AZƏRTAC xəbər verir ki, aprelin 19-da Bakı şəhərinin rayonlarında əvvəlcədən müəyyən olunmuş yerlərdə kənd təsərrüfatı məhsullarının növbəti satış yarmarkaları keçirilmişdir. Şəhər əhalisinin kənd təsərrüfatı məhsullarına tələbatını ödəmək məqsədi ilə keçirilən yarmarkalara, mövsümə uyğun olaraq, əsasən meyvə-tərəvəz və bostan məhsulları çıxarılmışdı.

“Təzə bazar” MMC-nin həyətindəki yarmarkaya Sabirabad, Zərdab, Gədəbəy, Hacıqabul və Göyçay rayonlarından müxtəlif çeşidli kənd təsərrüfatı məhsulları gətirilmişdi.

Kənd Təsərrüfatı Nazirliyinin nümayəndəsi Fərhad Qəmbərovun verdiyi məlumata görə, şənbə günü burada əhaliyə 15,65 ton məhsul, o cümlədən 3 ton ət, 0,25 ton ağartı, 6 ton tərəvəz, 5 ton kartof, 0,3 ton bostan bitkisi, 1 ton meyvə, 5 min ədəd yumurta, 100 kiloqram bal təklif edilmişdir.

Yarmarkada qiymətlər bazardakından 20-25 faiz aşağı olmuşdur. Burada mal ətinin kiloqramı 4 manata, qoyun əti 4 manat 20 qəpiyə, quş əti 3 manat 60 -3 manat 80 qəpiyə, kök 40-50, kələm 50-60, alma 50-1 manat 20 qəpiyə, armud 1 manat- 1 manat 50 qəpiyə, kartof 50-60 qəpiyə, bal 9-10 manata, yumurtanın bir ədədi 8-9 qəpiyə satılmışdır.

Suraxanıda “Günəş” ticarət mərkəzindəki yarmarkada Qobustan, Samux, Daşkəsən, Quba və Biləsuvar rayonlarının fermərləri satışa 20 tona yaxın məhsul çıxarmışdılar.

“Suraxanı Maşınqayırma Zavodu” Açıq Törəmə Səhmdar Cəmiyyətinin ərazisindəki yarmarkada isə Cəlilabad rayonunun fermerleri alıcılara 5 tona yaxın məhsul təklif edirdilər.

Biləcəri qəsəbəsi, Məlik Aslanov küçəsi, 284 nömrəli orta məktəbin qarşısındakı yarmarkaya Qazax və Ağsu rayonlarından 31 tondan artıq məhsul gətirilmişdi. Ağsu rayon icra hakimiyyəti başçısının müavini Elxan Abdullayevin verdiyi məlumata görə, bu gün rayonun fermerləri satışa 2,6 ton kələm, 4,1 ton soğan, 700 kiloqram xiyar və digər meyvə-tərəvəz, süd məhsulları çıxarmışlar.

Burada məhsulların qiymətləri bazardakından xeyli ucuz, keyfiyyəti yüksək olduğuna görə şəhər sakinləri onları həvəslə alırdılar.

Binəqədi rayonunda 6 nömrəli Bakı Texniki Peşə Liseyinin qarşısındakı yarmarkada Goranboy, Bərdə və Ağstafa rayonlarının fermerləri qiymətləri bazardakından 45-50 faiz ucuz olan kartof, kök, çuğundur, alma, soğan, kələm, yumurta və s. satırdılar.

İşçi qrupunun rəhbəri Sabir Əhədovun sözlərinə görə yarmarkaya 14 tondan çox məhsul gətirilmişdir.

Nərimanov rayonu, Keşlə ticarət mərkəzində təşkil olunmuş yarmarkada şənbə günü paytaxt sakinlərinə Xaçmaz, Tərtər, İmişli, Tovuz, Astara, Beyləqan, Daşkəsən, Neftçala, Oğuz və Qobustan rayonlarından gətirilmiş 69 ton məhsul, o cümlədən 2 ton ət, 900 kiloqram ağartı, 29,5 ton tərəvəz, 16,5 ton kartof, 100 kiloqram konserv məhsulu, 16,5 ton meyvə, Giləzi, Goradil broyler fabriklərindən isə 20 min ədəd yumurta təklif olunmuşdur.

Yarmarkada mal əti 4 manata, qoyun əti 4 manat 20 qəpiyə, pendir 2 manat 40 qəpiyə, alma, kartof 40-50, kök 50, çuğundur 40 qəpiyə, pomidor 1manat 50 qəpiyə, xiyar 1manata, yumurtanın bir ədədi 8 qəpiyə satılırdı.

Kənd Təsərrüfatı Nazirliyinin nümayəndəsi Fərhad Eminov demişdir ki, sakinlər yarmarkaya daha çox məhsul gətirmiş Xaçmaz (25 ton) və Tərtər (37 ton) fermerlərinin təklif etdiyi ucuz və keyfiyyətli meyvə-tərəvəzi həvəslə alırlar.

######