RƏSMİ XRONİKA
ÇARLZ UOLD: ABŞ AZƏRBAYCANLA HƏRBİ SAHƏDƏ ƏMƏKDAŞLIĞIN YÜKSƏK SƏVİYYƏYƏ QALXMASINI ARZULAYIR
AZƏRBAYCAN PREZİDENTİ İLHAM ƏLİYEV ABŞ-IN AVROPA KOMANDANLIĞININ QƏRARGAH RƏİSİNİN MÜAVİNİNİ QƏBUL ETMİŞDİR
Prezident İLHAM ƏLİYEV qonaqları səmimiyyətlə qarşılayaraq dedi:
-Hörmətli cənab general!
Hörmətli qonaqlar, mən sizin hamınızı ürəkdən salamlayıram, Azərbaycana xoş gəlmisiniz.
Amerika Birləşmiş Ştatları ilə münasibətlərimiz sürətlə inkişaf edir. Bütün sahələrdə uğurlu əməkdaşlıq edirik və əminəm ki, bu əməkdaşlıq gələcəkdə də davam edəcəkdir. İqtisadi sahədə, energetika sektorunda ölkələrimiz arasında münasibətlər dünya və region üçün böyük əhəmiyyət kəsb edir. Amerika Birləşmiş Ştatlarının dəstəyi ilə regionda irimiqyaslı, region və dünya üçün böyük əhəmiyyətə malik layihələr həyata keçirilir.
Eyni zamanda, hərbi sahədə də əməkdaşlığımız çox uğurludur. Azərbaycan Amerika Birləşmiş Ştatları ilə bir koalisiyada dünyada sülhün və təhlükəsizliyin təmin olunmasında iştirak edir. Xüsusilə terrorizmə qarşı mübarizədə ölkələrimiz fəal əməkdaşlıq edir və bu, gələcəkdə də davam edəcəkdir. Azərbaycan terrorizmdən zərər çəkmiş bir ölkədir. Ölkəmizin ərazisində erməni terrorçu təşkilatları tərəfindən 30-dan çox terror aktı törədilmişdir və bunun nəticəsində 2000-dən yuxarı Azərbaycan vətəndaşı həlak olmuşdur.
Ermənistan-Azərbaycan, Dağlıq Qarabağ münaqişəsi ümumilikdə region üçün böyük təhlükədir. Biz ümidvarıq ki, ATƏT-in Minsk qrupunun həmsədri kimi Amerika Birləşmiş Ştatları bu münaqişənin həll olunmasında gələcəkdə də fəal rol oynayacaq və tezliklə bu problem beynəlxalq hüquq normaları əsasında öz həllini tapacaqdır.
Bir daha Sizi ürəkdən salamlayıram. Əminəm ki, burada keçirdiyiniz görüşlər ölkələrimiz arasında mövcud olan dostluq və mehribanlıq münasibətlərini, ikitərəfli əməkdaşlığı daha da gücləndirəcək və inkişaf etdirəcəkdir.
Səmimi qəbula görə Azərbaycan Prezidenti İlham Əliyevə təşəkkürünü bildirən general ÇARLZ UOLD dedi:
-Cənab Prezident, çox sağ olun. Vaxt ayırıb bizimlə görüşməyiniz bizim üçün başucalığıdır. Bu yaxınlarda seçkilərdə qazandığınız qələbə münasibətilə Sizi təbrik edirəm. Həm Avropa Komandanlığının Qərargah rəisi general Consonun adından, həm də öz adımdan Sizin atanızın tezliklə sağalmasını arzu edirik.
Mən Amerika Birləşmiş Ştatlarının hərbi komandanlığının xüsusi minnətdarlığını Sizə çatdırıram. Çox sağ olun ki, həm Balkanlarda, həm Əfqanıstanda, həm də İraqda əməliyyatlar zamanı sizin hərbçilər bizimlə birlikdə çalışmışlar. Ümidvarıq ki, bu əməkdaşlıq gələcəkdə də davam etdiriləcəkdir. Əlbəttə, Sizinlə tam razıyıq ki, Dağlıq Qarabağ münaqişəsi sülh yolu ilə və beynəlxalq hüquq normaları əsasında tezliklə həll olunmalıdır.
