SİYASƏT


Livanda Azərbaycanın Vətən müharibəsi şəhidlərinin xatirəsinə abidə ucaldılıb VİDEO

Qahirə, 8 noyabr, AZƏRTAC

Livanın Kavaşa qəsəbəsində Azərbaycanın bu ölkədəki səfirliyi tərəfindən 44 günlük Vətən müharibəsində ölkəmizin ərazi bütövlüyünün təmin edilməsi uğrunda canlarını fəda etmiş şəhidlərimizin xatirəsinə abidə ucaldılıb.

AZƏRTAC xəbər verir ki, abidənin açılışında Kavaşa qəsəbəsinin sakinləri, Livan ictimaiyyətinin nümayəndələri, bu ölkədəki türk icmalarının təmsilçiləri və jurnalistlər iştirak ediblər.

Mərasim iştirakçıları şəhidlərimizin əziz xatirəsini bir dəqiqəlik sükutla yad edib, onların müqəddəs ruhuna dualar oxuyublar.

Abidənin açılışında çıxış edən Azərbaycanın Livandakı müvəqqəti işlər vəkili Şahin Pənahov 44 günlük Vətən müharibəsi haqqında ətraflı məlumat verib. O vurğulayıb ki, Azərbaycan Prezidenti, Silahlı Qüvvələrin Müzəffər Ali Baş Komandanı İlham Əliyevin rəhbərliyi ilə həyata keçirilən və 44 gün davam edən hərbi əməliyyatlar işğalçı Ermənistanın kapitulyasiya aktını imzalaması ilə başa çatıb. Bu möhtəşəm Qələbə nəticəsində Azərbaycanın ərazi bütövlüyü bərpa olunub, postmüharibə dövründə genişmiqyaslı bərpa-quruculuq işlərinə başlanılıb. “Bu şanlı Zəfər Azərbaycanın igid oğullarının qəhrəmanlığı sayəsində, şəhidlərin qanı bahasına qazanılıb və bu gün açılışını etdiyimiz abidə Livan torpağında da onlarını xatirəsinə dərin ehtiram əlamətidir”, - deyə diplomat qeyd edib.

Mərasim iştirakçıları abidənin önünə əklil və gül dəstələri qoyublar.

 
Oqtay Bayramov

AZƏRTAC-ın xüsusi müxbiri

Qahirə

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.