CƏMİYYƏT


Qırx kiloqramdan çox heroin və metamfetaminin ölkəyə gətirilərək satışa çıxarılmasının qarşısı alınıb VİDEO

Bakı, 2 avqust, AZƏRTAC

Daxili İşlər Nazirliyinin (DİN) Baş Narkotiklərlə Mübarizə İdarəsinin əməkdaşları külli miqdarda narkotik vasitə və psixotrop maddənin qaçaqmalçılıq yolu ilə ölkə ərazisinə gətirilərək realizə olunmasının qarşısı alıblar.

DİN-in mətbuat xidmətindən AZƏRTAC-a bildiriblər ki, Baş İdarənin Cənub Bölgəsində Regional Şöbəsi əməkdaşlarının Yardımlı rayonunda həyata keçirdikləri əməliyyat nəticəsində Avaş kənd sakini Rahil İmanov narkotik vasitələrin qanunsuz dövriyyəsi ilə məşğul olmaqda şübhəli bilindiyi üçün saxlanılıb. Araşdırma zamanı onun qaçaqmalçılıq yolu ilə ölkə ərazisinə gətirilən külli miqdarda heroini Şirvan şəhərində anbar kimi istifadə etdiyi evdə gizlətdiyi müəyyənləşdirilib. Polis əməkdaşları tərəfindən həmin mənzilə baxış zamanı ümumi çəkisi 20 kiloqram 675 qram olan heroin, elektron tərəzi, narkotik vasitələrin satışından əldə olunan pul vəsaitləri və mobil telefon aşkarlanıb. Rahil İmanov ifadəsində aşkarlanan külli miqdarda heroinin Şirvan şəhəri və ətraf rayonlarda satışını həyata keçirməyi planlaşdırdığını bildirib. Onun narkotik vasitələrin satışından əldə olunan pul vəsaitini isə heroini aldığı xarici ölkə vətəndaşına onlayn yolla göndərməsi planlaşdırdığı müəyyənləşdirilib.

Baş İdarə əməkdaşlarının Sabunçu rayonunda həyata keçirdikləri əməliyyat zamanı isə paytaxt sakini Təhmin Rzaxanov saxlanılıb. Onun üzərindən 94 qram heroin, yaşadığı evdən 1 kiloqram tiryək, 4 kiloqram 930 qram heroin, 3 kiloqram marixuana və yaş çəkisi 7 kiloqram 105 qram olan 50 çətənə kolu aşkar edilib. Saxlanılan şəxs narkotik vasitələri satmaq məqsədilə əldə etdiyini bildirib.

Masallı rayonunda həyata keçirilən növbəti əməliyyat zamanı isə rayon sakini Sahil Məmmədli və paytaxt sakini Tural Rəhimov tutulublar. Onların üzərindən ümumilikdə 9 qrama yaxın heroin, Masallı rayonunda gecələmək üçün müvəqqəti qaldıqları ünvana baxış zamanı isə 6 kiloqram 490 qram heroin və 2 kiloqram 550 qram tiryək aşkarlanıb. Hər iki şəxs ifadələrində külli miqdarda narkotik vasitəni sosial şəbəkələrdə tanış olduqları əcnəbi vətəndaşdan əldə etdiklərini bildirib. Həmin şəxs isə heroin və tiryəki qaçaqmalçılıq yolu ilə naməlum şəxslərin köməyi ilə ölkə ərazisinə keçirərək əvvəlcədən müəyyən edilən yerdə Sahil Məmmədli və Tural Rəhimova təhvil veriblər.

Baş İdarənin Cənub Bölgəsində Regional Şöbəsinin əməkdaşlarının Lerik rayonunda həyata keçirdikləri əməliyyat zamanı isə əvvəllər məhkum olunmuş rayon sakini - psixotrop maddələrin satışında şübhəli bilinən Qədir İmanov saxlanılıb. Onun üzərinə baxış zamanı 5 qrama yaxın psixotrop maddə olan metamfetamin və elektron tərəzi aşkar edilib. Qədir İmanov ifadəsində metamfetamini tanışı Lənkəran şəhər sakini Eduard adlı şəxsdən aldığını bildirib.

Baş Narkotiklərlə Mübarizə İdarəsinin əməkdaşları tərəfindən Lənkəran şəhər sakini əvvəllər məhkum olunmuş Eduard Rəfiyev də saxlanılaraq istintaqa təqdim edilib. Onun üzərinə baxış zamanı 1 kiloqram 315 qram heroin, 257 qram metamfetamin, psixotrop tərkibli 20 metadon həbi və 2 elektron tərəzi aşkar edilib. Eduard Rəfiyev tanışı Qədir İmanova narkotik vasitələri satdığını, Lənkəran şəhəri və ətraf rayonlarda bu işlə məşğul olduğunu etiraf edib.

Bu əməliyyatlar zamanı ümumilikdə 40 kiloqramdan artıq narkotik vasitə və psixotrop maddə Baş İdarənin əməkdaşları tərəfindən qanunsuz dövriyyədən çıxarılıb.

Faktlarla bağlı Cinayət Məcəlləsinin müvafiq maddələri ilə cinayət işləri başlanıb. Adları sadalanan şəxslərin hər biri tutularaq istintaqa cəlb olunub, zəruri istintaq-əməliyyat tədbirləri davam etdirilir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.