SUMQAYIT TARİX MUZEYİ ƏSASLI TƏMİRDƏN SONRA YENİDƏN AÇILMIŞDIR
Sumqayıt, 20 may (AZƏRTAC). Sumqayıt Tarix Muzeyi əsaslı təmirdən sonra yenidən açılmışdır.
Sumqayıt İcra hakimiyyətinin başçısı Vaqif Əliyev təntənəli mərasimi açaraq demişdir: “Bu gün Sumqayıtın mədəni həyatında əlamətdar gündür. Şəhərin tarix muzeyi 3 illik təmirdən sonra yenidən açılır”. Şəhərin digər mədəni obyektləri kimi, bu muzey də yeniləşmiş, yeni məzmun kəsb etmişdir. V.Əliyev vurğulamışdır ki, ümummilli lider Heydər Əliyevin Sumqayıta son səfəri zamanı keçirilən müşavirədə ulu öndərin verdiyi tövsiyələri rəhbər tutaraq genişmiqyaslı işlər görülmüşdür. Sumqayıtın mədəniyyət müəssisələrinin maddi-texniki bazası möhkəmləndirilir, yeni obyektlər tikilir. Bütün bunlar şəhərin mədəni həyatını xeyli fəallaşdırmağa imkan vermişdir.
V.Əliyev bildirmişdir ki, bu, dövlətimizin başçısı İlham Əliyevin Sumqayıtda mədəniyyət sahəsinin inkişafına xüsusi diqqət və qayğısının nəticəsidir.
Mədəniyyət və turizm naziri Əbülfəs Qarayev də sumqayıtlıların sevincini bölüşərək bildirmişdir ki, Sumqayıt Tarix Muzeyi əsaslı təmirdən sonra məhz Beynəlxalq Muzeylər Günündə yenidən qapılarını açmışdır. Nazir demişdir: “Mədəniyyət sahəsinin elə bir istiqaməti yoxdur ki, Azərbaycan Prezidenti İlham Əliyevin diqqətindən kənarda qalsın. Son illər ölkənin kinoteatrları, teatr, kitabxana, klub və sarayları, rəsm qalereyaları yenidən qurulmuşdur. Onların arasında muzeylər də vardır. Sumqayıtda da müsbət dəyişikliklər göz qabağındadır. Hər dəfə şəhərə gələndə burada yeni abadlıq və quruculuq işlərinin şahidi oluram”.
Təntənəli mərasimdə Sumqayıtla qardaşlaşmış Aktau şəhərinin (Qazaxıstan) hakimi Ospan Kazaxbayevin rəhbərliyi ilə nümayəndə heyəti də iştirak etmişdir.
Sonra qonaqlar Sumqayıt Tarix Muzeyi ilə tanış olmuşlar. Muzeyin direktoru, respublikanın Əməkdar Mədəniyyət İşçisi Olya İslamova mədəniyyət ocağının yenidən qurulmasında fəal iştiraka görə ölkənin rəhbərliyinə minnətdarlığını bildirərək qonaqları muzeylə tanış etmişdir. Tanışlıq Sumqayıt əfsanəsindən başlanmışdır. Soltan Hacıbəyovun “Karvan” simfonik süitasının müşayiəti ilə Sumqayıt əfsanəsinin nəqli fonunda xüsusi effektlərlə şəkillər nümayiş etdirilmişdir. Muzeyin etnoqrafiya bölməsi də burada yerləşir.
“Heydər Əliyev və Sumqayıt” ekspozisiyasının yerləşdiyi zal xüsusi maraq doğurur. Nümayiş etdirilən faktoloji və tədqiqat materiallarını nəzərdən keçirdikcə demək olar ki, Sumqayıt ümummilli liderin tükənməz fəaliyyətinin abidəsidir. Ekspozisiyanın mərkəzində, Azərbaycanın xəritəsinin fonunda dahi lider Heydər Əliyevin qorelyefi qoyulmuşdur.
Şəhərin işıq mənbəyi olan istilik elektrik stansiyasının rəmzi - “Həyat şəcərəsi” diqqəti cəlb edir. Heykəltəraşlıq əsərini muzeyin tərtibatının müəllifi İlqar Əliyev yaratmışdır. Metaldan və gipsdən hazırlanmış abidə zərlə örtülmüşdür. Burada şəhərin təməlini qoyanların yaşadıqları ilk barakların və digər obyektlərin maketləri quraşdırılmışdır.
İkinci mərtəbədə Sumqayıtın yaranması və inkişafından bəhs edən eksponatlar yer almışdır. Ayrıca zalda şəhərin şəhid olmuş sakinləri barədə məlumatlar təqdim olunur. Zalın mərkəzində “Axan ulduzlar” heykəlinin modeli yerləşdirilmişdir. Bu, şəhərin baş rəssamı Vaqif Nəzirovun işidir.
Təmirdən sonra ümumi sahəsi 2500 kvadratmetrə çatan muzeyin 1967-ci ilin martında yaradılmış fondu təxminən 15 min eksponatdan ibarətdir. Burada beynəlxalq standartlara cavab verən konfrans zalı, 165 yerlik akt zalı vardır.
Muzeydə yaradılmış şəraiti yüksək qiymətləndirən nazir Ə.Qarayev demişdir: “Bura zona müşavirələrinin və elmi konfransların keçirilməsi üçün yaxşı bazadır”.
Əsaslı təmirdən sonra muzey binasının fasadı da dəyişmişdir. Ətraf ərazidə park salınmış, fəvvarə quraşdırılmışdır.
Həmin gün mədəniyyət və turizm naziri Əbülfəs Qarayev Bülbül adına 2 nömrəli incəsənət məktəbində olmuşdur. Məktəbdə 700-dən çox şagird təhsil alır. Məktəbin ikimərtəbəli binası 1980-ci illərdə xüsusi layihəyə əsasən tikilmişdir. Şəhərin icra hakimiyyəti məktəbin birinci mərtəbəsini təmir etmiş, mini-qazanxana tikdirmişdir. Nazir konsert salonunun, xoreoqrafiya zalının, rəssamlıq studiyasının təmiri üçün vəsait ayrılacağını vəd etmişdir.
######
Bölmənin digər xəbərləri
