Alimlər soyuq temperaturun ömrü uzatmağa kömək edə biləcəyini müəyyənləşdiriblər
London, 30 oktyabr, AZƏRTAC
Alimlər soyuq temperaturun orqanizmin qocalma prosesini ləngitməsinə və ömür uzunluğuna müsbət təsir göstərməsinə imkan verən bioloji mexanizmlərdən birini müəyyən ediblər.
AZƏRTAC “The Independent”ə istinadla xəbər verir ki, Köln Universitetinin tədqiqatçıları soyuq temperatur, ömür uzunluğu və hüceyrələrdə zülalların keyfiyyətinə nəzarət edən bioloji proseslər arasında əlaqə aşkar ediblər. Araşdırmanın nəticələri nüfuzlu “Nature” elmi jurnalında dərc olunub.
Əvvəlki tədqiqatlar göstərib ki, mülayim soyuq temperatur ömrü uzada və yaşlanma ilə əlaqədar dəyişiklikləri ləngidə bilər. Lakin bu təsirin hüceyrə səviyyəsində hansı mexanizmlərlə baş verdiyi indiyədək tam aydın deyildi.
Yeni araşdırma zamanı alimlər müəyyən ediblər ki, soyuğun müsbət təsirində əzələ toxumaları və dihidrobiopterin (BH2) adlı üzvi birləşmə mühüm rol oynayır. Tədqiqatçılar elmi araşdırmalarda geniş istifadə olunan “Caenorhabditis elegans” növünə aid mikroskopik qurdlar üzərində təcrübələr aparıblar. Nəticələr göstərib ki, BH2 hüceyrələrdə zülalların düzgün fəaliyyətini təmin edən və onların keyfiyyətini qoruyan proseslərdə əsas rol oynayır. Alimlər bu mexanizmi Hantinqton xəstəliyi və amiotrofik lateral skleroz (ALS) ilə əlaqəli insan hüceyrə modellərində də sınaqdan keçiriblər. Hər iki xəstəlik hüceyrələrdə düzgün formalaşmamış və ya zədələnmiş zülalların toplanması ilə əlaqələndirilir.
Bununla belə, araşdırmanın nəticələri soyuq mühitdə qalmağın insan ömrünü uzatdığını hələ sübut etmir. Bunun üçün insanlar üzərində əlavə tədqiqatların aparılması tələb olunur.
Bölmənin digər xəbərləri
