647 balla BDU-ya qəbul oldu, Almaniyada oxudu, indi hərbi xidmətə gedir
Bakı, 30 oktyabr, AZƏRTAC
Vətənə xidmət hər bir gənc üçün həm mənəvi məsuliyyət, həm də şərəf məsələsidir. Bu məsuliyyəti dərk edərək hərbi xidmətə yollanan gənclərdən biri də 24 yaşlı Əli Məmmədovdur. Onun üçün hərbi xidmətə başlamaq sadəcə həyatının yeni mərhələsinə qədəm qoymaq deyil, həm də ailəsindən, uşaqlığından və aldığı tərbiyədən gələn Vətən sevgisini əməli şəkildə ifadə etmək, Vətən qarşısında övladlıq borcunu yerinə yetirmək deməkdir.
AZƏRTAC əməkdaşları müddətli həqiqi hərbi xidmətə yollanmağa hazırlaşan gəncin özü və ailəsi ilə görüşərək bu yolun onun üçün nə ifadə etdiyini öyrəniblər.
Səfərbərlik və Hərbi Xidmətə Çağırış üzrə Dövlət Xidməti tərəfindən müddətli həqiqi hərbi xidmətə göndərilən çağırışçılar sırasında olan Əli Məmmədova çağırış vərəqi sentyabrın 2-də gəlib.
Qalib ordunun əsgəri olmaq necə hissdir? Bu sualımıza cavabında onun sözlərində qürur və məsuliyyət hissi aydın sezilir: “Ümumilikdə müsbət hisslər keçirirəm. Qalib orduda xidmət etmək mənim üçün böyük qürurdur. Digər gənclər kimi mən də üzərimə düşən ən ali vəzifələrdən birini yerinə yetirmək istəyirəm. Bu, həqiqətən də fəxr hissidir. Əlbəttə, hərbi xidmət nizam-intizam və böyük məsuliyyət tələb edir. Düşünürəm ki, hər bir Azərbaycan gənci kimi mən də bu vəzifənin öhdəsindən layiqincə gələcəyəm”.
Əlinin Vətənə bağlılığından danışarkən ailəsinin keçmişinə nəzər salmamaq mümkün deyil. Onun ailəsinin Qarabağla bağlı ağrılı xatirələri var. Anası Xankəndidəndir, babası Şuşada doğulub. Ailənin yaxınları arasında Qarabağ uğrunda döyüşənlər, Vətən yolunda şəhid olanlar var. Belə bir ailədə böyüyən Əli üçün Vətən sevgisi yalnız sözlərdən ibarət olmayıb, uşaqlıqdan eşitdiyi söhbətlər, ailəsinin yaşadığı hadisələr və gördüyü nümunələrlə formalaşıb.
“Özüm də Qarabağ bölgəsindənəm. Ailə üzvlərim Vətən uğrunda döyüşlərdə iştirak edib, şəhidlərimiz var. Ona görə də bizim ailədə vətənpərvərlik hissi həmişə yüksək olub. Uşaqlıqdan bu ruhda böyümüşük. Vətənə bağlılıq, torpağa sevgi ailəmizdə daim danışılan mövzulardan olub”, – deyə Əli qeyd edir.
Bu tərbiyənin formalaşmasında ailə ilə yanaşı, məktəbin də mühüm rolu olub. Əli 2008-ci ildə Bakı şəhərindəki 23 nömrəli tam orta məktəbdə təhsil almağa başlayıb. Məktəbi fərqlənmə attestatı ilə bitirib.
“Yaxşı məktəbdə təhsil almışam. Birinci sinifdən Azərbaycanın dövlət rəmzlərini öyrənməyə başlamışıq. Himnimizi əzbərləməklə kifayətlənməmiş, onun mənası, hansı dəyərləri ifadə etməsi barədə də məlumat almışıq. İki il ərzində hərbi hazırlıq dərslərdə iştirak etdik. Müəllimimiz bizə ordu quruculuğu, hərbi xidmət və ilkin hazırlıqla bağlı fundamental biliklər verirdi. Bütün bunlar, təbii ki, Vətənə bağlılıq hissimizin formalaşmasına təsir göstərirdi”, - deyə müsahibimiz uşaqlıq illərini xatırlayır.
Əlinin həyat yolu yalnız vətənpərvərlik tərbiyəsi ilə deyil, təhsilə və biliklərə verdiyi önəmlə də diqqət çəkir. 2019-cu ildə 647 bal Bakı Dövlət Universitetinin Hüquq fakültəsinə daxil olub.
“Təhsil aldığım müddətdə Təhsil Nazirliyinin SABAH qruplarına da qəbul olundum. İkinci kursdan etibarən həmin qruplarda təhsil aldım və 2023-cü ildə universiteti fərqlənmə diplomu ilə bitirdim”, – deyə Əli bildirir.
Ali təhsilini başa vurduqdan sonra bir müddət özəl sektorda çalışan gənc bilik və bacarıqlarını daha da genişləndirmək qərarına gəlib. Bunun üçün xaricdə təhsil almağa hazırlaşıb, bir sıra universitetlərə müraciət edib və qəbul alıb. Nəticədə Almaniyanın nüfuzlu ali təhsil müəssisələrindən biri olan Georg-August Universitetində(Göttingen Universiteti) təhsilini davam etdirib.
Xaricdə təhsilini tamamladıqdan sonra Vətənə qayıdan Əli, qarşısında duran növbəti vəzifənin hərbi mükəlləfiyyətini yerinə yetirmək olduğunu deyir. Bu mərhələni başa vurduqdan sonra qazandığı bilik və təcrübəni ölkəsinin inkişafına yönəltmək istəyir.
“Hərbi xidmətimi başa vurduqdan sonra dövlət sektorunda fəaliyyət göstərmək istəyirəm. Xaricdə qazandığım bilik və bacarıqları, hüquq sahəsində əldə etdiyim təcrübəni ölkəmizin inkişafı üçün istifadə etmək niyyətindəyəm”, – deyə o vurğulayır.
Əlinin anası Təranə Məmmədova böyük qürur keçirdiyini vurğulayır: “Məktəbdə oxuyanda da Əliyə görə təşəkkürnamələr almışam. Onunla hər zaman fəxr etmişəm. Əli hər zaman oxumağa meylli olub. İnanıram ki, əsgərlikdə də öz uğurları ilə hər şeyin öhdəsindən layiqincə gələcək. Ona bir ana kimi ən böyük tövsiyəm isə Vətənə borcunu yerinə yetirərək ailəsinə sağ-salamat qayıtmasıdır”.
Hüquq təhsili almış, Almaniyada ixtisaslaşmış, müxtəlif ölkələrdən olan gənclərlə eyni mühitdə təcrübə qazanmış gənc Əli hərbi xidmətə yollanır. Onun üçün bu, planlarının təxirə salınması deyil, həyat yolunda yerinə yetirilməli olan mühüm bir mərhələdir.
Ailəsinin Qarabağla bağlı xatirələri, məktəb illərində aldığı vətənpərvərlik tərbiyəsi, universitetdə və xaricdə qazandığı biliklər Əlinin həyat hekayəsində bir-birini tamamlayır. İndi isə o, bu yolun yeni mərhələsinə - qalib ordunun sıralarında xidmət etməyə hazırlaşır. Vətənə xidmət onun üçün həm ailəsindən gələn mənəvi miras, həm də müstəqil Azərbaycan vətəndaşı kimi üzərinə götürdüyü məsuliyyətdir.
Bölmənin digər xəbərləri
