CƏMİYYƏT


Baş Prokurorluqda cari ilin birinci yarısında görülmüş işlərin yekunlarına və qarşıda duran vəzifələrə dair əməliyyat müşavirəsi keçirilib

Bakı, 23 iyul, AZƏRTAC

İyulun 23-də Baş Prokurorluqda 2021-ci ilin birinci yarımilində prokurorluq orqanları tərəfindən “Prokurorluq haqqında” Azərbaycan Respublikası Qanununda nəzərdə tutulmuş fəaliyyət istiqamətləri üzrə görülmüş işlərin vəziyyətinin və qarşıda duran vəzifələrin müzakirəsinə həsr olunmuş əməliyyat müşavirəsi keçirilib.

Baş Prokurorluğun mətbuat xidmətindən AZƏRTAC-a bildiriblər ki, əvvəlcə Azərbaycanın müstəqilliyi və ərazi bütövlüyü uğrunda canlarını fəda etmiş şəhidlərimizin xatirəsi bir dəqiqəlik sükutla yad olunub, qazilərə şəfa dilənib.

Müşavirədə çıxış edən Baş prokuror Kamran Əliyev xalqımızın zəfər salnaməsinin memarı, ümummilli lider Heydər Əliyevin əsasını qoyduğu böyük qələbə konsepsiyasının Prezidentimiz, Silahlı Qüvvələrin Müzəffər Ali Baş Komandanı İlham Əliyev tərəfindən “Dəmir yumruq”la həyata keçirilməsi nəticəsində uzun illərdən sonra ölkəmizin ərazi bütövlüyünü bərpa edərək inkişafının keyfiyyətcə yeni mərhələsinə qədəm qoyduğunu diqqətə çatdırıb.

Bildirilib ki, Vətən müharibəsində əldə edilmiş hərbi-siyasi zəfərimiz Azərbaycanın regionda və dünyada mövqelərini əhəmiyyətli dərəcədə möhkəmləndirməklə ölkəmizin növbəti onilliklər üçün tərəqqisinə və qələbələrinə geniş imkanlar yaradıb, Qarabağı həyata qaytaracaq “Böyük Qayıdış”ın əsasını qoyub.

İşğaldan azad olunmuş torpaqlarımızın qısa müddət ərzində bərpa ediləcəyinə əminlik ifadə olunmaqla, dövlətimizin başçısı İlham Əliyevin və Birinci vitse-prezident Mehriban xanım Əliyevanın Şuşaya və azad olunmuş digər rayonlara səfərləri, orada üçrəngli Azərbaycan bayrağının ucaldılması, Şuşanın “Azərbaycanın mədəniyyət paytaxtı” elan edilməklə müstəqillik tariximizdə ilk dəfə “Xarıbülbül” festivalı keçirilməsinin doğma torpaqlarımızın dirçəldilməsinin təminatı olduğu vurğulanıb.

Xüsusilə qeyd edilib ki, Azərbaycan dövləti və xalqı üçün əlamətdar olan gündə - iyunun 15-də Şuşada imzalanan Türkiyə ilə Azərbaycan arasında müttəfiqlik haqqında müstəsna siyasi və tarixi əhəmiyyətə malik Bəyannamə Qarabağ zəfərindən sonra qazanılan növbəti tarixi uğur olmaqla iki dost və qardaş ölkə arasında mövcud əlaqələri və əməkdaşlığı yeni mərhələyə yüksəldib.

Münaqişənin başa çatması ilə birlikdə milli-mənəvi və ekoloji terrora məruz qalmış torpaqlarımızda başlanmış möhtəşəm quruculuq işləri, “ağıllı şəhər”, “ağıllı kənd” konsepsiyalarının tətbiqi, Füzuli-Şuşa, Bərdə-Ağdam, Zəngilan-Horadiz avtomobil yollarının, həmçinin Füzuli və Zəngilan beynəlxalq hava limanlarının, Ağdam şəhərinin Baş Planının təsdiq edilməklə bir sıra infrastruktur obyektlərinin təməlinin qoyulması ölkəmizin sosial-iqtisadi inkişafının əsaslarının daha da möhkəmləndirilməsinə xidmət etməklə regionda sabitliyin və təhlükəsizliyin inkişafına töhfə verəcəyi bildirilib.

