Eldar Seyidov: Ağdamda ekoloji zərərin aradan qaldırılması istiqamətində kompleks işlər aparılır
Ağdam, 30 oktyabr, AZƏRTAC
İşğal dövründə Ağdam rayonunun ekoloji sisteminə çox ciddi və ağır zərər vurulub. Bu zərərin əsas göstəriciləri təbii meşələrin, dözümlü ağac növlərinin və xüsusilə əsrlik Şərq çinarlarının kütləvi şəkildə qırılaraq talan edilməsi və ya qəsdən yandırılmasıdır.
Bunu AZƏRTAC-ın bölgə müxbirinə açıqlamasında Ağdam, Füzuli və Xocavənd rayonlarında Azərbaycan Respublikası Prezidentinin xüsusi nümayəndəsinin müavini Eldar Seyidov deyib.
Eldar Seyidov bildirib ki, torpaqlar intensiv şəkildə minalanıb və hərbi sursatlarla çirkləndirilib, bu isə torpağın strukturunu korlayaraq flora və faunanın təbii inkişafını dayandırıb. Su resurslarına gəldikdə isə işğal dövründə Xaçınçay və Qarqarçay kimi çayların axını kəsilib, su anbarları ekoloji təzyiq vasitəsinə çevrilib və tarixi kəhriz şəbəkələri baxımsız qalaraq dağıdılıb.
“Bu ekoloji zərərin aradan qaldırılması istiqamətində hazırda kompleks və ardıcıl işlər aparılır. İlk növbədə, ekoloji bərpanın təməli olan minatəmizləmə fəaliyyəti davam etdirilir. Artıq Ağdam ərazisinin 60 faizi minalardan təmizlənib və 115 mindən çox mina və partlamamış sursat zərərsizləşdirilib. İkinci əsas istiqamət itirilmiş yaşıllıqların bərpasıdır. Bu çərçivədə 125 hektarlıq Ağdam Meşə Parkı, Şəhər Mərkəzi Parkı, habelə Xıdırlı, Sarıcalı, Kəngərli və digər kənd parkları salınır. Su infrastrukturu üzrə isə Xaçınçay su anbarı artıq bərpa edilərək istifadəyə verilib və tarixi kəhrizlərin sistemli bərpası üçün müvafiq konsepsiyalar üzərində çalışırıq”, - deyə E.Seyidov bildirib.
Müxbir – Tahir Ağaməmmədov
Bölmənin digər xəbərləri
