Güləşçimiz Elman Muxtarov bürünc medal uğrunda görüşdə Ermənistan təmsilçisi Roman Amoyan ilə qarşılaşıb. Yüksək əzmkarlıq nümayiş etdirən atletimiz ermənistanlı rəqibini 9:1 hesabı ilə məğlub edərək birinci Avropa Oyunlarının güləş yarışlarında Azərbaycana ilk medalı qazandırıb.

19:43

Birinci Avropa Oyunlarının ilk gününün bütün finalçıları müəyyənləşib. Belə ki, rusiyalı Stepan Maryanyan (59 kq) Bolqarıstan idmançısı Soslan Daurov, Avropa çempionu Rəsul Çunayev (71 kq) macarıstanlı Balint Korpasi, dünya kubokunun sahibi Rafiq Hüseynov (80) Rusiya güləşçisi Yevgeni Saleev, ukraynalı Dmitri Timçenko (98 kq) rusiyalı İslam Moqamedovla üz-üzə gələcəklər.

13:53

Azərbaycan güləşçisi Rafiq Hüseynov üçüncü görüşünü də qələbə ilə başa vurub. Türkiyəli Selçuk Cebi ilə qarşılaşan dünya kubokunun sahibi qızıl medal uğrunda Yevgeniy Saleyev (Rusiya) - Viktor Sasunouski (Belarus) görüşünün qalibi ilə qarşılaşacaq.

13:35

Rəsul Çunayev birinci Avropa Oyunlarının finalına vəsiqə qazanıb. Bolqarıstanlı Svilen Kostadinova 1 dəqiqə 58 saniyədə qalib gələn Avropa çempionumuz həlledici görüşdə Mindia Tsulukidze (Gürcüstan) - Balint Korpasi (Macarıstan) görüşünün qalibi ilə yarışacaq.

12:59

Rəsul Çunayev növbəti qələbəsini qazanıb. Xorvatiya güləşçisi Dominik Etlingerə qalib gələn Avropa çempionu və dünya çempionatının bürünc mükafatçısı yarımfinalda bolqarıstanlı Svilen Kostadinov ilə üz-üzə gələcək.

12:46

Elman Muxtarov birinci Avropa Oyunlarında ikinci qələbəsini qazanıb. Pəhləvanımız dörddəbir final mərhələsində Stiq-Andre Berqeyə (Norveç) qalib gələrək yarımfinala yüksəlib.

Güləşçimiz finala gedən yolda Roman Amoyan (Ermənistan) - Stepan Mayanyan (Rusiya) qarşılaşmasının qalibini məğlub etməlidir.

Azərbaycan güləşçisi Rafiq Hüseynov da ikinci görüşünü tam üstünlüklə başa vurub. Daniel Aleksandrovdan (Bolqarıstan) üstün olan Avropa çempionu və dünya kubokunun sahibi yarımfinalda türkiyəli Selçuk Cebi ilə qarşılaşacaq.

12:23

Orxan Nuriyev növbəti qələbəsini qazanıb. Güləşçimiz Litva idmançısı Vilius Laurinaitisdən üstün olub və dörddəbir finala adlayıb. O, növbəti mərhələdə İslam Maqomedov (Rusiya) - Ardo Arusaar (Estoniya) qarşılaşmasının qalibi ilə yarışacaq.

11:44

Azərbaycan güləşçilərinin hamısı turnirə qələbə ilə başlayıblar. Rafiq Hüseynov da komanda yoldaşlarının uğurunu təkrarlayaraq, avstriyalı Mixael Vaqnerə tam üstünlüklə 1 dəqiqə 37 saniyədə qalib gəlib. 

Güləşçimiz dörddəbir finalda Bozo Straçeviç (Xorvatiya) - Daniel Aleksandrov (Bolqarıstan) mübarizəsinin qalibi ilə yarışacaq.

11:25

Heydər Əliyev adına İdman Sarayında tamaşaçılara növbəti qələbə sevincini Rəsul Çunayev yaşadıb. Moldovalı Daniel Kataqaranı məğlub edən güləşçimiz idmansevərlərin hərarətli alqışları ilə qarşılanıb.

Növbəti mərhələdə onun rəqibi Xorvatiya güləşçisi Dominik Etlinger olacaq.

11:23

Azərbaycanın daha bir güləşçisi də turnirə qələbə ilə başlayıb. Elman Muxtarov gürcüstanlı rəqibi Giza Meladzeni 5:3 hesabı ilə məğlub edərək növbəti mərhələyə adlayıb.

O, dörddəbir finalda norveçli Stiq-Andre Berqe ilə üz-üzə gələcək. 

11:08

Turnirdə 98 kiloqram çəki dərəcəsində mübarizə aparan Orxan Nuriyev ilk görüşünü isveçli Teodoros Tunisidisə qarşı keçirib. Gərgin idman mübarizəsi şəraitində keçən görüşdə güləşçimiz qalib gələrək səkkizdəbir finala yüksəlib.

Orxan Nuriyev növbəti mərhələdə Litva idmançısı Vilius Laurinaitis ilə qarşılaşacaq.

X X X

10:12:00

Bakı, 13 iyun, Səxavət Quliyev, Rəşad İsmayılov, AZƏRTAC

“Bakı-2015” birinci Avropa Oyunları davam edir.

AZƏRTAC xəbər verir ki, bu mötəbər turnirin ikinci günündə - iyunun 13-də Heydər Əliyev adına İdman Sarayında güləş yarışlarına start verilib. Xalça üzərində 59, 71, 80 və 98 kiloqram çəki dərəcələrində yunan-Roma güləşçiləri güclərini sınayacaqlar.

Yarışda mübarizə aparacaq güləşçilərimizin ilk rəqibləri müəyyənləşib. Elman Muxtarov (59 kq) gürcüstanlı Gizo Meladze, Rəsul Çunayev (71 kq) Moldova təmsilçisi Daniel Kataqara, Rafiq Hüseynov (80 kq) avstriyalı Mixael Vaqner, Orxan Nuriyev (98 kq) isə isveçli Teodoros Tunisidis ilə qarşılaşacaqlar.

“Bakı-2015”-in proqramına güləşin hər üç növü üzrə yarışlar daxil edilib. Ümumilikdə 24 çəki dərəcəsində qaliblər müəyyənləşəcək. Yarışların ilk iki günündə yunan-Roma güləşçiləri mübarizə aparacaqlar. İyunun 15-16-da qadın güləşçilər, 17-18-də isə sərbəst güləşçilər yarışacaqlar.