Baş prokuror diqqətə çatdırıb ki, uzun illərdən sonra torpaqlarımıza qovuşmaqda əvəzsiz xidmətləri olmuş Vətən müharibəsinin hər bir iştirakçısı, şəhid ailələri, qazilər, Ali Baş Komandan İlham Əliyevin və Birinci vitse-prezident Mehriban xanım Əliyevanın müstəsna qayğısı ilə əhatə edilməklə bu istiqamətdə “YAŞAT” Fondu tərəfindən həyata keçirilən tədbirlər müstəsna əhəmiyyətə malik olub.

Müşavirədə ölkəmizin 2021-ci ilin birinci yarımilində koronavirus (COVID-19) pandemiyasının yaratdığı çətinliklər və iqtisadi məhdudiyyətlərə baxmayaraq, bütün sahələrdə inkişaf tempini qoruyub saxladığı bildirilməklə görülmüş qabaqlayıcı tədbirlərlə pandemiyanın fəsadlarının aradan qaldırıldığı, həyata keçirilən uğurlu vaksinasiya strategiyası nəticəsində əhalimizin böyük bir hissəsinin peyvənd olunduğu qeyd edilib.

Beynəlxalq sahədə uğurlu xarici siyasətin davam etdirildiyi vurğulanmaqla ölkəmizdə dünya miqyaslı idman turnirləri olan Formula 1 yarışları və ilk dəfə olaraq futbol üzrə Avropa çempionatının final mərhələsinin dörd oyununun keçirilməsi ilə respublikamızın bütün dünyaya güclü iqtisadi potensiala, zəngin mədəniyyətə, özünəməxsus dəyərlərə və ictimai-siyasi sabitliyə malik ölkə olduğunu bir daha nümayiş etdirdiyi diqqətə çatdırılıb.

Xüsusi qeyd edilib ki, 2021-ci ilin birinci yarımilində də prokurorluq orqanları Prezident İlham Əliyevin diqqət və qayğısı ilə əhatə olunub. Bu baxımdan dövlətimizin başçısının fevralın 8-də paytaxtın Binəqədi rayonu ərazisində Baş Prokurorluğun yeni inzibati bina kompleksinin açılışında iştirakı quruma göstərilən etimadla yanaşı, prokurorluq orqanlarının fəaliyyətinin ən müasir tələblər səviyyəsində təkmilləşdirilməsi, infrastrukturunun yaxşılaşdırılması istiqamətində həyata keçirilən islahatların ardıcıllığını nümayiş etdirib.

Görülən işlərin davamı olaraq, hərbi prokurorluq orqanlarının fəaliyyətinin daha səmərəli təşkilini təmin etmək məqsədilə dövlətimizin başçısının sərəncamı ilə Qubadlı, Kəlbəcər Hərbi Prokurorluğu və Qarabağ Hərbi Prokurorluğunun əsasında Ağdam Hərbi Prokurorluğunun yaradılması Qarabağın yenidən həyata qaytarılmasına dair dövlət siyasətinin həyata keçirilməsində mühüm önəm kəsb edir.

Dövlətimizin başçısının dəstəyi ilə prokurorluqda müasir məzmunlu islahat tədbirlərinin davamı kimi şəffaflığın təmin olunması, elmi-texniki nailiyyətlərin tətbiqi, maddi-texniki bazanın və əməkdaşların sosial müdafiəsinin gücləndirilməsi, işin səmərəliliyini artırmağa və mövcud çatışmazlıqları təxirə salınmadan aradan qaldırmağa təminat verən icra və nəzarət mexanizminin yaradılması istiqamətində Azərbaycan Prezidentin 2021-ci il 7 may tarixli Fərmanı da müstəsna əhəmiyyətə malikdir.

