İƏT-ə üzv dövlətlər üçün korrupsiya tədbirləri ilə bağlı tövsiyələr hazırlanıb
Bakı, 30 oktyabr, AZƏRTAC
Cari il oktyabrın 27–28-də Bakı şəhərində Azərbaycan Respublikası Baş Prokurorluğunun təşkilatçılığı ilə İslam Əməkdaşlıq Təşkilatına (İƏT) üzv dövlətlərin korrupsiyaya qarşı mübarizə aparan hüquq-mühafizə orqanları rəhbərlərinin üçüncü Yüksəksəviyyəli Görüşü keçirilib.
AZƏRTAC xəbər verir ki, tədbir çərçivəsində Azərbaycanın Baş Prokurorluğu və Səudiyyə Ərəbistanı Krallığının Nəzarət və Korrupsiyaya Qarşı Mübarizə Orqanının (Nazaha) birgə təşkilatçılığı ilə “Korrupsiyanın ölçülməsinin təkmilləşdirilməsi: Qlobal təşəbbüs çərçivəsində əldə olunan irəliləyişlər və milli perspektiv” mövzusunda xüsusi sessiya təşkil olunub.
Sessiyada korrupsiyanın ölçülməsi sahəsində mövcud beynəlxalq təcrübə, milli qiymətləndirmə mexanizmlərinin təkmilləşdirilməsi, eləcə də antikorrupsiya siyasətinin nəticələrinin obyektiv meyarlar əsasında müəyyən edilməsi məsələləri müzakirə olunub.
İclasda Səudiyyə Ərəbistanı Krallığının Nəzarət və Korrupsiyaya Qarşı Mübarizə Qurumunun, BMT-nin İnkişaf Proqramının, Beynəlxalq Antikorrupsiya Akademiyasının, GlobE Şəbəkəsinin və Azərbaycan Respublikası Baş prokuroru yanında Korrupsiyaya qarşı Mübarizə Baş İdarəsinin nümayəndələri çıxış ediblər.
Baş Prokurorluğun nümayəndələri çıxış zamanı Azərbaycanda korrupsiyaya qarşı mübarizənin vəziyyətinin mütəmadi təhlili, statistik məlumatların və cinayət işlərinin araşdırılması əsasında korrupsiyanı doğuran səbəb və şəraitin müəyyən edilməsi, onların aradan qaldırılması məqsədilə aidiyyəti dövlət qurumlarına təqdimatların verilməsi, habelə antikorrupsiya tədbirlərinin səmərəliliyinin qiymətləndirilməsi üzrə mövcud təcrübə barədə məlumat veriblər. Eyni zamanda, 2022-2026-cı illər üzrə Milli Fəaliyyət Planının icrası, 2027-2029-cu illər üçün yeni Milli Fəaliyyət Planının hazırlanması və korrupsiya risklərinin qiymətləndirilməsi üzrə milli çərçivənin formalaşdırılması istiqamətində görülən işlərə toxunublar.
Bundan başqa, çıxışlarda korrupsiya göstəricilərinin dövlətlərin beynəlxalq nüfuzuna və iqtisadi maraqlarına təsiri nəzərə çatdırılaraq, bu sahədə qiymətləndirmələrin yalnız ictimai qavrayış və rəylərə deyil, etibarlı milli statistikaya, faktiki məlumatlara və elmi əsaslandırılmış metodologiyalara söykənməsinin vacibliyi vurğulanıb. Eyni zamanda, korrupsiyanın ölçülməsinin yalnız mövcud vəziyyətin müəyyənləşdirilməsi ilə məhdudlaşmamalı, həyata keçirilən antikorrupsiya tədbirlərinin real nəticələrinin və institusional dəyişikliklərin qiymətləndirilməsinə xidmət etməli olduğu bildirilib.
Müzakirələrin yekunu olaraq İƏT-ə üzv dövlətlər üçün korrupsiyanın ölçülməsi və antikorrupsiya tədbirlərinin səmərəliliyinin qiymətləndirilməsi üzrə tövsiyələr hazırlanıb.
Sənəd üzv dövlətlərdə bu sahədə vahid yanaşmaların formalaşdırılmasını, milli qiymətləndirmə sistemlərinin beynəlxalq standartlara uyğunlaşdırılmasını, müvafiq dövlət qurumlarının institusional və analitik imkanlarının gücləndirilməsini, habelə rəqəmsal həllərin tətbiqini təşviq edir.
Bununla yanaşı, BMT-nin Narkotiklər və Cinayətkarlıq üzrə İdarəsi, BMT-nin İnkişaf Proqramı (UNDP), Beynəlxalq Antikorrupsiya Akademiyası və digər müvafiq beynəlxalq qurumlarla əməkdaşlığın genişləndirilməsi, İƏT-ə üzv dövlətlərinin beynəlxalq ekspert şəbəkələrində təmsilçiliyinin təşviqi və aidiyyəti beynəlxalq platformalarda mövqelərinin əlaqələndirilməsi nəzərdə tutulur.
Hazırlanmış tövsiyələr korrupsiyaya qarşı mübarizədə sübutlara əsaslanan qərarların qəbul edilməsinə, milli səviyyədə institusional potensialın inkişafına və İƏT çərçivəsində bu sahədə çoxtərəfli əməkdaşlığın möhkəmləndirilməsinə töhfə vermək məqsədi daşıyır.
Bölmənin digər xəbərləri
