ELM VƏ TƏHSİL
Professor İbrahim Zeynalov: Sərhəd xidmətinin möhkəmləndirilməsi ölkə rəhbərinin hərbi strategiyasının tərkib hissəsidir
Bakı, 30 aprel, AZƏRTAC
Sərhəd xidmətinin möhkəmləndirilməsi, hərbi arsenalın müasir silahlarla daha da zənginləşdirilməsi Azərbaycan Silahlı Qüvvələrinin Ali Baş Komandanı, Prezident İlham Əliyevin hərbi strategiyasının tərkib hissəsidir. Aprelin 26-da Prezident İlham Əliyev, birinci xanım Mehriban Əliyeva və qızları Leyla Əliyeva Cəbrayıl rayonunda Dövlət Sərhəd Xidmətinin hərbi hissəsinin açılışında iştirak ediblər.
Azərbaycan-İran sərhədində Dövlət Sərhəd Xidmətinin yeni hərbi hissəsinin yaradılması Sərhəd Xidmətinin nə qədər mühüm əhəmiyyət kəsb etdiyinin bariz göstəricisidir. Həmçinin bu xidmət sahəsinin işinə verilən töhfənin təzahürüdür. Ölkə rəhbərinin Dövlət Sərhəd Xidmətinin işinə göstərdiyi diqqət təbii ki, ölkəmizin ərazi bütövlüyünün, onun sərhədlərinin qorunmasının sərhədçilərimizdən daha çox asılı olduğunun göstəricisidir. 44 günlük Vətən müharibəsinin ən mühüm nəticələrindən biri də sərhədlərimizin, o cümlədən Azərbaycan-İran sərhədinin 132 kilometrlik sərhədin tam bərpa olmasıdır.
Bu fikirləri AZƏRTAC-a açıqlamasında tarixçi alim, professor İbrahim Zeynalov söyləyib. Professor bildirib ki, Vətən müharibəsində qazandığımız şanlı Qələbədən dərhal sonra ölkə rəhbərinin göstərişi ilə dövlət sərhədlərinin daha da möhkəmləndirilməsinə, sərhəd boyunca bütün lazımi istehkam, mühafizə işlərinin görülməsinə başlanıldı. Həmçinin hərbi arsenal ən müasir silahlarla daha da zənginləşdirilməyə başlanıldı. Cəbrayıl rayonunda Dövlət Sərhəd Xidmətinin yeni yaradılan hərbi hissəsinin fəaliyyətə başlaması Müzəffər Ali Baş Komandanın Dövlət Sərhəd Xidmətinin işinin daha müasir tələblər əsasında qurulmasına böyük diqqətinin bariz nümunəsidir. Prezident İlham Əliyevin xüsusi tapşırığı ilə Azərbaycanın bütün sərhəd boyunca, xüsusilə Azərbaycan-İran, Azərbaycan-Ermənistan sərhədləri boyunca sərhəd xidməti, müdafiə sistemi yenilənir və daha da möhkəmləndirilir. Prezident çıxışında Azərbaycan-İran sərhədini dostluq sərhədi adlandıraraq deyib: “Bu sərhədin qorunması Azərbaycan-İran əlaqələrinin inkişafı üçün də çox böyük önəm daşıyır. Bizim İran İslam Respublikası ilə digər istiqamətlərdə sərhədimiz var və bu, sözün əsl mənasında, dostluq, əməkdaşlıq sərhədidir. Hər iki ölkənin sərhəddən keçən vətəndaşları bundan faydalanırlar. Eyni zamanda, ildən-ilə artan yüklərin həcmi Azərbaycan-İran əlaqələrinin inkişafından xəbər verir”.
İ.Zeynalov qeyd edib ki, ötən il oktyabrın 18-də düşməndən azad edilmiş Xudafərin körpüsü Azərbaycan-İran dostluğunda mühüm əhəmiyyətə malikdir. Dövlət başçısı ərazinin və körpünün azad edilməsində sərhədçilərin xidmətini yüksək qiymətləndirib.
Azərbaycan-Ermənistan sərhədinin 500 kilometrə yaxın uzunluğu olduğunu qeyd edən dövlətimizin başçısı deyib: “Bu sərhəd 30 ilə yaxın müddət ərzində işğalçı qüvvələrin əlində idi. Biz Vətən müharibəsində Qələbə qazanaraq bu sərhədi də tam bərpa etdik, Zəngilan və Qubadlı rayonlarını, Laçın rayonunun bir hissəsini döyüşərək azad etdik. Laçın rayonunun böyük hissəsini və Kəlbəcər rayonunu düşmən artıq məcbur olub kapitulyasiya aktını imzalayaraq bizə qaytarıb. Hazırda o ərazilərdə lazımi işlər aparılır”.
Prezident, həmçinin bu gün müzəffər Azərbaycan Silahlı Qüvvələrinin qarşıda duran bütün vəzifələri icra etdiyini, eyni zamanda, sərhədçilərimizin hazırda işğaldan azad edilən ərazilərdə Azərbaycan-Ermənistan sərhədini də qoruduğunu bildirib. Dövlətimizin başçısı qeyd edib ki, bu sərhəd də bərpa edilib və sərhəd boyunca bütün lazımi infrastruktur işləri aparılır, bütün texnika səfərbər edilib.
Dövlət Sərhəd Xidmətinin hərbi qulluqçuları ilə görüşündə Azərbaycan Prezidentinin Ermənistanda baş qaldıran revanşist qüvvələrə xəbərdarlığına diqqət çəkən alim dövlətimizin başçısının söylədiyi bu fikirləri də xatırladıb: “Biz Vətən müharibəsi dövründə kimin kim olduğunu göstərdik. Dəmir yumruq düşmənin başını əzdi. Bu yaxınlarda Azərbaycan-Ermənistan sərhədinin Zəngilan istiqamətində bizim sərhədçilərimizə qarşı edilən hərbi təxribat sonuncu belə cəhd olmalıdır. Biz təmkinlik göstərərək bu təxribata cavab vermədik. Amma bu, sonuncu xəbərdarlıqdır. Əgər bir daha buna oxşar cəhd göstərilərsə, düşmən yerindəcə məhv ediləcək. Biz öz sərhədimizi qoruyuruq və bundan sonra da qoruyacağıq. Hər bir ölkənin sərhədi onun dövlət rəmzlərindən biridir. Azərbaycan öz sərhədlərini, ərazi bütövlüyünü tam bərpa edib. Bizim Silahlı Qüvvələrimiz rəşadət, qəhrəmanlıq göstərərək Vətən müharibəsində Zəfər çaldılar. Sərhədçilərin ümumi zəfərimizdə rolu çox böyükdür. Mən bunu qiymətləndirirəm. Təsadüfi deyil ki, bir çox hərbçilər dövlətimizin yüksək orden və medalları ilə təltif edilmişlər”.
“Ölkə rəhbərinin də qeyd etdiyi ki, şanlı Qələbəmizdə Silahlı Qüvvələrimizlə bərabər sərhədçilərimizin də rolu çox böyükdür”,- deyə tarixçi-alim fikrini yekunlaşdırıb.