ELM VƏ TƏHSİL
Akademik Akif Əlizadə: AMEA-nın nəzdində sahibkarlıq fəaliyyəti ilə məşğul olan qurumun yaranması zəruridir
Bakı, 15 fevral, P.İmanova, AZƏRTAC
Fevralın 15-də Azərbaycan Milli Elmlər Akademiyası (AMEA) rəyasət heyətinin növbəti iclası keçirilib.
AZƏRTAC xəbər verir ki, əvvəlcə AMEA-nın prezidenti, akademik Akif Əlizadə gündəlikdəki məsələləri diqqətə çatdırıb.
İclasda AMEA-nın Fizika-Riyaziyyat və Texnika Elmləri Bölməsinin akademik-katibi vəzifəsini icra edən, akademiyanın müxbir üzvü Nazim Məmmədovun “Fizika-Riyaziyyat və Texnika Elmləri Bölməsi üzrə elmi-tədqiqatların vəziyyəti və inkişaf istiqamətləri” mövzusunda məruzəsi dinlənilib. N.Məmmədov bölmənin elmi istiqamətləri üzrə aparılan tədqiqatların prioritet istiqamətləri və mühüm nəticələri barədə təqdimatla çıxış edib.
Məruzə ətrafında müzakirələr aparılıb, müvafiq qərar qəbul edilib.
Rəyasət heyəti “Azərbaycan Respublikasının Nizami Gəncəvi adına Qızıl medalı” və AMEA-nın adlı mükafatları üzrə 2017-ci il üçün müsabiqələrin elan olunması və müvafiq işlərin görülməsi haqqında qərar qəbul edib.
Akademik A.Əlizadə AMEA-nın mətbu orqanları olan “Elm” qəzeti, “Azərbaycan Milli Elmlər Akademiyasının Xəbərlər Məcmuəsi” və “Elm və həyat” jurnallarının çapına lazımi xərclərin ödənilməsi və ehtiyac yarandıqda tirajlarının artırılması məqsədilə AMEA-nın nəzdində sahibkarlıq fəaliyyəti ilə məşğul olan qurumun təsis edilməsi zərurətinin yarandığını qeyd edib.
Sonra AMEA-nın üzvlüyünə seçkilərlə əlaqədar olaraq akademiyanın elmi bölmələrində ekspert komissiyalarının yaradılması məsələsi müzakirə olunub. AMEA-nın akademik-katibi, akademik Rasim Əliquliyev rəyasət heyəti tərəfindən seçkilərin keçirilməsi haqqında müvafiq qərarların qəbul edildiyini xatırladıb. Qeyd edilib ki, AMEA-nın elmi bölmələri tərəfindən üzvlüyə təqdim olunmuş sənədlərin ekspertizasını təmin etmək məqsədilə bölmələr üzrə ekspert komissiyalarının tərkibi müəyyənləşdirilərək rəyasət heyətinə təqdim olunub.
Təqdim olunmuş sənədlərin ekspertizasını təmin etmək məqsədilə elmi bölmələrin vəsatətini nəzərə alaraq rəyasət heyəti müvafiq ekspert komissiyalarının yaradılması və tərkiblərinin təsdiqi haqqında qərar qəbul edib.
İclasda AMEA-nın yalançı elmə qarşı mübarizə üzrə komissiyasının Əsasnaməsi də təsdiqlənib.
Rəyasət heyətinin digər qərarı ilə “Azərbaycan Respublikasında bioloji müxtəlifliyin qorunmasına və davamlı istifadəsinə dair 2017-2020-ci illər üçün Milli Strategiya”nın AMEA-nın icraatında olan tədbirlərinin yerinə yetirilməsi ilə bağlı Fəaliyyət Planı təsdiq edilib.
İclasda bir sıra elmi-təşkilati və kadr məsələlərinə də baxılıb.