REGİONLAR


Naxçıvanda keçirilən “Tariximizi qoruyaq və yaşadaq” aksiyasında 400-dən çox eksponat toplanılıb

Naxçıvan, 15 may, AZƏRTAC

Naxçıvan şəhərindəki Heydər Əliyev Uşaq-Gənclər Yaradıcılıq Mərkəzində ümumtəhsil müəssisələrində “Tariximizi qoruyaq və yaşadaq” devizi altında keçirilmiş aksiyada toplanan eksponatların Mədəniyyət Nazirliyinə təqdimetmə mərasimi olub.

Naxçıvan Muxtar Respublikası Təhsil Nazirliyindən AZƏRTAC-ın Naxçıvan bürosuna bildirilib ki, tədbirdə Təhsil naziri Rəhman Məmmədov çıxış edərək, dövlətimizin təhsilə göstərdiyi diqqət və qayğıdan ətraflı danışıb.

Təhsil naziri vurğulayıb ki, şagirdlərin vətənpərvərlik ruhunda tərbiyə edilməsi, tariximizin öyrənilməsi ilə bağlı müxtəlif səpkili tədbirlər həyata keçirilir. Bu tədbirlərin davamı olaraq ümumtəhsil məktəblərində “Tariximizi qoruyaq və yaşadaq” devizi altında aksiya təşkil olunub. Aksiyanı keçirməkdə əsas məqsəd tariximizin öyrənilməsi ilə yanaşı, onun qorunması və yaşadılması istiqamətində müəllim və şagirdləri fəal iştirakçıya çevirmək, onlara qədim maddi-mədəniyyət nümunələrini toplayaraq muzeylərin zənginləşdirilməsi işinin vətəndaşlıq borcu olduğunu aşılamaqdır.

Rəhman Məmmədov deyib: “Aksiya təhsil ictimaiyyəti tərəfindən böyük rəğbətlə qarşılanıb, qədim maddi-mədəniyyət nümunələri, o cümlədən şəxsi kolleksiyalarda toplanmış tarixi və bədii əhəmiyyət daşıyan 400-dən artıq eksponat müəllim və şagirdlərimiz tərəfindən toplanaraq bir araya gətirilib. Bunlara toxuculuq məmulatları, məişət əşyaları, təsərrüfat və daş əmək alətləri, pul nümunələri və digər məmulatlar aiddir”.

Təhsil naziri bu ənənənin gələcəkdə də davam etdiriləcəyini bildirib.

Naxçıvan Muxtar Respublikasının Mədəniyyət naziri Natəvan Qədimova çıxışında müstəqillik illərində diyarımızda bütün sahələrdə olduğu kimi, mədəniyyətin və incəsənətin inkişafında da əldə edilən uğurlardan danışıb.

Diqqətə çatdırılıb ki, muxtar respublikada muzey fondlarının zənginləşdirilməsi, onların yeni eksponatlarla təmin olunması daim diqqət mərkəzində saxlanılır. Bu prosesdə təkcə muzeylərin əməkdaşları deyil, muxtar respublika vətəndaşları da yaxından iştirak edirlər. Sevindirici haldır ki, son dövrlərdə aksiya xarakteri almış bu tədbirlərdə ümumtəhsil məktəblərinin müəllim və şagird kollektivləri də fəallıq göstərirlər.

“Ötən il muxtar respublika muzeylərinə 1564, bu ilin ilk 4 ayı ərzində isə 571 eksponat daxil olub. 2019-cu ilin may ayınadək, ümumilikdə, 5 eksponat təqdimatı keçirilib”, - deyən Natəvan Qədimova vurğulayıb ki, qısa müddətdə 400-dən çox eksponatın toplanması, bundan başqa yanvar ayında Muğanlı kənd tam orta məktəbin müəllim və şagirdləri tərəfindən Şərur Rayon Tarix-Diyarşünaslıq Muzeyinə 75 eksponatın təqdim olunması ümumtəhsil məktəblərində zəngin mədəni irsimizin yaşadılması və gələcək nəsillərə çatdırılması ilə bağlı aparılan maarifləndirici tədbirlərin nəticəsidir.

Kəngərli rayon Qarabağlar kənd 1 nömrəli tam orta məktəbin direktoru Dilguşə Qurbanova, Naxçıvan Qızlar Liseyinin IX sinif şagirdi Nərmin Abbasova aksiyanın böyük maraq doğurduğunu və eksponatların toplanmasının mədəni irsimizin qorunması baxımından əhəmiyyətli olduğunu bildiriblər.

Tədbirdə “Tariximizi qoruyaq və yaşadaq” devizi altında keçirilmiş aksiyada fəal iştirak edənlər “Ən fəal təhsil şöbəsi”, “Ən fəal məktəb”, “Ən fəal müəllim” və “Ən fəal şagird” nominasiyaları üzrə diplom və hədiyyə ilə mükafatlandırılıblar. Cəlil Məmmədquluzadənin 150 illik yubileyi münasibətilə Texniki Yaradıcılıq Mərkəzinin dərnək rəhbəri Natiq Yusifovun ağac üzərində oyma-yanma üsulu ilə hazırladığı portret Cəlil Məmmədquluzadənin ev-muzeyinə hədiyyə edilib.

Sonda toplanmış eksponatlardan ibarət sərgiyə baxış olub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.