SİYASƏT


Ordu quruculuğunda tətbiq olunan Azərbaycan standartları ən yüksək qiymətə layiqdir

Bakı, 27 iyun, Səadət Hakıyeva, AZƏRTAC

Prezident İlham Əliyev Gəncəyə, Samuxa və Mingəçevirə səfəri zamanı “Azərbaycan” İstilik Elektrik Stansiyasının bərpadan sonra açılışında və N saylı hərbi hissədə hərbçilərlə görüşündə ictimaiyyətə mühüm ismarışlar verdi.

Bu sözləri AZƏRTAC-a açıqlamasında Milli Məclisin Mədəniyyət komitəsinin sədri, siyasi elmlər doktoru Qənirə Paşayeva deyib.

Q.Paşayeva bildirib ki, ulu öndər Heydər Əliyevin təşəbbüsü ilə tikilən “Azərbaycan” İstilik Elektrik Stansiyasının bərpası və yenidən qurulması ölkənin enerji ehtiyatlarının təmin olunması üçün böyük əhəmiyyət kəsb edir. 1981-ci ildə istifadəyə verilən stansiyasının 1 bloku olduğu halda, indi 8 bloku fəaliyyət göstərir. Son 16 il ərzində Azərbaycanda 30 elektrik stansiyası tikilib ki, onlardan “Cənub”, “Səngəçal”, “Sumqayıt”, “Şimal-2”, “Şimal-1” son illərdə tikilmiş stansiyalardır.

Komitə sədri deyib ki, Azərbaycan Prezidenti səfər zamanı bir çox mühüm obyektlərin açılışlarında iştirak etdi. Dövlət başçısının N saylı hərbi hissənin açılışında iştirakı və dərin məzmunlu nitqi xüsusi əhəmiyyətə malikdir. Ali Baş Komandan hərbçiləri bayram münasibətilə təbrik edərək onlara xoş arzularını bildirdi və ictimaiyyəti düşündürəcək ismarışlar verdi.

Deputat Azərbaycan Ordusunun gündən-günə qüdrətinin artdığını vurğulayıb. O bildirib ki, son illər ölkədə ordu quruculuğunda, hərbi hissələrin tikintisində tətbiq olunan standartlar ən yüksək qiymətə layiqdir. Bu gün Azərbaycan Ordusu dünyada 50 ən güclü ordu sırasındadır. Bütün hərbi hissələr, şəhərciklər, hərbi bazalar demək olar ki, yenidən qurulur. Azərbaycan müharibə şəraitində yaşayır və belə olan halda ordu ilə bağlı bütün məsələlər çox əhəmiyyətlidir. Azərbaycan artıq silah idxalçısına çevrilib və Müdafiə Sənayesi Nazirliyinin xətti ilə 1300-dən çox adda hərbi təyinatlı məhsul istehsal olunur. Azərbaycan onlarla ölkəyə hərbi məhsul ixrac edir.

Müsahibimiz Prezident İlham Əliyevin hərbi hissələrdə ideoloji tərbiyə işi və gənclərin vətənpərvərlik ruhunda böyümələri ilə bağlı dedikləri fikirlərə də münasibət bildirib. Qeyd edib ki, torpaqlarımızın 20 faizinin işğal altında olduğu bir vaxtda hərbi hissədə ideoloji tərbiyə işinin lazımi səviyyədə qurulması, döyüş ruhunun yüksək olması çox önəmlidir. Gənclər arasında vətənpərvərlik tərbiyəsinə xüsusi diqqət yetirilməlidir. Gənclərimiz milli ruhda, vətənpərvərlik ruhunda böyüməli, müstəqilliyin qədrini bilməlidirlər. Onlar ölkəmizin tarixi ilə bağlı dolğun məlumata malik olmalıdırlar.

Deputat qeyd edib ki, Prezident nitqində Ermənistandakı mövcud vəziyyətdən, ermənilərin torpaqlarımızda apardıqları məskunlaşma siyasətindən, eləcə də beynəlxalq təşkilatların təcavüzkar ölkənin əməlləri barədə tədbir görməsinin vaxtının çatmasından da danışdı. Dövlət başçısı Ermənistanın müstəqillik tarixinin rüsvayçılıq tarixi olduğunu diqqətə çatdırdı. Bildirdi ki, 1998-ci ildən 2018-ci ilə qədər Ermənistana rəhbərlik etmiş şəxslərin cinayətkar, oğru və quldur olduğu hər kəsə aydındır. Hazırda böhran vəziyyətində yaşayan Ermənistanda diktatura hökm sürür. Ölkə demək olar ki, xarici dairələrdən idarə olunur. Ermənistanda demoqrafik böhran yaşanır, insanlar bu ölkəni tərk edərək baş götürüb gedirlər. Hazırda işğalçı ölkənin real əhalisi 2 milyon nəfərdən azdır. Prezident həmişə olduğu kimi, bu dəfə də konkret olaraq vurğuladı ki, Azərbaycan münaqişə ilə bağlı öz mövqeyində möhkəm dayanıb və bir addım geri atmayacaq. Azərbaycan torpağında ikinci erməni dövlətinin yaradılmasına imkan verilməyəcək. Ərazi bütövlüyü prinsipi insanların, xalqların öz müqəddəratını təyin etmək prinsipindən üstündür.

“Azərbaycan Ordusu öz torpaqlarını işğalçılardan azad etməyə qadirdir. Biz bunu həm 2016-cı ilin, həm 2018-ci illərin hərbi əməliyyatları nəticəsində düşmənə və dünyaya sübut etdik. Əgər oğru, quldur dəstəsinin, terrorizmin vətəni olan Ermənistan sülh yolu ilə torpaqlarımızı qaytarmaq istəmirsə, özündən küssün. Ali Baş Komandanın bir əmri kifayətdir ki, şanlı ordumuz hərb meydanında öz sözünü desin və düşməni yerində oturtsun. Bilsinlər ki, hazırda böhran vəziyyətində yaşayan, diktaturanın hökm sürdüyü işğalçı Ermənistanın qarşısında güclü iqtisadiyyatı, ordusu, vətənpərvər gəncliyi, dövlətlə həmrəylik nümayiş etdirən xalqı olan Azərbaycan var. Bizim işimiz haqq işidir. Biz, mütləq qalib gələcəyik”, - deyə Qənirə Paşayeva qeyd edib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.