Sumqayıt Dövlət Universitetində görkəmli dövlət xadimi və siyasi xadim, Azərbaycan Respublikasının Prezidentinin yubileyinə həsr olunmuş “Heydər Əliyev və Sumqayıt” mövzusunda elmi-praktik konfrans keçirilmişdir.

Şəhər İcra Hakimiyyətinin başçısı Vaqif Əliyev ümumi iclasın açılışında çıxış edərək dedi ki, dövlətimizin rəhbəri Heydər Əliyevin tərcümeyi-halını dönə-dönə öyrəndikcə, bu böyük insanın şəxsiyyətinin əzəmətini daha dərindən dərk edirik.

Heydər Əliyevin respublikanın rəhbəri olduğu 34 ili ölkəmizin tarixində bütöv bir epoxa kimi səciyyələndirən natiq vurğuladı ki, dövlətimizin başçısının fenomenal şəxsi keyfiyyətləri, çox böyük siyasi təcrübəsi, genişmiqyaslı təfəkkürü, qeyri-adi şəxsiyyəti ona Azərbaycan xalqının ümummilli lideri şöhrəti qazandırmışdır. Ölkənin taleyinin çox böyük təhlükə qarşısında qaldığı o təlatümlü 1993-cü ildə bütün Azərbaycan xalqı respublikaya rəhbərliyi öz üzərinə götürməyi məhz ondan xahiş etdi. Azərbaycanın ən yeni tarixinin salnaməsi beləcə başlandı və bu tarixin də baş qəhrəmanı məhz Heydər Əliyevdir.

Xarici siyasət sahəsindəki bütün nailiyyətlər, ölkədə bərqərar edilmiş sabitlik, iqtisadiyyatda, mədəniyyət və təhsildə qazanılmış uğurlar, milli ordunun yaradılması və təşəkkülü – bunların hamısı Prezident Heydər Əliyevi real siyasətçi kimi parlaq şəkildə səciyyələndirir.

İcra hakimiyyətinin başçısı xüsusi vurğuladı ki, Heydər Əliyevin müxtəlif vaxtlarda 16 dəfə gəldiyi Sumqayıt həmişə onun diqqət mərkəzində olmuşdur. Onun bilavasitə rəhbərliyi ilə şəhərdə kimya, maşınqayırma, yüngül sənaye müəssisələri yaradılmış, sosial-mədəni təyinatlı obyektlər tikilmişdir. Dövlətimizin başçısı sumqayıtlılara daim qayğı göstərir. Onların bir çoxu fəxri adlara və yüksək dövlət mükafatlarına layiq görülmüşdür. Elə indinin özündə Sosialist Əməyi Qəhrəmanları Zəminə Həsənova, Şəmşad Pənahov, Dadaş Dadaşov prezident təqaüdçüləridir.

Respublikamızın rəhbərinin bu yaxınlarda Sumqayıtda keçirdiyi müşavirədəki nitqində səslənən tövsiyə və tapşırıqları Sumqayıta və sumqayıtlılara böyük diqqət və qayğının daha bir sübutudur.

Konfransda “Heydər Əliyev və Azərbaycanda xalqlar dostluğu siyasəti”, “Heydər Əliyev və Azərbaycanda elm və təhsilin inkişafı”, “Heydər Əliyev və gənclər”, “Heydər Əliyev və Sumqayıtın sənayesi”, “Heydər Əliyev və Azərbaycanda dövlət dili siyasəti” mövzularında məruzələr dinlənildi.

Sonra konfrans işini bölmələrdə davam etdirdi.

Elmi-praktik konfransın iştirakçıları Prezident Heydər Əliyevə müraciət qəbul etdilər. Müraciətdə 2003-cü ilin oktyabrında keçiriləcək seçkilərdə Heydər Əliyevin yenidən yekdilliklə Prezidentliyə namizədliyinin irəli sürüləcəyi bildirilir.

Universitetin vestibülündə Prezident Heydər Əliyevin həyat və fəaliyyətindən bəhs edən fotosərgi təşkil olunmuşdu.

Konfransın işində təhsil nazirinin müavini Elmar Qasımov iştirak edirdi.