ELM VƏ TƏHSİL
Azərbaycanlı alimlər Bolqarıstanda elmi tədqiqatlar aparıblar
Bakı, 23 oktyabr, AZƏRTAC
Avropa Komissiyasının “Horizon-2020” Proqramı tərəfindən maliyyələşdirilən “Biliyin mübadiləsi və akademik mədəniyyətlər humanitar elmlərdə, Avropa və Qara dəniz bölgəsi” layihəsi çərçivəsində Bolqarıstanın Neofit Rilski adına Cənub-Qərb Universitetinin dəvəti ilə bir qrup Azərbaycan alimi bu ölkədə elmi tədqiqatlar aparıb.
Azərbaycanlı alimlər Bolqarıstanın Blaqoyevqrad şəhərindəki Amerika Universiteti nəzdindəki Panitza Muzeyinin və Blaqoyevqrad Regional Tarix Muzeyinin elmi kitabxanalarında tədqiqat işləri aparıb, bolqar alimləri ilə elmi fikir mübadiləsi xarakterli görüşlər keçiriblər. Blaqoyevqrad Regional Tarix Muzeyinin direktoru, doktor Xristina Tsoneva azərbaycanlı alimləri qəbul edib. Direktor onlara muzeyin tarixi barədə məlumat verib. Görüşdə muzey işi, arxeologiya və tarix sahəsində qarşılıqlı əməkdaşlıq barədə fikir mübadiləsi aparılıb.
AMEA Arxeologiya və Etnoqrafiya İnstitutunun Azərbaycanın antik dövr arxeologiyası şöbəsinin rəhbəri Zaur Həsənovun təşəbbüsü ilə Blaqoyevqrad Regional Tarix Muzeyinin akt zalında “Azərbaycan Respublikasında arxeoloji və tarixi tədqiqatlar” mövzusunda elmi seminar keçirilib. Arxeologiya və Etnoqrafiya İnstitutunun tədris və beynəlxalq əlaqələr şöbəsinin rəhbəri, dosent Səfər Aşurov Azərbaycanda son dövrlərdə aparılmış arxeoloji tədqiqatlar barədə Bolqarıstan alimlərinə məlumat verib. Daha sonra azərbaycanlı tədqiqatçılar Azərbaycan arxeologiyası və tarixinin müxtəlif mövzuları üzrə mühazirələrlə çıxış ediblər. Elmi seminarda azərbaycanlı tədqiqatçıların “Yeni tədqiqatlar işığında Kür-Araz arxeoloji mədəniyyətinin problemləri”, “Azərbaycanın son tunc dövrü kurqanlarında bəzi dəfn ritualları”, “Azərbaycanın ilk tunc dövrü kurqanları”, “Dünyanın müasir cəmiyyətlərində arxeologiya (neolit dövrü üzrə yeni kəşflər)”, “Azərbaycanda maarifçilik və mədəni sosiotranzit XIX əsrin ikinci yarısı - XX əsrin əvvəli” mövzularında məruzələri dinlənilib. Həmçinin elmi seminarda bolqarıstanlı alimlər “Balkan müharibələri və Balkan xalqları”, “Cənub-Qərbi Bolqarıstanda tarixəqədərki mədəniyyətlər” mövzularında elmi məruzələrlə çıxış ediblər.
Məruzəçilər Azərbaycan arxeologiyası və tarixi barədə seminar iştirakçılarının çoxsaylı suallarını cavablandırıblar.
Azərbaycanlı alimlər “Struma” avtomagistralının yeni xəttinin çəkilişi zamanı eramızın III-VI əsrlərinə aid son antik dövr şəhər yerinin aşkarlanmış qalıqlarında aparılan arxeoloji tədqiqat ərazisində, Sofiya Tarix Muzeyində, Bolqarıstan Milli Arxeologiya Muzeyinin nəzdindəki arxeoloji muzeydə olublar.
Həmçinin AMEA A.Bakıxanov adına Tarix İnstitutunun şöbə müdiri, tarix üzrə elmlər doktoru, professor İradə Bağırova Bolqarıstanın paytaxtında və Blaqoyevqrad şəhərindəki kitabxanalarda elmi materiallar üzərində işləyib.
Hazırda “Horizon-2020” proqramının iştirakçısı olan Arxeologiya və Etnoqrafiya İnstitutunun aparıcı elmi işçisi Xəqani Alməmmədov Bolqarıstanda elmi tədqiqatlar aparır. O, ölkənin Kresna şəhəri yaxınlığındakı neolit dövrü İlindentsi yaşayış məskənində, Pokrovnik və Zelendol kəndləri arasında yerləşən antik dövr qala qalıqlarında aparılan arxeoloji qazıntılarda iştirak edir.