Qeyd edilib ki, cari ilin birinci yarımilində prokurorluq orqanlarının fəaliyyətində səmərəliliyin artırılması ilə bağlı həyata keçirilən tədbirlərlə yanaşı, beynəlxalq tərəfdaşlarla əməkdaşlıq münasibətlərinin inkişafına da xüsusi diqqət yetirilib. Bu dövrdə Rusiya Federasiyası və Türkiyə Respublikası Ali Məhkəməsinin Baş prokurorlarının rəhbərlik etdikləri nümayəndə heyətlərinin ölkəmizə qarşılıqlı işgüzar səfərləri zamanı dövlətimizin başçısı İlham Əliyev tərəfindən qəbul edilməsinin ikitərəfli əlaqələrin yeni müstəvidə davam etdirilməsinə hərtərəfli zəmin yaratdığı xüsusi vurğulanıb.

Baş prokuror Kamran Əliyev prokurorluğun əsas fəaliyyət istiqamətləri üzrə görülən işlərə və statistik göstəricilərə istinad etməklə hesabat dövründə respublikada kriminogen durumun nəzarətdə saxlanıldığını, əhalinin hər 100 min nəfərinə düşən 147 cinayətin sayına görə ölkəmizin MDB və Avropa məkanında öncül mövqeyini saxlayaraq ən təhlükəsiz və sabit dövlətlərdən biri olduğunu qeyd edib.

Bildirilib ki, Daxili İşlər Nazirliyi, Dövlət Təhlükəsizliyi Xidməti və digər hüquq-mühafizə orqanları ilə birgə fəaliyyətin nəticəsi olaraq, cinayətkarlığa qarşı mübarizənin dinamikasında və strukturunda müşahidə edilən müsbət göstəricilər hesabat dövründə də davam edib, 2021-ci ilin birinci yarımilində əməliyyat-axtarış və istintaq fəaliyyətini həyata keçirən bütün dövlət orqanları üzrə 14 min 928 cinayət qeydə alınıb. Bunun yalnız 1 faizini xüsusilə ağır cinayətlər təşkil edib. Əvvəlki illərdən bağlı qalmış 207 cinayətin daxili işlər orqanları ilə birgə açılması təmin edilib, 435 cinayətkar qrup zərərsizləşdirilib.

Həyata keçirilən məqsədyönlü və qabaqlayıcı tədbirlər nəticəsində qəsdən adam öldürmə, qəsdən adam öldürməyə cəhd, qəsdən sağlamlığa az ağır və ağır zərər vurma, oğurluq, soyğunçuluq, quldurluq, xuliqanlıq, yol hərəkəti və nəqliyyat vasitələrinin istismarı qaydalarını pozma, o cümlədən ölümlə nəticələnən yol-nəqliyyat hadisələrinin, vəzifə səlahiyyətləri ilə bağlı cinayətlərin sayı azalıb, cinayətlərin açılması 88,7 faiz təşkil edib.

Narkotik vasitələrin qanunsuz dövriyyəsi, dələduzluq, hədə-qorxu ilə tələb etmə və vergi ödəməkdən yayınma cinayətlərində artım tendensiyası qeydə alınıb ki, bu tendensiyanın səbəbləri təhlil edilməklə qarşısının alınması istiqamətində təxirəsalınmaz tədbirlər görüləcək.

Ümumilikdə ölkə üzrə cəmi 8197 cinayət işinin istintaqı tamamlanıb ki, bunlardan 671-i prokurorluq orqanlarında istintaq edilib. Prokurorluq orqanları tərəfindən 444, ümumilikdə isə digər istintaq qurumları ilə birgə 6399 cinayət işinin ittiham aktları ilə məhkəmələrə göndərilməsi təmin olunub.

Respublika üzrə ibtidai istintaqı tamamlanmış cinayət işləri üzrə ümumilikdə 174 milyon 62 min manat məbləğində maddi ziyan vurulduğu müəyyən edilib. İstintaq tədbirləri ilə onun 51,5 faizinin, yəni 89 milyon 683 min manatlıq hissəsi ödətdirilib. Həmçinin cinayət-prosessual qanunvericiliyinin tələblərinə əsasən, icraatına xitam verilmiş cinayət işləri üzrə cinayət məsuliyyətindən azad olunmuş şəxslər tərəfindən dövlət büdcəsinə əlavə olaraq 668 min 949 manat məbləğində pul vəsaiti ödənilib.

Hesabat dövründə Prezident İlham Əliyevin siyasi fəaliyyətinin prioritet istiqamətlərindən olan korrupsiyaya, rüşvətxorluğa qarşı barışmaz mübarizənin ötən dövrlərdə olduğu kimi davam etdirilərək bu sahədə həyata keçirilmiş kompleks tədbirlərin davamlı və tarazlaşdırılmış iqtisadi inkişafın təmin olunmasına imkan verdiyi diqqətə çatdırılıb.

Bildirilib ki, cari ilin birinci yarımilində korrupsiya hüquqpozmasına yol vermiş 267 şəxs barəsində 155 cinayət işinin istintaqı tamamlanaraq baxılması üçün məhkəmələrə göndərilib, 8 milyon 785 min manat məbləğində ziyan ödətdirilib. Həmçinin cinayət-prosessual qanunvericiliyin tələblərinə əsasən təqsirləndirilən şəxslər tərəfindən dövlət büdcəsinə 1 milyon 952 min manat ödənilməklə 44 milyon manat dəyərində əmlak üzərinə həbs qoyulub.

Həmin cinayət işlərindən 72 şəxs barəsində 25 iş rüşvət alma (passiv rüşvətxorluq), 66 şəxs barəsində 43 iş rüşvət vermə (aktiv rüşvətxorluq) və şəxsi rüşvət verməyə təhrik etmə, 54 şəxs barəsində 30 iş qulluq mövqeyindən istifadə etməklə mənimsəmə və israf etmə, 28 şəxs barəsində 15 iş qulluq mövqeyindən istifadə etməklə dələduzluq, 14 şəxs barəsində 8 iş vəzifə səlahiyyətlərindən sui-istifadə etmə və digər faktlarla əlaqədar olub.

İstintaqı tamamlanaraq baxılması üçün məhkəməyə göndərilmiş cəmiyyətdə rezonans doğurmuş bir sıra cinayət işləri üzrə təqsirkar şəxslərin, o cümlədən ləğv olunmuş Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru vəzifəsində işləmiş Vüqar Səfərli, Kürdəmir Rayon İcra Hakimiyyətinin sabiq başçısı Ceyhun Cəfərov, “Yeni Klinika” tibb müəssisəsinin direktoru Pərviz Abbasov və digərlərinin korrupsiya hüquqpozmaları törətməsinə əsaslı şübhələr müəyyən edilməklə məhkəmə məsuliyyətinə veriliblər.

2021-ci ilin birinci yarımili ərzində Baş idarədə fəaliyyət göstərən 161 saylı “Qaynar xətt” əlaqə mərkəzinə daxil olmuş müraciətlərin 34-ü üzrə Cinayət Məcəlləsinin müxtəlif maddələri ilə cinayət işləri başlanıb, digərləri üzrə prokuror təsir tədbiri aktlarından istifadə edilməklə aidiyyəti qurumlarla əlaqəli şəkildə qabaqlayıcı tədbirlərin görülməsi təmin olunub.

Bu müddət ərzində Baş İdarənin əməliyyat qurumları tərəfindən həyata keçirilən əməliyyat tədbirləri nəticəsində 29 şəxs cinayət başında yaxalanıb, əməliyyat üsul və vasitələrindən istifadə etməklə korrupsiya hüquqpozmaları barədə əldə edilmiş məlumatlar əsasında 60 cinayət işi başlanıb.

Bu ilin birinci yarımili ərzində Baş İdarə korrupsiya ilə mübarizədə beynəlxalq təşkilatların tövsiyələrinin, müvafiq konvensiyaların müddəalarının yerinə yetirilməsi, bu sahədə digər ölkələrin uğurlu təcrübələrinin və əldə olunmuş nailiyyətlərinin öyrənilməsi, qarşılıqlı təcrübə mübadiləsinin, ikitərəfli və çoxtərəfli tədbirlərin keçirilməsi, habelə antikorrupsiya qanunvericiliyinin təkmilləşdirilməsi və ümumilikdə beynəlxalq əməkdaşlığın inkişaf etdirilməsi istiqamətində bir sıra mühüm tədbirlər görülüb.

