RƏSMİ XRONİKA


PREZİDENT İLHAM ƏLİYEV HACIQABULDA KƏRPİC ZAVODUNUN AÇILIŞINDA İŞTİRAK ETMİŞDİR

Hacıqabul, 3 sentyabr (AZƏRTAC). Sentyabrın 3-də Prezident İlham Əliyev Hacıqabulda kərpic zavodunun açılışında iştirak etmişdir.

Zavodun kollektivi dövlətimizin başçısını hərarətlə qarşıladı.

Azərbaycan Prezidenti zavodu işə saldı, müəssisə ilə yaxından tanış oldu, istehsal prosesini izlədi.

Məlumat verildi ki, yeni zavodun inşasına “R–Turan” MMC-nin sifarişi ilə ötən ilin iyulunda başlanmışdır. İnşaat işləri yerli şirkətlər tərəfindən yüksək səviyyədə həyata keçirilmişdir. Müəssisənin tikintisində ayda orta hesabla 220 işçi çalışmışdır. Zavodun ümumi sahəsi 5 hektardır. Buraya qapalı istehsalat korpusu, inzibati bölmə və mehmanxananın yerləşdiyi bina, avtomobil dayanacağı və digər yardımçı binalar daxildir.

Əraziyə asfalt döşənmiş, yaşıllıq zolaqları salınmış, 5 min ağac əkilmişdir. Yerli və xarici müştərilərin istirahəti də diqqətdə saxlanılmışdır. Bunun üçün ərazidə ümumi sahəsi 600 kvadratmetr olan 28 yerlik mehmanxana inşa edilmişdir. Zavodun inzibati bölməsi də yüksək səviyyədə tərtib olunmuşdur. Bölmənin foyesində ümummilli lider Heydər Əliyev və Prezident İlham Əliyevin fəaliyyətləri barədə fotostendlər yaradılmışdır.

Zavodun istehsal sahəsinin elektrik və təbii qazla təminatı tam həll olunmuşdur. Bu məqsədlə ayrıca yarımstansiya tikilmiş, əraziyə 4,5 kilometrlik elektrik, 4 kilometrlik qaz xəttləri çəkilmişdir. Müəssisəni fasiləsiz elektrik enerjisi ilə təmin etmək üçün ayrıca generator quraşdırılmışdır. İstehsal zamanı yaranan qazların ətraf mühitə zərər vurmaması üçün texniki tədbirlər görülmüşdür. Zavodda, ofisdə və mehmanxanada mərkəzləşdirilmiş havalandırma sistemləri yaradılmışdır. Zavodda videomüşahidə sistemi də vardır.

Müəssisənin fəaliyyətini Bakı ilə yanaşı, Çexiyadan da izləmək olar. Bu əməliyyatı mobil telefon vasitəsilə də həyata keçirmək mümkündür.

Yeni zavodun inşasına 3,5 milyon, maşın və mexanizmlərin alınmasına 700 min manat vəsait xərclənmişdir. Yaponiya, İtaliya, Almaniya, Polşa və Çexiya istehsalı olan müasir avadanlığın quraşdırıldığı müəssisənin illik istehsal gücü 30 milyon şərti kərpicdir. Burada gündə 8 çeşiddə 300 ton bişmiş kərpic istehsal edilir. Gələcəkdə istehsal gücünün artırılması nəzərdə tutulur. İstehsalatda 75 nəfər daimi işlə təmin olunmuşdur. İkinövbəli iş rejimi tətbiq edildikdən sonra işçilərin sayını artırmaq nəzərdə tutulur. Xammalın götürüldüyü ərazinin zavoda yaxın olması hazır məhsulun maya dəyərinin aşağı olmasına imkan verir. Müxtəlif ölçülərdə kərpiclərin kəsilməsi və qəlibdən çıxan kərpiclərin qurğuya yığılması proseslərini robotlar yerinə yetirir. Zavodun Almaniya istehsalı olan 4 yük avtomobili də vardır. Bu maşınlar kərpici özüboşaldan kranlarla təchiz olunmuşdur.

Azərbaycanda ilk dəfə bu müəssisədə istehsal ediləcək böyük ölçülərdə və yeni növ kərpiclər həm divar, həm də tavan üçün nəzərdə tutulur. Zavodun bütün fəaliyyəti mərkəzləşdirilmiş proqramla robotlar vasitəsilə həyata keçirilir. Zavodda avtomatik aerodinamika sistemi quraşdırılmışdır.

