ELM VƏ TƏHSİL


Coğrafi informasiya sistemlərinin tətbiq sahələri üzrə tədqiqatlar aparılır

Bakı, 16 iyul, AZƏRTAC

AMEA İnformasiya Texnologiyaları İnstitutunda coğrafi informasiya sistemlərinin tətbiq sahələri üzrə tədqiqatlar aparılır.

Bu barədə AZƏRTAC-a institutdan bildirilib. İnstitutun elmi seminarında Anar Səmidov rəhbərlik etdiyi struktur bölmənin 6 ay ərzindəki elmi-tədqiqat və praktiki fəaliyyətindən danışıb. O, cari ildə “İntellektual elektron dövlətin formalaşması və inkişafı problemləri” və “Coğrafi informasiya sistemlərinin (CİS) tətbiq sahələri və inkişaf perspektivləri” üzrə aparılmış tədqiqatlar və bu mövzularda hazırlanmış məqalələr haqqında məlumat verib.

Məruzəçi bildirib ki, şöbədə internet mühitində reklam-marketinq fəaliyyətinin səmərəliyinin artırılması üçün metod və alqoritmlər işlənilir. Onlayn reklam-marketinq sahəsi üzrə araşdırmalar aparılaraq xarici dövlətlərin təcrübəsi, Azərbaycandakı vəziyyət, pandemiyanın dünyada marketinqə təsiri və s. araşdırılır. Həmçinin Azərbaycanda su ehtiyatlarının idarə olunması sistemlərində CİS texnologiyalarının tətbiqi araşdırılır, analiz, modelləşdirmə və tətbiq imkanları öyrənilir.

A.Səmidov qeyd edib ki, şöbə əməkdaşları “ağıllı şəhər” və “ağıllı kənd” layihələrinin reallaşdırılmasında CİS texnologiyalarının tətbiqi və Azərbaycanın işğaldan azad edilmiş ərazilərinin “ağıllı şəhər” və “ağıllı kənd” konsepsiyaları əsasında sürətlə bərpa edilməsi ilə bağlı qəzet və jurnallarda çıxış ediblər. O, rəhbərlik etdiyi şöbənin elmmetrik göstəricilərini də diqqətə çatdırıb.

Sonda hesabata dair müzakirələr aparılıb.

AMEA-nın vitse-prezidenti, institutun direktoru, akademik Rasim Əliquliyev 6 aylıq hesabat ilə bağlı təklif və tövsiyələrini səsləndirib, şöbədə coğrafi informasiya sistemlərinə dair aparılan araşdırmaları yüksək qiymətləndirib. Hazırda dünya ölkələrinin potensialının 3D texnologiyalarının inkişafı ilə ölçüldüyünü söyləyən R.Əliquliyev bu istiqamətdə tədqiqatların daha da dərinləşdirilməsi və elmi seminarların keçirilməsinin məqsədəuyğun olduğunu vurğulayıb.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.