CƏMİYYƏT


Azərbaycan Respublikası Hökuməti ilə Qətər Dövləti Hökuməti arasında sərmayə üzrə birgə işçi qrupunun növbəti iclası keçirilib

Bakı, 22 fevral, AZƏRTAC

Fevralın 22-də Azərbaycan Respublikasının Hökuməti ilə Qətər Dövlətinin Hökuməti arasında Birgə İqtisadi, Ticarət və Texniki Komissiyası çərçivəsində yaradılmış Sərmayə üzrə birgə işçi qrupunun növbəti iclası keçirilib.

Fövqəladə Hallar Nazirliyinin (FHN) mətbuat xidmətindən AZƏRTAC-a bildiriblər ki, onlayn formatda keçirilmiş iclasda Qətər Xarici İşlər Nazirliyinin Asiya idarəsinin səlahiyyətli nümayəndəsi Abdullah bin Seyf Əl-Xəyarinin başçılıq etdiyi ekspertlər heyəti, Azərbaycanın bu ölkədəki səfiri Rəşad İsmayılov, Qətərin ölkəmizdəki səfiri Feysal bin Abdullah Həməd Abdullah Al Hinzab, FHN-in beynəlxalq əlaqələr idarəsinin rəisi Ərgüc Kələntərli və işçi qrupunun iclasına dəvət olunan dövlət qurumlarının və təşkilatların nümayəndələri iştirak ediblər.

Qətər XİN-in Asiya idarəsinin səlahiyyətli nümayəndəsi Abdullah bin Seyf Əl-Xəyarin tədbirdə iclas iştirakçılarına işçi qrup tərəfindən görülən işlərin icra vəziyyəti, iqtisadi, ticari və texniki sahələrdə ikitərəfli əməkdaşlığın mövcud vəziyyəti barədə məlumat verib və bu əlaqələrin daha da genişləndirilməsi üçün böyük imkanların olduğunu vurğulayıb.

Tədbiri Azərbaycan tərəfindən FHN-in beynəlxalq əlaqələr idarəsinin rəisi polkovnik Ərgüc Kələntərli iştirakçıları Azərbaycanın fövqəladə hallar naziri, Birgə İqtisadi, Ticarət və Texniki Komissiyanın Azərbaycan tərəfindən həmsədri general-polkovnik Kəmaləddin Heydərovun adından salamlayıb. Azərbaycan ilə Qətər arasında yüksək səviyyəli siyasi və iqtisadi münasibətlərin əhəmiyyətindən danışan İdarə rəisi hər iki ölkənin qlobal əhəmiyyətli məsələlərin həllində daim bir-birlərini dəstəklədiyini və beynəlxalq təşkilatlar çərçivəsində uğurla əməkdaşlıq etdiklərini diqqətə çatdırıb. Hər iki dövlətin başçılarının müdrik xarici siyasəti nəticəsində iki ölkə arasında etibarlı siyasi əlaqələr qurulduğunu vurğulayan Ə.Kələntərli bildirib ki, Komissiyanın fəaliyyət dövründə ölkələrimiz arasında ticarət əlaqələri genişlənib, ticarət dövriyyəsi bir neçə dəfə artıb. Qeyd edilib ki, iki ölkə arasında ticarət-iqtisadi əlaqələrin daha sürətli və dinamik inkışafı, eyni zamanda, qarşılıqlı biznes mühitinin genişləndirilməsi, birgə layihələrin həyata keçirilməsi, sərmayələrin yatırılması imkanlarının öyrənilməsi və qarşılıqlı sərmayələrin cəlb edilməsi mexanizmlərinin araşdırılması məsələləri birgə işçi qrupun fəaliyyətində önəmli yer tutur. Birgə səylərin mövcud əməkdaşlığın dinamik inkişafı üçün imkanlar yaratmağa davam edəcəyinə əminliyini bildirən Ə.Kələntərli Komissiya çərçivəsində ötən il görülmüş işlər barədə ətraflı məlumat verib.

Bununla yanaşı, Azərbaycanın işğaldan azad olunmuş ərazilərinin zəngin təbii sərvətlərinə, turizm potensialına, eyni zamanda, sərmayələrin yatırılması üçün geniş imkanların mövcudluğuna diqqət çəkən İdarə rəisi Qətər tərəfini həmin ərazilərdə yeni iqtisadi layihələrin həyata keçirilməsinə dəvət edib.

Görüşdə Azərbaycan nümayəndə heyəti tərəfindən təklif olunan layihələr üzrə təqdimatlar göstərilib, həmçinin hər iki ölkənin müvafiq qurumlarının nümayəndələri arasında gələcək əməkdaşlığın prioritetlərinə dair ikitərəfli fikir mübadiləsi aparılıb və Komissiyanın növbəti iclasının təşkili məsələləri müzakirə edilib.

İclasın sonunda tədbir iştirakçıları işçi qrupunun gündəliyində olan digər məsələlərlə bağlı müzakirələr aparıblar.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.