İQTİSADİYYAT


Azərbaycanın əmlak idarəçiliyi sahəsində təcrübəsi gürcü mütəxəssislərə təqdim edilib

Bakı, 21 sentyabr, AZƏRTAC

Gürcüstanın Dövlət Əmlakı üzrə Milli Agentliyinin nümayəndə heyəti sentyabrın 21-də özəlləşdirmə ilə bağlı təlimdə iştirak etmək məqsədilə Azərbaycana səfərə gəlib.

Əmlak Məsələləri Dövlət Komitəsindən (ƏMDK) AZƏRTAC-a bildirilib ki, iki gün davam edəcək təlimin məqsədi dövlət əmlakının idarə edilməsi və özəlləşdirilməsi, eləcə də əmlak idarəçiliyi sahəsində Azərbaycan təcrübəsinin gürcü mütəxəssislərə təqdim edilməsidir.

Əvvəlcə komitənin İnformasiya Texnologiyaları Mərkəzində təlim-seminar keçirilib. Tədbir çərçivəsində özəlləşdirmə sahəsində müxtəlif təqdimat və çıxışlar olub.

Komitənin rəsmiləri Prezident İlham Əliyevin rəhbərliyi ilə Azərbaycanda uğurla həyata keçirilən iqtisadi siyasətdən danışıb. Dövlət başçısı tərəfindən ölkəmizdə gerçəkləşən genişmiqyaslı islahatlar fonunda əmlak idarəçiliyi, eləcə də dövlət əmlakının özəlləşdirilməsi sahəsində həyata keçirilən iri layihələr, tətbiq olunan innovasiyalar və əldə olunan nailiyyətlərdən söz açıb. Ölkəmizdə iqtisadi fəallığı gücləndirmək və özəl təşəbbüslərə dəstək vermək məqsədilə özəlləşdirmənin və bu sahəyə investisiyaların cəlb edilməsinin prioritet istiqamət elan olduğunu qeyd edib. Dövlət əmlakının özəlləşdirilməsinin sürətləndirilməsi istiqamətində mühüm tədbirlərin həyata keçirildiyini bildirib.

Qeyd edilib ki, Azərbaycan Respublikası Prezidentinin dövlət əmlakının idarə edilməsində səmərəliliyin artırılması və onun idarə olunmasının təkmilləşdirilməsi ilə bağlı müəyyənləşdirdiyi strategiya və hədəflər çərçivəsində komitə yeni metodların və yanaşmaların tətbiqini genişləndirib. Eyni zamanda, ölkə başçısının 2016-cı il 19 iyul tarixli “Dövlət əmlakının özəlləşdirilməsinin sürətləndirilməsi və idarə edilməsinin səmərəliliyinin artırılması ilə bağlı” Fərmanına əsasən də özəlləşdirilən müəssisələrin idarəetmə mexanizmi müasir prinsiplər əsasında həyata keçirilir.

Daha sonra dövlət əmlakının idarə edilməsi, özəlləşdirmə sahələrinə aid təqdimatlar olub. Bildirilib ki, dövlət əmlakının idarəçiliyi və özəlləşdirilməsi sahəsində elektron xidmətlərə keçidin daha geniş tətbiqi, innovativ resurslardan istifadə və şəffaflığın artırılması istiqamətində mühüm nəticələr əldə olunub.

İri dövlət şirkətlərinə dair vahid məlumat bazası formalaşdırılıb. Burada kadr uçotu üzrə məlumatlar, maliyyə və mühasibat göstəriciləri, o cümlədən daşınmaz əmlaka dair informasiyalar yer alır. Məlumat bazasına iri dövlət şirkətləri tərəfindən onlayn rejimdə müvafiq məlumatları daxil etməyə imkan verən veb-platforma yaradılıb. Hazırda bazada 20-dən çox dövlət müəssisəsinin məlumatları yerləşdirilib.

Özəlləşdirilmənin keyfiyyətcə yeni mərhələsi olan Elektron hərracın tətbiqi ilə dövlət əmlakına sahib olmaq “Məsafəsiz özəlləşdir” formatı əsasında aparılır. Sistemin əsas üstünlüklərindən biri vətəndaşın sifarişçi qismində qatılmadan da hərracın gedişatını real vaxt rejimində, onlayn izləmək imkanının olmasıdır.

Qeyd edək ki, hərraclarda qeydiyyatdan keçmək, əmlaka dair sifariş vermək elektron şəkildə aparılır. İndiyədək dövlət əmlakının özəlləşdirilməsi ilə bağlı 68 elektron sifariş qəbul olunub. 11 vətəndaş olduğu məkanı dəyişmədən hərraca internet vasitəsilə onlayn rejimdə qatılıb. Ümumilikdə isə cari il ərzində 150-dən çox hərrac keçirilib.

Vurğulanıb ki, sərmayəçilər hərraca çıxarılan dövlət əmlakları ilə virtual tanış olmaq imkanına malikdir. Belə ki, "Özəlləşdirmə portalında" hər bir əmlakın mövqeyi, yerləşməsi, mövcud vəziyyəti barədə fotoşəkillər və mətn məlumatları var. Artıq portala baxış sayı 2 milyona yaxınlaşıb.

Qeyd olunub ki, ölkədə ilk dəfə olaraq Torpaqların Elektron Uçotu İnformasiya Sistemi yaradılır. Bildirilib ki, torpaqların elektron kadastr uçotu 4,2 milyon hektara yaxın ərazini əhatə edəcək. Bu günədək 3 milyon hektara yaxın sahənin elektron kadastr uçotu aparılıb. Bildirilib ki, 24 rayonda torpaqların elektron kadastr uçot işləri yekunlaşıb. Artıq 10 rayonda uçot işlərinin real şəraitdə tətbiqi mexanizminə başlanılıb.

Daşınmaz əmlakın qeydiyyatı sahəsində də əlçatanlıq artırılır, prosedurlar sadələşdirilir. Artıq çıxarışları 1 iş günü müddətində də almaq mümkündür.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.