Bundan əlavə, zavodda elektrik enerjisinə qənaət edən konvertor sistemi yaradılmışdır, müəssisə tək kompyuterdən idarə olunur. İstehsal prosesində baş verə biləcək qüsur dərhal aşkar edilir və avtomatik surətdə aradan qaldırılır. Bazar günlərində isə zavod xüsusi proqramlı avtopilotla çalışır. Zavodda yaradılan şərait dünya standartları səviyyəsində məhsul istehsal etməyə imkan verir. Burada məhsulun keyfiyyətini yoxlamaq üçün laboratoriyalar da yaradılmışdır.

Hazır məhsulun satışı ilə bağlı bir neçə yerli inşaat şirkəti ilə müqavilə imzalanmışdır. Məhsulun xarici bazara da çıxarılması üçün konkret tədbirlər görülür. Bəzi ölkələrin şirkətləri ilə danışıqlar aparılmışdır və artıq müəyyən nəticələr vardır.

Prezident İlham Əliyev istehsal sexinin idarəetmə mərkəzi ilə də tanış oldu. Bildirildi ki, sexdəki bütün avadanlıq və robotların fəaliyyəti bu mərkəzdən idarə olunur.

Zavodun fəaliyyəti ilə tanış olan dövlətimizin başçısı kollektivlə görüşdü. Prezident İLHAM ƏLİYEV müəssisənin işçilərini təbrik edərək dedi:

- Gözəl zavodun açılışı münasibətilə sizi təbrik edirəm. Azərbaycanda son illər ərzində bir neçə kərpic zavodu tikilmişdir. Amma bu kərpic zavodu o biri zavodlardan fərqlənir. Burada tam avtomatlaşdırma sistemi qurulub. Mən gəzdim, baxdım, gördüm ki, burada ən müasir texnologiya tətbiq olunub, müəssisə yüksək keyfiyyətlə tikilib. Burada quraşdırılan robotlar, yeni avadanlıq, kompyuter texnologiyaları müasirlikdir, yenilikdir, Azərbaycanın inkişafıdır, istehsal mədəniyyətidir.

Azərbaycanda istehsal artır, sənaye istehsalı bu il də artıb. Baxmayaraq ki, dünyada əksər ölkələrdə sənaye istehsalı aşağı düşür, Azərbaycanda artım vardır. Kərpic zavodunun tikintisi o deməkdir ki, inşaat sektorunun inkişafı davam edir. Əgər belə olmasaydı, kərpic zavodunun tikintisinə ehtiyac olmazdı. Çox şadam ki, belə gözəl zavod Hacıqabulda tikilib. Bölgələrin, regionların inkişafı sürətlə gedir və belə yeni, gözəl müəssisələrin yaradılması bizim regional proqramın uğurla icrasını təmin edir.

Azərbaycanda son illər ərzində minlərlə yeni müəssisə yaradılıb, yerli istehsal artıb, idxal azalıb. Biz özümüzü demək olar ki, kənd təsərrüfatı məhsulları ilə maksimum dərəcədə təmin edirik. Azərbaycanda inşaat materialları istehsal olunur, yeni sənaye sahələri yaradılır. Çox sevindiricidir ki, bu müddətdə, bu mərhələdə Azərbaycanda yaradılan yeni istehsal sahələri artıq dünyanın ən yüksək standartlarına cavab verir. Əminəm ki, bu kərpic zavodu dünyanın ən inkişaf etmiş ölkələrindəki oxşarlarından fərqlənmir. Burada yüksək istehsal keyfiyyəti, istehsal mədəniyyəti mövcuddur. Böyük investisiyalar qoyulub, bu maşınlar çox bahalı maşınlardır. Tikintiyə də böyük investisiyalar qoyulubdur. Bu onu göstərir ki, yerli sahibkarlar tam əmindir, Azərbaycanda iqtisadi inkişaf davam edəcək, Azərbaycanda ictimai-siyasi vəziyyət həmişəki kimi çox yüksək səviyyədə olacaqdır. Siyasi sabitlik iqtisadi inkişafın başlıca şərtidir. Ölkəmizin regionlarının inkişafı bizim bütün iqtisadi və siyasi potensialımızı gücləndirir.

Mən bir daha sizi bu gözəl hadisə münasibətilə ürəkdən təbrik etmək istəyirəm və sizə işinizdə uğurlar arzulayıram.

                                                X X X

Sonda Prezident İlham Əliyev zavodun kollektivi ilə xatirə şəkli çəkdirdi.

######

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin