Şərur, 14 fevral, AZƏRTAC

Ailə dəyərlərinin qorunduğu muxtar respublikada tibbi xidmətin səviyyəsinin yüksəldilməsi, bu istiqamətdə maarifləndirici tədbirlərin aparılması nəticəsində sağlamlıq imkanları məhdud uşaqların sayının ötən illərlə müqayisədə nəzərəçarpacaq dərəcədə azaldığı məlum olub.

Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsinin mətbuat xidmətindən AZƏRTAC-ın Naxçıvan bürosuna bildirilib ki, Şərur rayonunun Siyaqut kəndində keçirilən “Reproduktiv sağlamlıq və ailə dəyərləri” mövzusunda maarifləndirici tədbirdə bu barədə danışılıb.

Əvvəlcə Şərur Rayon İcra Hakimiyyəti başçısının müavini Vüsalə Ağayeva çıxış edərək, bu istiqamətdə keçirilən maarifləndirici tədbirlərin əhəmiyyətindən söhbət açıb.

Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsinin sədri Ramilə Seyidova çıxışında bildirib ki, cəmiyyətin əsasını təşkil edən ailələrin möhkəm olması üçün ailədə hər iki tərəf onun bütövlüyünün qorunması, uşaqların hərtərəfli və sağlam böyüməsi üçün çalışmalıdır. Həmçinin qadınların sağlamlığının qorunması, yeni nəslin sağlam doğulması və böyüməsi üçün ailə planlaşdırılması məsələsinə xüsusi diqqət yetirilməlidir. Komitə sədri erkən nikahların fəsadları, sağlam uşaqların doğulması üçün qadınların hamiləlik dövründə müvafiq analizlərdən keçirilməsi, nikahdan əvvəl irsi qan xəstəliklərinin, virusların yoxlanılması, qan qohumluğu nikahları zamanı tibbi müayinənin vacibliyini də qeyd edib.

Ramilə Seyidova diqqətə çatdırıb ki, Şərur rayonu üzrə 41 min 878 uşaq var. Bu uşaqlardan 437-nin sağlamlıq imkanları məhduddur. Bu da ümumi uşaqların təxminən 1,04 faizini təşkil edir. Şərur rayonunun Siyaqut kəndi üzrə 14 sağlamlıq imkanları məhdud uşaq vardır ki, onlardan 6-sı anadangəlmə xəstəlikləri olan uşaqlardır.

“Qadınlarda virus hepatitlərinin fəsadları, bətndaxilindəki uşağın xəstəlikləri və onlarla mübarizə yolları” mövzusunda çıxış edən Naxçıvan Muxtar Respublikası Doğum Mərkəzinin həkim ginekoloqu, tibb elmləri üzrə fəlsəfə doktoru Gültəkin Əliyeva qadınların sağlamlıqlarının qorunması yolları, reproduktiv sağlamlıq, həmçinin Şərur rayonu üzrə doğulan sağlamlıq imkanları məhdud uşaqların əsas xəstəliklərinin yaranma səbəbləri barədə slayd vasitəsilə ətraflı məlumat verib.

Sonda tədbir iştirakçılarının sualları cavablandırılıb, onlara müvafiq mövzularda maarifləndirici broşürlər paylanılıb.