Matəmlə əlaqədar qardaş ölkənin bayrağı NATO-da yarıya endirilib

Bakı, 7 fevral, AZƏRTAC

Türkiyədə milli matəm elan edildikdən sonra NATO-nun qərargahında qardaş ölkənin bayrağı yarıya endirilib.

AZƏRTAC bu barədə Anadolu agentliyinə istinadla xəbər verir.

Xatırladaq ki, Türkiyə Prezidenti Rəcəb Tayyib Ərdoğan ölkədə 7 günlük matəm elan edilməsi barədə tviter hesabında paylaşım edib.

“Fevralın 6-da ölkəmizdə baş vermiş zəlzələlərlə əlaqədar yeddigünlük milli matəm elan edilib. Bayrağımız fevralın 12-də gün batana qədər ölkəmizin bütün ərazisində və xaricdəki nümayəndəliklərimizdə yarıya qədər endiriləcək”, - deyə paylaşımda bildirilir.

Qeyd edək ki, fevralın 6-da Türkiyədə baş vermiş zəlzələ nəticəsində həlak olanların sayı 2379 nəfərə çatıb. Yaralananların sayının isə 14 min 483 olduğu bildirilir.