REGİONLAR
Heydər Əliyev irsinin hərtərəfli tədqiqi gələcək nəsillər üçün böyük mirasdır
Gəncə, 10 may, Elcan Məmmədov, AZƏRTAC
Kəlbəcər Rayon İcra Hakimiyyəti, Yeni Azərbaycan Partiyası Kəlbəcər rayon təşkilatı, Bakı Dövlət Universitetinin Kitabxanaçılıq-informasiya fakültəsi və Mədəniyyət Nazirliyinin Gəncə Regional Mədəniyyət İdarəsinin Kəlbəcər rayonu üzrə nümayəndəliyinin birgə təşkilatçılığı ilə ulu öndər Heydər Əliyevin anadan olmasının 99-cu ildönümünə həsr olunan Respublika konfransı keçirilib.
YAP Kəlbəcər rayon təşkilatından AZƏRTAC-ın bölgə müxbirinə verilən məlumata görə, tədbir iştirakçıları əvvəlcə ulu öndər Heydər Əliyevin abidəsini və şəhidlərin xatirəsinə həsr edilən memorial kompleksi ziyarət ediblər.
Sonra Kəlbəcər Rayon İcra Hakimiyyətinin konfrans zalında Dövlət Himni səsləndirilib, Ümummilli Liderin və torpaqlarımızın ərazi bütövlüyü uğrunda canlarını fəda edən şəhidlərin əziz xatirələri yad olunub.
Respublika konfransını açan Kəlbəcər Rayon İcra Hakimiyyətinin başçısı Azər Qocayev qonaqları salamlayaraq ulu öndər Heydər Əliyevin layiqli davamçısı, Prezident İlham Əliyevin rəhbərliyi ilə Vətən müharibəsində qazandığımız tarixi Zəfərdən bəhs edib. Bildirib ki, bu tarixi qələbə nəticəsində respublikanın yüzlərlə yaşayış məntəqəsində məskunlaşmış kəlbəcərlilərin didərginlik həyatına son qoyulub. Kəlbəcərlilər səbirsizliklə bərpa-quruculuq işləri başa çatdıqdan sonra öz doğma yurdlarına qayıdacaqları günə hazırlaşırlar. Azər Qocayev qeyd edib ki, Vətən müharibəsində 33 kəlbəcərli şəhidlik zirvəsinə ucalıb. Natiq ümummilli lider Heydər Əliyevin Azərbaycan mədəniyyətinin, elm və təhsilinin inkişafındakı misilsiz xidmətlərindən bəhs edib, keçirilən konfransın əhəmiyyətini vurğulayıb.
Yeni Azərbaycan Partiyası Kəlbəcər rayon təşkilatının sədri Həbib Misirov çıxışında bildirib ki, ulu öndər Heydər Əliyev siyasətinin Prezident İlham Əliyevin rəhbərliyi ilə uğurla davam etdirilməsi nəticəsində ölkəmiz dünyanın aparıcı dövlətlərindən birinə çevrilib. 2020-ci ilin 27 sentyabrında düşmənin növbəti təxribatlarına cavab olaraq başlayan və tarixi Zəfərlə başa çatan 44 günlük Vətən müharibəsi nəticəsində qüdrətli Azərbaycan dövləti 30 illik işğala son qoyub, ulu öndər Heydər Əliyevin müqəddəs Ata vəsiyyəti Prezident, Müzəffər Ali Baş Komandan İlham Əliyev tərəfindən həyata keçirilib.
Konfransda BDU-nun Kitabxanaçılıq-informasiya fakültəsinin dekanı, dosent Ələmdar Cabbarlı “Ulu öndər Heydər Əliyev və Azərbaycanda kitab mədəniyyəti”, Kitabşünaslıq və nəşriyyat işi kafedrasının müdiri, dosent Knyaz Aslan “Ulu öndər Heydər Əliyev və gənclərin milli-mənəvi tərbiyəsi”, Kitabşünaslıq və nəşriyyat işi kafedrasının dosenti Rasim Süleymanov “Görkəmli dövlət və ictimai-siyasi xadimlər ulu öndər Heydər Əliyev haqqında” mövzularında məruzə ediblər. Məruzələrdə Ulu Öndərin xalqımızın rifahı naminə göstərdiyi tarixi xidmətlər bir daha diqqətə çatdırılıb, Ümummilli Liderin irsinin hərtərəfli tədqiqinin gələcək nəsillər üçün böyük miras olduğu vurğulanıb.
Tədbirin davamında ustad sənətkar Aşıq Şəmşirin ulu öndər Heydər Əliyevə həsr etdiyi şeirlərin əsasında Mədəniyyət Nazirliyinin Gəncə Regional Mədəniyyət İdarəsinin Kəlbəcər rayonu üzrə nümayəndəliyi tərəfindən hazırlanan “Zərli tac kamallı başa yaraşır” adlı ədəbi-bədii kompozisiya nümayiş etdirilib.
Sonda Bakı Dövlət Universitetinin Elmi Kitabxanası, AMEA-nın Mərkəzi Elmi Kitabxanası, “Elm” Nəşriyyatı və “Akademkitab” Birliyi tərəfindən Kəlbəcər rayonunun Mərkəzləşdirilmiş Kitabxana Sisteminə hədiyyə edilən kitabların sərgisinə baxış keçirilib.