REGİONLAR
“Azərsu”nun birinci müavini Qusarda vətəndaşlarla görüşüb
Bakı, 18 avqust, AZƏRTAC
Mərkəzi icra hakimiyyəti orqanlarının, digər idarəetmə qurumlarının rəhbərlərinin bu ilin avqust ayında şəhər və rayonlarda vətəndaşların qəbulu cədvəlinə uyğun olaraq “Azərsu” ASC sədrinin birinci müavini Teyyub Cabbarov avqustun 17-də Qusar şəhərində Qusar və Quba rayonlarından olan vətəndaşları qəbul edib.
ASC-dən AZƏRTAC-a bildirilib ki, qəbuldan əvvəl qurum sədrinin birinci müavini Teyyub Cabbarov və Qusar Rayon İcra Hakimiyyətinin başçısı Şair Alxasov ümummilli lider Heydər Əliyevin abidəsini ziyarət edib, abidə önünə gül dəstəsi düzərək Ulu Öndərin əziz xatirəsinə ehtiramlarını bildiriblər.
Qusar şəhəri Heydər Əliyev Mərkəzində keçirilən qəbulda Qusar və Quba rayonlarından 39 nəfər iştirak edib. Vətəndaşların müraciətləri içməli su təchizatı və tullantı sularının axıdılması xidmətləri, işə qəbul və digər məsələlərlə bağlı olub. Müraciətlərin qısa müddətdə araşdırılaraq zəruri tədbirlərin görülməsi barədə aidiyyəti struktur bölmələrinin rəhbərlərinə tapşırıqlar verilib.