Belə ki, mayın 17-31-də İqtisadi Əməkdaşlıq və İnkişaf Təşkilatı (OECD) tərəfindən ölkəmizin 5-ci raund pilot qiymətləndirilməsi prosedurunun növbəti mərhələsi kimi virtual müsahibələr keçirilməklə ölkəmizin korrupsiyaya qarşı mübarizə strategiyası fonunda iqtisadiyyat, prokurorluq və məhkəmə orqanlarının fəaliyyəti də daxil olmaqla 13 fərqli mövzu üzrə müsahibələr aparılıb, ekspert heyətinin sualları müvafiq qurumların nümayəndələri tərəfindən cavablandırılıb.

Bundan başqa, iyunun 2-4-də Azərbaycan Respublikası Baş prokurorunun rəhbərlik etdiyi nümayəndə heyəti BMT Baş Assambleyasının korrupsiyanın qarşısının alınması, onunla mübarizə və beynəlxalq əməkdaşlığın gücləndirilməsinə həsr olunmuş xüsusi sessiyasında iştirak etməklə BMT-nin nümayəndələrinin, Korrupsiya əleyhinə Konvensiyaya tərəf olan digər ölkələrin dövlət və hökumət başçıları, o cümlədən digər yüksək vəzifəli şəxslərinin iştirak etdiyi tədbirdə məruzə ilə çıxış edilib.

Baş Prokurorluğun İstintaq idarəsi tərəfindən Vətən müharibəsi gedişində Ermənistan silahlı qüvvələri tərəfindən törədilmiş cinayət əməlləri üzrə 68 cinayət işi üzrə ibtidai istintaqın aparıldığı, həmin işlər üzrə 8 şəhər, 10 qəsəbə və 519 kəndə baxış keçirildiyi bildirilib.

Müşavirədə ötən illərdən bağlı qalmış, qeyri-aşkar şəraitdə törədilmiş qəsdən adam öldürmə və digər xüsusilə ağır cinayətlərin daxili işlər və dövlət təhlükəsizliyi orqanları ilə birgə keçirilmiş peşəkar istintaq-əməliyyat tədbirləri ilə açılması təmin edilməklə təqsirli şəxslərin məhkəmə məsuliyyətinə verildiyi qeyd edilib.

2021-ci ilin birinci yarımilində Respublika Hərbi Prokurorluğu tərəfindən Müzəffər Ali Baş Komandan İlham Əliyevin ordu quruculuğu sahəsində tapşırıqlarının icrası ilə əlaqədar Müdafiə Nazirliyi, Sərhəd Qoşunları və digər qurumlarla birlikdə zəruri tədbirlərin görüldüyü, bu müddətdə erməni silahlı birləşmələrinin qanunsuz əməlləri ilə bağlı 63 cinayət işi üzrə ibtidai istintaqın davam etdirilməklə “Yerkrapa” silahlı birləşməsinin üzvləri Lüdvik Mkrtiçyan və Alyoşa Xosrovyan barəsində cinayət işinin məhkəməyə göndərildiyi diqqətə çatdırılıb.

Hesabat dövründə dövlət təhlükəsizliyi orqanlarının istintaq, təhqiqat və əməliyyat-axtarış fəaliyyətində qanunların icrasına nəzarət üzrə də zəruri işlər görüldüyü qeyd edilməklə Ermənistan Respublikası vətəndaşı olan terrorçu-diversant dəstələrin 53 üzvünün təqsirləndirilmələrinə dair 3, Livan Respublikasının vətəndaşı Viken Eulcekcian və Rusiya Federasiyasının vətəndaşı Eduard Dubakovun və digərlərinin, ümumilikdə 57 şəxs barəsində 6 cinayət işinin ibtidai istintaqının peşəkarlıqla aparılıb tamamlanaraq məhkəməyə göndərildiyi bildirilib. Məhkəmə baxışları davam edən həmin işlər üzrə dövlət ittihamının peşəkarcasına müdafiəsinin aparılması təmin olunmaqla toplanmış sübutlar əsasında təqsirli şəxslərə layiqli cəzanın verilməsinin tələb ediləcəyi vurğulanıb.

