Domen Krapej: Azərbaycan mədəniyyət və rəqs dünyası ilə tanış olmaq üçün gözəl ölkədir
Bakı, 31 oktyabr, AZƏRTAC
Azərbaycan xarici qonaqlarda xoş təəssürat yaradır. Beynəlxalq rəqs tədbirlərinin keçirilməsi isə təkcə rəqqasların məharətini nümayiş etdirməyə deyil, həm də iştirakçıların ölkənin mədəniyyəti ilə yaxından tanış olmasına imkan yaradır.
AZƏRTAC-ın müxbiri ilə söhbətində bunu bal rəqsləri üzrə keçmiş dünya, Avropa və Böyük Britaniya çempionu, həmçinin Blekpulda keçirilən beynəlxalq turnirin qalibi Domen Krapej deyib.
“Azerbaijan Dance Festival 2026” beynəlxalq festivalı çərçivəsində ilk dəfə Bakıya gəldiyini bildirən Domen Krapejın sözlərinə görə, uzun müddətdir Azərbaycana səfər etmək istəyib, lakin indiyədək belə bir fürsəti olmayıb. Festivalın təşkilatçısı və dostu Eldar Cəfərovun dəvəti onun Azərbaycana ilk səfərini reallaşdırıb.
“Azərbaycan heyrətamiz və çox gözəl ölkədir. Tədbirin keçirildiyi məkan və təşkilatçılıq səviyyəsi də məndə xoş təəssürat yaratdı. Gələn il dostlarıma mütləq bu ölkəyə gəlməyi, Azərbaycan mədəniyyəti ilə tanış olmağı və bu gözəl məkanda rəqsin zövqünü yaşamağı tövsiyə edəcəyəm”, – deyə o qeyd edib.
Bölmənin digər xəbərləri
