTATI İLHAM ƏLİYEVİN MÜSAHİBƏSİ
MÜXBİR: Təxminən iki il bundan əvvəl bu obyektin bünövrəsini qoyanda yəqin inanırdınız ki, belə gözəl kompleks alınacaqdır.
CAVAB: Mən inanırdım ki, belə gözəl kompleks alınacaqdır. Çünki bunun layihəsinə özüm baxmışdım. Biz bu kompleksin tikintisi üçün tender elan etmişdik. Ən gözəl təklif verən şirkət də bu tenderdə qalib gəldi. Həmin şəxsi də bilavasitə mən özüm təsdiq etmişdim. Ona görə də 2000-ci ildə mən burada olarkən şəxsən özüm bu kompleksin təməl daşını qoydum və bilirdim ki, gələcəkdə Gəncədə gözəl bir idman qurğusu tikilib istifadəyə veriləcəkdir. Gördüyünüz kimi, idman kompleksi bu gün tam şəkildə hazırdır. Burada ən yüksək səviyyədə beynəlxalq idman yarışları keçirmək mümkündür. Eyni zamanda, təlim-məşq toplanışları da keçirmək mümkün olacaqdır. Beləliklə, əminəm ki, Gəncədə yaşayan idmançılar, gənclər, uşaqlar bu kompleksdən səmərəli şəkildə istifadə edəcəklər.
SUAL: Çox qısa vaxtda Azərbaycan idman sahəsində də tanındı. Bu, idmana dövlət qayğısı sayəsində mümkün olmuşdur. Siz idmançılarımızın təşəbbüslərini necə qiymətləndirirsiniz?
CAVAB: Mən idmançılarımızın təşəbbüslərini yüksək qiymətləndirirəm. Bilirsizmi, Azərbaycanda idman hərtərəfli inkişaf edir. Bu inkişafın əsas səbəbi ondan ibarətdir ki, həm idmana rəhbərlik edən şəxslər öz vəzifələrini ləyaqətlə yerinə yetirirlər, eyni zamanda bizim idmançılarımız Azərbaycanı beynəlxalq yarışlarda ləyaqətlə təmsil edirlər. Biz özümüzdən nə asılıdırsa onu edirik ki, idmançıların şəraiti yaxşı olsun, idmanla məşğul olmaq üçün gözəl imkanlar yaransın, idmançılarımız beynəlxalq yarışlarda mütəmadi iştirak etsinlər. Onlar da uğurlu çıxışları ilə bizim hamımızı, bütün xalqımızı sevindirirlər.
Bilirsiniz ki, müxtəlif idman növlərində Azərbaycanda qısa müddət ərzində çox böyük qələbələr qazanılıbdır. Hətta o idman növlərində yüksək qələbələr qazanılıb ki, bir-iki il əvvəl orada hər hansı inkişafdan söhbət gedə bilməzdi. Bu onu göstərir ki, idman Azərbaycanda kütləvi xarakter alır. İdmanla məşğul olanların sayı günbəgün çoxalır və peşəkar idmançıların da səviyyəsi xeyli artıbdır. Ona görə də Milli Olimpiya Komitəsinin Prezidenti kimi mən idmançılara öz təşəkkürümü bildirmək istəyirəm. Onlar gözəl çıxışları ilə bizim hamımızı sevindirirlər.
SUAL: İlham müəllim daha hansı bölgədə Olimpiya idman kompleksi açılacaqdır.
CAVAB: Şəki şəhərində olimpiya idman kompleksi hazırdır. Bəzi xırda məsələlər qalıb, onlar da yəqin ki, 2-3 həftəyə tamamlanacaqdır. Bərdə şəhərində də idman kompleksi demək olar ki, hazırdır. Eyni zamanda, Lənkəranda idman kompleksi tikilir. Gələcəkdə Qubada, Şamaxıda və dəfələrlə bəyan etdiyim kimi, Azərbaycanın hər bir bölgəsində idmanla məşğul olmaq üçün ən müasir, dünya standartlarına cavab verən idman kompleksləri tikiləcəkdir.
Azərbaycanda keçmişdə də idman qurğuları var idi. Amma onlar artıq köhnəlibdir. Bəziləri sıradan çıxıbdır. Biz isə yenidən müasir, gözəl, həm də yaraşıqlı binalar tikirik ki, həmin obyektlər həm şəhərlərimizə yaraşıq versin, eyni zamanda idmanla məşğul olmaq üçün orada hər bir şərait yaradılsın. Suyu, kondisioneri, yaxşı örtüyü olan bu qurğular qışda isti, yayda sərin olsun. Gördüyünüz bu kompleksdə bütün bu məsələlər öz əksini tapıbdır. Ona görə də tam məsuliyyətlə deyə bilərəm ki, bu idman kompleksi ən yüksək dünya standartlarına cavab verən qurğulardan biridir.
MÜXBİR: Azərbaycan Prezidenti Heydər Əliyev bütün idman komplekslərinin açılışında şəxsən özü iştirak edir. Bu, dövlətimizin başçısının idmana qayğısı ilə bağlıdır.
CAVAB: Əlbəttə, dövlətimizin başçısı cənab Prezident idmanla daim maraqlanır, ona çox böyük qayğı, diqqət göstərir. Bilirsiniz ki, Azərbaycan Prezidenti görkəmli idmançıları yüksək dövlət mükafatları ilə - ordenlərlə, medallarla təltif etmişdir. Deyə bilərəm ki, dövlətimizin başçısı idmanda gedən proseslərlə mütəmadi olaraq maraqlanır, nəinki maraqlanır, öz böyük köməyini əsirgəmir. Mən sizə qətiyyətlə deyə bilərəm ki, əgər bu kömək olmasaydı, Azərbaycan idmanında bu səviyyədə inkişaf olmazdı, idman bu cür inkişaf edə bilməzdi. Əlbəttə, cənab Prezidentin komplekslərin açılışında şəxsən iştirak etməsi, açılış zamanı onun çıxışları bizim hamımızı, idmançıları, məşqçiləri, idmana rəhbərlik edən şəxsləri ruhlandırır. Bu, bizim üçün çox böyük dayaq, böyük hörmətdir, fəaliyyətimizə verilən yüksək qiymətdir. Ona görə də mən bütün idman ictimaiyyəti adından cənab Prezidentə təşəkkürümü bildirmək istəyirəm ki, o, gərgin iş cədvəli ilə yaşayır, çalışır, amma vaxt tapıb idmana da böyük qayğı göstərir.