Eyni zamanda, qanunsuz erməni hərbi birləşmələrinin təcavüzü nəticəsində törədilmiş cinayətlər üzrə intensiv və hərtərəfli istintaqın aparıldığı diqqətə çatdırılmaqla toplanmış sübutlarla təqsiri müəyyən edilmiş şəxslərin beynəlxalq müstəvidə və yerli məhkəmələr tərəfindən məsuliyyətə cəlb olunması istiqamətində zəruri tədbirlərin icrasının davam etdirildiyi bildirilib.

Əməliyyat müşavirəsində Naxçıvan Muxtar Respublikası Prokurorluğunda cinayətkarlığa və hüquq pozuntularına qarşı mübarizə sahəsində digər hüquq mühafizə orqanları ilə əlaqəli şəkildə uğurlu göstəricilər əldə olunduğu, istintaq, təhqiqat və əməliyyat-axtarış fəaliyyətinə nəzarətin gücləndirildiyi, vətəndaşların müraciətlərinə baxılmasının diqqətdə saxlanıldığı qeyd edilib.

Hesabat dövründə cinayət təqibindən kənar icraatlar sahəsində inzibati xəta haqqında protokol tərtib etmək səlahiyyətinə malik qurumlarla işgüzar əlaqələrin qurulması təmin olunmaqla 70 şəxs barəsində inzibati xəta haqqında iş üzrə icraatın başlanması haqqında qərar qəbul edilib. Həmçinin mülki mühakimə icraatı qaydasında və yetkinlik yaşına çatmayanların işləri üzrə məhkəmələrdə baxılmış işlər üzrə 4 nəfərin valideynlik hüquqlarının məhdudlaşdırılmasına dair məhkəmələrdə iddialar qaldırılıb, qanunsuz rəftara, əzab və işgəncələrə məruz qalmaları ilə əlaqədar 6 uşaq sığınacaq və körpələr evinə yerləşdirilib.

Prokurorluq orqanlarının beynəlxalq nüfuzunun artırılması istiqamətində xarici ölkələrin müvafiq orqanları və beynəlxalq təşkilatlarla əlaqələr genişlənib, Baş Prokurorluğun Beynəlxalq hüquqi əməkdaşlıq idarəsinin həyata keçirdiyi tədbirlərlə ağır və xüsusilə ağır cinayətlərdə ittiham olunan 12 nəfər təqsirləndirilən şəxsin ölkə xaricindən ekstradisiyası təmin olunub.

Əməliyyat müşavirəsində qeyd edilib ki, hesabat dövründə xidməti, icra və əmək intizamının daha da möhkəmləndirilməsi, fəaliyyətlərində qanunsuzluq hallarına və prokurorluq işçisinə yaraşmayan hərəkətlərə yol verən işçilərə münasibətdə tələbkarlıq artırılıb, aparılmış xidməti yoxlamalar nəticəsində müxtəlif xətalar törətdiklərinə görə 17 prokurorluq əməkdaşı intizam məsuliyyətinə cəlb edilib.

Hesabat dövründə kadr işinin düzgün təşkili və onun müasir standartlar səviyyəsində daha da təkmilləşdirilməsi, kadrların seçilib yerləşdirilməsi, vəzifədə irəli çəkilməsi, “Prokurorluğa işə qəbul olunmaq üçün namizədlərlə müsabiqə keçirilməsi qaydaları haqqında” Əsasnamənin tələblərinə müvafiq olaraq müvəffəqiyyət əldə etmiş 100 namizədin təyinatlarının aparılması nəticəsində müsabiqə yolu ilə qulluğa qəbul edilmiş gənc prokurorluq işçilərinin prokurorluğun kadr korpusunun 78 faizini təşkil etməsinin ölkəmizdə dövlət gənclər siyasətinin reallaşdırılmasının müsbət nəticəsi kimi dəyərləndirilib.

