SİYASƏT
“Dayanıqlı sülhün təmin edilməsində çoxtərəfliliyin artan əhəmiyyəti” mövzusunda videokonfrans keçirilib
Bakı, 23 sentyabr, AZƏRTAC
UNESCO üzrə Azərbaycan Respublikası Milli Komissiyasının Daimi Katibliyi və Azərbaycan Respublikasının Prezidenti yanında Dövlət İdarəçilik Akademiyasının təşkilatçılığı, təhsil müəssisəsinin müəllim və tələbə heyətinin iştirakı ilə 21 sentyabr - Beynəlxalq Sülh Gününə həsr edilmiş “Dayanıqlı sülhün təmin edilməsində çoxtərəfliliyin artan əhəmiyyəti” mövzusunda videokonfrans keçirilib.
AZƏRTAC xəbər verir ki, tədbirdə çıxış edən Xarici İşlər Nazirliyinin xüsusi tapşırıqlar üzrə səfiri, UNESCO üzrə Milli Komissiyanın Baş katibi Elnur Sultanov Beynəlxalq Sülh Gününün tarixi və qeyd olunmasının əhəmiyyətindən danışıb, qlobal sülhün və təhlükəsizliyin təmin olunmasında çoxtərəfliliyin, beynəlxalq təşkilatların, o cümlədən UNESCO-nun rolu, sülh üçün təhsil və sülh mədəniyyətinin təşviqi sahəsində görülən işlər barədə məlumat verib.
E.Sultanov xalqımızın ulu öndəri Heydər Əliyevin əsasını qoyduğu Azərbaycan-UNESCO münasibətlərinin Azərbaycan Respublikasının Prezidenti İlham Əliyevin rəhbərliyi ilə uğurla davam etdirildiyini söyləyib. O, Azərbaycan Respublikasının Birinci vitse-prezidenti, Heydər Əliyev Fondunun Prezidenti, UNESCO-nun xoşməramlı səfiri Mehriban xanım Əliyevanın Azərbaycan-UNESCO əməkdaşlığının genişləndirilməsində, mədəniyyətlər və dinlərarası dialoq, sülh şəraitində birgəyaşayış və tolerantlıq, mədəni müxtəlifliyin təbliğində müstəsna xidmətlərini vurğulayıb.
Baş katib əsası Azərbaycan Respublikasının Prezidenti İlham Əliyevin təşəbbüsü ilə 2008-ci ildə qoyulmuş “Bakı Prosesi”nin əhəmiyyətindən, ölkəmizin UNESCO çərçivəsində həyata keçirilən layihələrdə iştirakından bəhs edib.
E.Sultanov çıxışında ölkəmizin ərazisinin 20 faizinin Ermənistan tərəfindən işğal olunduğunu, Ermənistanın bölgədə münaqişə ocağı yaradaraq uzun illərdir dayanıqlı sülhə və təhlükəsizliyə ciddi təhdid törətdiyini, Ermənistan-Azərbaycan beynəlxalq sərhədinin Azərbaycanın Tovuz rayonu istiqamətində Ermənistan silahlı qüvvələrinin təxribatlarının Ermənistan rəhbərliyinin əsl niyyətinin sülh yox, təcavüzün davam etdirilməsi olduğunu nümayiş etdirdiyini bildirib. O, həmçinin Ermənistan tərəfindən işğal altında olan ərazilərimizdə mədəni irsin dağıdıldığını, mənimsənildiyini, tarixi və mahiyyətinin dəyişdirildiyini və bu məsələnin tərəfimizdən UNESCO çərçivəsində mütəmadi qaldırıldığını qeyd edib.
UNESCO üzrə Azərbaycan Respublikası Milli Komissiyasının üzvü, Dövlət İdarəçilik Akademiyasının rektoru akademik Urxan Ələkbərov Beynəlxalq Sülh Gününün əhəmiyyəti barədə danışıb, BMT-nin bütün fəaliyyəti və sənədlərinin sülhün yaradılmasına və dayanıqlılığının təmin edilməsinə yönəldiyini qeyd edib, UNESCO-nun sülhün təşviqi sahəsində fəaliyyətindən bəhs edib. O, Ermənistanın ölkəmizə qarşı təcavüzü ilə bağlı BMT Təhlükəsizlik Şurasının qətnamələrini icra etməməsinin bütövlükdə regionun inkişafına maneə olduğunu vurğulayıb. Rektor daha sonra ölkəmizdə tətbiq olunan yeni idarəçilik texnologiyaları, davamlı inklüziv inkişaf səviyyəsi indeksi üzrə reytinq göstəricilərindən bəhs edib, Azərbaycanın resurslardan düzgün istifadə etməsi nəticəsində yüksək göstəricilər əldə etdiyini deyib.
Xarici İşlər Nazirliyinin Beynəlxalq təhlükəsizlik idarəsinin rəisi Yalçın Rəfiyev çıxışında qlobal sülh və təhlükəsizliyə nail olmaq üçün beynəlxalq hüququn norma və prinsiplərinə əməl olunmasının əhəmiyyətindən bəhs edib, sülh və təhlükəsizliyin təminatçısı kimi BMT-nin fəaliyyəti, təşkilat çərçivəsində münaqişələrin həlli ilə bağlı qərarların qəbulu və icrası mexanizmlərinə toxunub, bir çox münaqişələr, o cümlədən Ermənistan-Azərbaycan münaqişəsi üzrə BMT Təhlükəsizlik Şurasının qətnamələrinin qəbul olunduğunu, lakin icra edilmədiyini qeyd edib. Bu xüsusda o, sülh və təhlükəsizliyin təmin edilməsi istiqamətində BMT mandatı çərçivəsində meydana çıxan çətinliklər, eyni zamanda, müasir dövrdə yaranmış yeni təhdidlər, xüsusilə hibrid müharibələr, kibertəhlükəsizlik və informasiya məkanında mübarizənin əhəmiyyətindən danışıb, BMT sistemində islahatlar barədə məlumat verib. Y.Rəfiyev çıxışında digər universal beynəlxalq platforma olan Qoşulmama Hərəkatı və onun sədri qismində ölkəmiz tərəfindən sülhün təmin edilməsi istiqamətində atılan addımlardan bəhs edib.
Dövlət İdarəçilik Akademiyasının Siyasi idarəetmə fakültəsinin dekanı professor Elçin Əhmədov Ermənistan-Azərbaycan münaqişəsi və onun həlli prosesində ölkəmizin mövqeyi, informasiya məkanında Ermənistanın təcavüzkar siyasəti ilə mübarizə, münaqişə ilə bağlı BMT Təhlükəsizlik Şurası tərəfindən qəbul olunmuş qətnamələr, eyni zamanda, BMT sistemində zəruri olan islahatlar barədə danışıb.
Videokonfransın moderatoru, Azərbaycan UNESCO Klublarının koordinatoru Cahangir Hacıyev UNESCO tərəfindən tanınan beynəlxalq günlərin qeyd olunmasının əhəmiyyəti, bu istiqamətdə Azərbaycan UNESCO Klublarının həyata keçirdiyi işlər, məktəblilər arasında Təhsil Nazirliyi ilə birgə keçirilən, Beynəlxalq Sülh Gününə həsr olunmuş rəsm müsabiqəsi, eləcə də Dövlət İdarəçilik Akademiyasında yaradılmış UNESCO Klubunun fəaliyyəti barədə məlumat verib.
Sonda qlobal sülhün təmin edilməsinə müasir təhdidlər, davam edən münaqişələr, ölkəmizin beynəlxalq sülhün təşviqinə töhfəsi barədə müzakirələr aparılıb.