Biz ölkələrimizin hərbi qüvvələri arasında əməkdaşlığın daha yüksək səviyyəyə qalxmasını arzulayırıq. Sizin nazirinizlə bu haqda daim söhbətlərimiz olur. Bu söhbətlər, əsas etibarilə, regional və Xəzər dənizindəki təhlükəsizlik mövzusunda olur.
Cənab Prezident, biz tezliklə Azərbaycana hərbi sahədə yardım etməyi düşünürük. Elə başa düşürəm ki, bizim edəcəyimiz yardım regional təhlükəsizlik baxımından çox əhəmiyyətli olacaqdır. Yəqin Sizə məlumdur ki, Amerika Birləşmiş Ştatları Qazaxıstanda bu cür təşəbbüs göstəribdir. Eynilə Azərbaycana da bu yardımı etmək fikrindəyik. Biz, ilk növbədə, Xəzər dənizinin və ümumiyyətlə, regionun təhlükəsizliyini nəzərdə tuturuq. Düşünürəm ki, həm hökumət, həm də hərbi sahə bununla çox maraqlanır. Bu, bir model olacaqdır. Həmin modelə əsasən, biz Xəzər dənizində həm suüstü, həm sualtı məkana, həm də ki, hava məkanına eyni vaxtda nəzarət edə biləcəyik. Lazımi anda oradan yüksək komandanlığa məlumat çatdırılacaqdır. Düşünürəm ki, bu həm regionun, həm də dünyanın təhlükəsizliyi üçün vacib bir modeldir. Biz yanvar ayında bu işə başlamağı nəzərdə tutmuşuq.
Siz yəqin ki, digər bir proqramdan da xəbərdarsınız. Biz Gürcüstanda belə bir proqram həyata keçirmişdik. Bu proqram ”Gürcüstan treninq və təchizat ” proqramı adlanır. Həmin proqrama əsasən, biz Gürcüstanda işləmişik. Daha sonra isə onların müdafiə naziri bizim müdafiə nazirimiz cənab Ramsfeldə məktubla müraciət etmişdi. Bu əməkdaşlıq daha da genişlənəcəkdir. Ümumiyyətlə, bu proqram dünyada əhəmiyyət kəsb etməyə başlayan ölkələr üçün nəzərdə tutulmuşdur. Azərbaycanın da bu mənada rolu çox böyükdür. Elə hesab edirik ki, biz Sizinlə bu sahədə də əməkdaşlıq edəcəyik.
Bizimlə görüşə vaxt ayırdığınıza görə Sizə bir daha minnətdarlığımı bildirmək istəyirəm. Seçkilərdə qazandığınız qələbə münasibətilə Sizi bir daha təbrik edirəm və ölkənizə ən xoş arzularımı yetirmək istəyirəm. Ümidvar olmaq istədiyimi bildirirəm ki, Sizin liderliyinizlə ölkənizdə yeni dövr başlanacaqdır. Bu dövrdə münasibətlərimiz də yüksək səviyyədə olacaqdır.
İLHAM ƏLİYEV: Təşəkkür edirəm, xoş sözlərinizə görə sizə minnətdaram. Siz düzgün qeyd etdiniz ki, Azərbaycan Amerika Birləşmiş Ştatları ilə hərbi sahədə əməkdaşlıq edir. Azərbaycan etibarlı tərəfdaşdır. Balkanlarda, Əfqanıstanda, İraqda bizim əməkdaşlığımız davam edir və bilirsiniz ki, bu, bizim Prezidentimiz Heydər Əliyevin siyasətidir. Azərbaycanda bu siyasət davam etdiriləcəkdir.
Bildiyiniz kimi, regionda sabitlik, təhlükəsizlik tam mənada bərqərar olunmayıbdır. Buna görə də Azərbaycan öz müdafiə potensialını gücləndirmək əzmindədir. Əlbəttə ki, bu baxımdan ikitərəfli əməkdaşlıq və gələcəkdə göstəriləcək yardımlar bizim üçün çox əhəmiyyətlidir.
X X X
Görüşdə Azərbaycanın müdafiə naziri, general-polkovnik Səfər Əbiyev və ABŞ-ın respublikamızdakı səfiri Rino Harniş iştirak edirdilər.