Cari ilin birinci yarımilində Azərbaycan Respublikası Prokurorluğunun başlıca fəaliyyət istiqamətlərindən olan ölkəmizin hüquq ictimaiyyəti, aparıcı elm və təhsil müəssisələri, hüquq mühafizə orqanları akademiyaları ilə əməkdaşlıq əlaqələrinin daha da inkişafına töhfə verən Baş Prokuror yanında Elmi-Məsləhət Şurasının növbəti iclasları keçirilməklə geniş müzakirələr və faydalı fikir mübadiləsinin aparıldığı diqqətə çatdırılıb.

Qeyd edilib ki, dövlətimizin başçısının dəstəyi ilə prokurorluq orqanları əməkdaşlarının və veteranlarının sosial müdafiəsinin gücləndirilməsi istiqamətində həyata keçirilən kompleks və ardıcıl tədbirlər davam etdirilməklə Azərbaycan Respublikası Prokurorluğunun fəaliyyətinin müasirləşdirilməsinə dair Dövlət Proqramının icrası ilə əlaqədar inşa edilmiş paytaxtın Xətai rayonu ərazisində 160 mənzilli yaşayış kompleksi istifadəyə verilməklə prokurorluq əməkdaşları və veteranlarından ibarət kooperativ üzvləri güzəştli şərtlərlə mənzillərlə təmin ediliblər.

Müşavirədə cari ilin aprelində təsis edilmiş “Azərbaycan Respublikası Prokurorluq Orqanlarının Veteran və Pensiyaya Çıxmış İşçiləri” İctimai Birliyi ilə əlaqələrin genişlənməsinin, sabiq prokurorluq əməkdaşlarının təcrübəsindən və peşə bacarıqlarından istifadənin əhəmiyyəti vurğulanıb.

Əməliyyat müşavirəsində hesabat dövrü ərzində görülmüş müsbət işlərlə yanaşı, fəaliyyət istiqamətləri üzrə işin səmərəliliyinə mənfi təsir göstərən hallar Baş Prokurorluğun müvafiq struktur qurumlarının rəhbərlərinin iştirakı ilə ətraflı təhlil olunmaqla, istintaq işi və ibtidai araşdırmaya prosessual rəhbərliyin həyata keçirilməsi, hüquqi və fiziki şəxslərə vurulmuş zərərin ödənilməsi, vətəndaş müraciətlərinə baxılması və onların qəbulu ilə əlaqədar işin təşkilinin daim diqqət mərkəzində saxlanılması istiqamətində zəruri tədbirlərin görülməsi tələb olunub.

Xüsusilə Azərbaycan Respublikasının ərazi bütövlüyü uğrunda şəhid olmuş və itkin düşmüş şəxslərin ailə üzvlərinin, yaxın qohumlarının, o cümlədən sağlamlığını itirmiş vətəndaşlarımızın müraciətlərinə təxirəsalınmadan baxılmaqla, onların dərhal qəbul edilmələrinin təmin edilməsi, bu kateqoriyadan olan şəxslərə diqqət göstərilməsinin vacibliyi vurğulanıb.

Baş Prokurorluğun əlaqədar struktur qurumları və müvafiq tabe prokurorlar tərəfindən daxili işlər orqanları ilə əlaqəli şəkildə cari ilin birinci yarımilinin nəticələrinə görə artımı müşahidə olunan cinayətlərin profilaktikası istiqamətində zəruri tədbirlərin görülməsi, eyni zamanda, cəzanın labüdlüyü prinsipinin təmin edilməsi məqsədilə bağlı qalmış cinayətlərin açılması və təqsirkar şəxslərin cinayət məsuliyyətinə cəlb olunması üçün müvafiq tədbirlərin görülməsinin zəruriliyi diqqətə çatdırılıb.

Eyni zamanda, cari hesabat dövründə də koronavirus infeksiyasının yayılmasına qarşı mübarizə tədbirləri ilə əlaqədar prokurorluq orqanları tərəfindən yerli polis, digər hüquq-mühafizə, icra orqanları və tibb müəssisələri ilə əlaqəli surətdə həyata keçirilən tədbirlərin davam etdirilməklə əhalinin peyvəndlənməsinin aparılması, eləcə də toy-nişan şənliklərinin keçirilməsi zamanı Nazirlər Kabineti yanında Operativ Qərargahın tələblərinə əməl olunması, əhalinin sanitariya-epidemioloji salamatlığının qorunmasının hüquqi vasitələrlə təmini sahələrində prokuror nəzarəti tədbirlərinin gücləndirilməsinin əhəmiyyəti qeyd edilib.

