Bakıda “Azerbaijan Dance Festival 2026” beynəlxalq rəqs festivalı keçirilir
Bakı, 30 oktyabr, AZƏRTAC
Noyabrın 1-dək davam edəcək “Open to the World Azerbaijan Dance Festival 2026” beynəlxalq rəqs festivalında 20-dən çox ölkəni təmsil edən 1000-dən artıq iştirakçı Bakıda bir araya gəlib.
AZƏRTAC xəbər verir ki, tədbir təsisçisi və prezidenti Olqa Krasnyanskaya olan “Smooth & Rhythm Dance Style” (SRDS) təşkilatı, Xalq artisti Təranə Muradovanın rəhbərlik etdiyi Azərbaycan Rəqs Şurası (AZDC), eləcə də Şuranın həmtəsisçiləri, rəqs üzrə altıqat dünya çempionları Eldar Cəfərov və Anna Sajina tərəfindən təşkil olunub.
Festivalın proqramına Dünya Bədii Rəqs Federasiyasının (World Artistic Dance Federation) dünya çempionatları, “SRDS Super Trophy Series” reytinq yarışları, bal rəqsləri və Latın Amerikası rəqsləri üzrə “Open to the World” açıq çempionatları, həmçinin “World Pro Am Dance Cup” turniri daxildir.
Bundan əlavə, AZDC-nin Argentina tanqosu, salsa və baçata üzrə çempionatları keçiriləcək.
Festivalın kulminasiyası beynəlxalq rəqs ictimaiyyətinin nümayəndələrini bir araya gətirəcək “Night of the Dancing Diamonds” qala-şousu olacaq.
Xoreoqraf, AZDC-nin mətbuat katibi Lenay Seyid-Əlizadə AZƏRTAC-ın müxbiri ilə söhbətində festivalın onun üçün xüsusi əhəmiyyət daşıdığını bildirib. O, 2023-cü ildə “Azerbaijan Dance Festival”ın açıq turnirində Argentina tanqosu üzrə vitse-çempion olub, hazırda isə AZDC-ni mətbuat katibi kimi təmsil edir. Bu səbəbdən layihənin həm yaradıcılıq, həm də təşkilati tərəfləri ona yaxşı tanışdır.
O qeyd edib ki, təşkilatçılar festivalın inkişafı və iştirakçıların təmsil olunduğu ölkələrin coğrafiyasının genişləndirilməsi üçün böyük səylər göstərirlər. Onun fikrincə, beş il ərzində qarşıya qoyulan əsas məqsədlərdən birinə nail olunub: Azərbaycan dünyanın ən güclü rəqqaslarının gəldiyi beynəlxalq platformalardan birinə çevrilib.
İdman və bal rəqsləri üzrə peşəkar fotoqraf İrina Nevolina “Marriott Abşeron” hotelinin foyesində nümayiş etdirilən fotosərgidə müxtəlif kateqoriyalar üzrə qaliblərin, o cümlədən Dünya Kubokunun sahiblərinin, eləcə də turnirin təşkilatçıları T.Muradova və O.Krasnyanskayanın fotolarının yer aldığını bildirib. Sərgidə ayrı-ayrı stendləri birləşdirən mövzuya uyğun yazılar da təqdim olunub. Mərkəzi yeri isə üzərində “Welcome to Azerbaijan Dance Festival” yazısı olan stend tutur.
O bildirib ki, komandası artıq beşinci ildir turnirdə fəaliyyət göstərir. İ.Nevolina təşkilatçılarla əməkdaşlığın gələcəkdə də davam edəcəyinə, festivalın iştirakçılarının və tamaşaçılarının sayının artacağına, eləcə də onun Azərbaycanın mədəni həyatındakı mövqeyinin daha da möhkəmlənəcəyinə ümidvar olduğunu bildirib.
Bölmənin digər xəbərləri
