Naxçıvan, 24 oktyabr, AZƏRTAC

Muxtar respublika ərazisində ekoloji tarazlığın qorunması, əlverişli ekoloji mühitin yaradılması, insanların sağlam ətraf mühitdə yaşamasının təmin edilməsi məqsədilə həyata keçirilən uğurlu sosial-ekoloji siyasət davam etdirilir.

Naxçıvan Muxtar Respublikası Ekologiya və Təbii Sərvətlər Nazirliyindən AZƏRTAC-ın Naxçıvan bürosuna bildirilib ki, ay ərzində ətraf mühitin mühafizəsi, qanunsuz ov və meşə fondu torpaqlarından istifadə edilməsi, ətraf mühitə təsir hallarının qiymətləndirilməsi məqsədilə 10 yoxlama-reyd keçirilib, 4 inzibati xəta qeydə alınıb və qanunauyğun tədbir görülüb.

Muxtar respublikanın təbiətinin qorunması üçün inzibati tədbirlərdən daha çox ekoloji-hüquqi maarifləndirmə tədbirlərinə üstünlük verilir. Bu məqsədlə Şərur rayonunun Dəmirçi, Culfa rayonunun Qazançı, Ordubad rayonunun Sabirkənd və Şahbuz rayonunun Külüs kəndləri ərazisində tədbirlər keçirilib. Şərur, Sədərək, Ordubad, Babək, Şahbuz, Kəngərli və Culfa rayonlarının 30-a yaxın yaşayış məntəqəsi ərazisində ekoloji monitorinqlər aparılıb.

Hesabat ayında Araz çayının və Arpaçayın muxtar respublikaya daxil olan hissəsindən və Sədərək rayonu ərazisindən keçən Şir arxından hər birindən 4 olmaqla, ümumilikdə, 12 su nümunəsi götürülüb və Sədərək Rayon Su Monitorinq Laboratoriyasında analiz aparılıb. Analizlərdə sularda çirklənmə hallarının yol verilə bilən qatılıq həddini keçməsi halı qeydə alınmayıb.

Payız fəslində yeni yaşıllıqların salınması ilə bağlı hazırlıqlara başlanılıb, Əshabi-Kəhf ziyarətgahı istiqamətində 3 hektar sahə əkin üçün hazırlanıb. Həmçinin ay ərzində püstə bağlarına aqrotexniki qaydada qulluq göstərilib. Müxtəlif ərazilərdə salınan yaşıllıqlarda bərpa məqsədilə 680 ting əkilib. İlin əvvəlindən təsdiqlənmiş toxum bölgüsünə uyğun olaraq, 857 kiloqram müxtəlif meyvə və meşə cinslərinin toxumları tədarük olunub. Bu iş davam etdirilir.

Qış mövsümündə fauna ehtiyatlarının qaba yemə və daşduza olan tələbatının ödənilməsi məqsədilə 75 kip qaba yem, 7,5 tona yaxın daşduz ehtiyatı yaradılıb. Hazırda 500 kipə yaxın qaba yem, 8 tondan artıq daşduz ehtiyatı mövcuddur, meyvə-tərəvəz qalıqları isə mövsümə uyğun olaraq tədarük ediləcək.

Hesabat ayında Naxçıvan Muxtar Respublikasının Babək, Culfa və Ordubad rayonlarında yaradılacaq “İlandağ” geoparkının layihələndirilən ərazisinin geoloji, ekoloji xəritələri nazirliyin əməkdaşları tərəfindən tərtib olunub, həm xəritələrin, həm də ərazidə müəyyən edilən geositlər və geoloji quruluş haqqında məlumatların elektron variantı hazırlanaraq Azərbaycan Milli Elmlər Akademiyasının Naxçıvan Bölməsinə təqdim edilib.

Gənclərlə işin səmərəli təşkili məqsədilə Naxçıvan Muxtar Respublikasının Gənclər Fondu ilə birgə hazırlanmış tədbirlər planına uyğun olaraq “Ekoloji könüllülər” layihəsi çərçivəsində ekologiya könüllüləri ilə “Gələcək üçün təmizlə” devizi altında Naxçıvançay vadisində təmizlik aksiyası keçirilib, gənclərə ətraf mühitin mühafizəsi üçün görülən işlər və könüllülərin bu sahədə rolu haqqında geniş məlumat verilib.

Naxçıvan Dövlət Universitetinin nazirliyin hamiliyinə verilmiş Ekologiya mühəndisliyi və Geologiya mühəndisliyi ixtisaslarının tələbələri ötən ay Geoloji Axtarış və Kəşfiyyat İdarəsinin Əlincəçay vadisində apardığı qazma işləri ilə tanış olub, geoloji axtarış və qazma işləri haqqında geniş bəhs edilib. Tələbələr Culfa şəhərində Geoloji Axtarış və Kəşfiyyat İdarəsinin bazasında yerləşən Geologiya Muzeyi və laborator analizlərin aparılması ilə tanış olublar. Ekoloji tədbirlər davam etdiriləcək.