Müşavirədə intihar və intihara cəhd hadisələrinin minimuma endirilməsi və qarşısının alınması istiqamətində zəruri tədbirlərin görülməsinin vacibliyi diqqətə çatdırılmaqla iyunun 23-də Baş Prokurorluğun təşkilatçılığı ilə dövlət qurumların nümayəndələrinin iştirakı ilə keçirilmiş yüksək səviyyəli konfransın yekunu üzrə qurumlararası İşçi qrupun yaradılmasının bu sahədə nəticələr əldə etməyə imkan verəcəyinə əminlik ifadə olunub.

Bununla yanaşı, sintetik və təbii mənşəli narkotik vasitələrin, psixotrop maddələrin və onların prekursorlarının qanunsuz dövriyyəsi, hazırlanması ilə bağlı cinayətlər üzrə ibtidai araşdırma və əməliyyat-axtarış fəaliyyəti üzərində prokuror nəzarəti gücləndirilməklə, cəza tədbirləri ilə yanaşı, xüsusilə gənclər arasında istehlakının təbliğ edilməsi hallarının qarşısının alınması istiqamətində daxili işlər orqanları ilə birlikdə maarifləndirmə işlərinin genişləndirilməsinin və digər zəruri tədbirlərin həyata keçirilməsinin vacibliyi qeyd edilib.

Eyni zamanda, narkotik vasitələrin, psixotrop maddələrin və prekursorlarının qanunsuz dövriyyəsi ilə bağlı müvafiq normativ aktların, həmçinin digər sahələr üzrə qanunvericiliyin təkmilləşdirilməsinə dair layihələrin hazırlanaraq aidiyyəti üzrə təqdim edildiyi bildirilib.

Müşavirədə, həmçinin qaz sızması və partlayışı, dəm qazı ölümü və sağlamlığa zərər vurulması hallarının qarşısının alınması istiqamətində İnzibati Xətalar Məcəlləsində, “Qaz təchizatı haqqında” Qanunda və digər aidiyyəti normativ hüquqi aktlarda dəyişikliklərin edilməsini nəzərdə tutan layihələrin hazırlandığı bildirilib. Bu kimi hadisələrin baş verməsinə səbəb olan halların aradan qaldırılması üçün məqsədyönlü tədbirlərin görülməsinin önəmi diqqətə çatdırılıb.

Əməliyyat müşavirəsində prokurorluğun fəaliyyətində səmərəliliyin artırılmasında mühüm rol oynayacaq “Elektron prokurorluq” informasiya sisteminin tətbiqi istiqamətində Azərbaycan Respublikası Prezidentinin 2021-ci il 7 may tarixli Fərmanından irəli gələn vəzifələrin qısa müddətdə icrasının əhəmiyyəti qeyd olunub.

Daha sonra Baş prokurorun birinci müavini Elçin Məmmədov, Baş prokurorun müavinləri Elmar Camalov və Heydər Məmmədovun hesabat dövründə görülmüş işlərə və qarşıda duran vəzifələrə dair çıxışları dinlənilib, fikir mübadiləsi aparılıb.

Əməliyyat müşavirəsinə yekun vuran Baş prokuror Kamran Əliyev Azərbaycan Respublikasının Prezidenti İlham Əliyevin rəhbərliyi ilə ölkəmizdə həyata keçirilən uğurlu dövlətçilik siyasətini hərtərəfli dəstəkləyən prokurorluq orqanlarının digər hüquq-mühafizə orqanları ilə əlaqəli şəkildə ictimai-siyasi sabitliyin və əmin-amanlığın qorunması, cinayətkarlığa qarşı mübarizənin gücləndirilməsi, insan hüquq və azadlıqlarının etibarlı müdafiəsi üçün bundan sonra da zəruri tədbirlər görəcəyinə əminliyini ifadə edib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.