CƏMİYYƏT


“Sağlamlıq üçün həmrəylik təşəbbüsü” layihəsinin yekun nəticələri təqdim edilib

Bakı, 20 iyun, Göyçək Mahmudlu, AZƏRTAC

İyunun 20-də Avropa İttifaqının (Aİ) və Ümumdünya Səhiyyə Təşkilatının (ÜST) birgə layihəsi olan “Sağlamlıq üçün həmrəylik təşəbbüsü”nün yekun nəticələri təqdim edilib. 2020-ci ilin aprel ayından etibarən iki ildən artıq bir müddətdə həyata keçirilmiş COVID-19 pandemiyası ilə mübarizəyə dəstək layihəsi Aİ və ÜST-nin Azərbaycana davamlı dəstəyinin tərkib hissəsidir. Layihə gələcəkdə baş verə biləcək pandemiyalara qarşı dayanıqlı cavab potensialının formalaşdırılmasına yardım göstərilməsini hədəfləyir.

AZƏRTAC xəbər verir ki, layihənin bağlanış mərasimində səhiyyə nazirinin müavini Nadir Zeynalov, ÜST-nin Azərbaycandakı nümayəndəsi və ölkə ofisinin rəhbəri Hande Harmancı, Tibbi Ərazi Bölmələrini İdarəetmə Birliyi (TƏBİB) İdarə Heyəti sədrinin müşaviri Firəngiz Əliyeva, Avropa İttifaqının Azərbaycandakı nümayəndəliyinin siyasi məsələlər üzrə müşaviri Çertomir Fisinger, habelə beynəlxalq və yerli tərəfdaşlar, layihə benefisiarları və tibb işçiləri iştirak ediblər.

Tədbirdə çıxış edən Ümumdünya Səhiyyə Təşkilatının Azərbaycandakı nümayəndəsi Hande Harmancının sözlərinə görə, layihə altı Şərq Tərəfdaşlığı ölkəsində - Azərbaycan, Gürcüstan, Ukrayna, Moldova, Belarus və Ermənistanda həyata keçirilib: “Bu gün Azərbaycanda layihənin yekun nəticələrinin təqdim edilməsi mərasimidir. Digər ölkələrdə də yavaş-yavaş yekunlaşmaq üzrədir. Layihə üç fazada həyata keçirildi. Birinci faza avadanlıqların satınalınması, ikinci faza tibb işçiləri üçün təlimlərin keçirilməsi və onların bilik və bacarıqların artırılması, üçüncü faza isə sistemlərin qalıcı olması idi. Belə ki, qurulan sistemlər vasitəsilə ölkənin səhiyyə sisteminin növbəti pandemiyalara hazır olması üçün əlimizdən gələni etməyə çalışdıq. Layihə çərçivəsində əhalinin maarifləndirilməsi də bizim üçün çox önəmli idi. Ümumilikdə, son dərəcə səmərəli və yararlı bir layihə oldu”.

“ÜST olaraq Azərbaycanın səhiyyə sisteminə hər zaman dəstək olmağa hazırıq. Bu, son layihə deyil. Avropa İttifaqı ilə birlikdə layihələrimiz davam edir”, - deyə H.Harmancı qeyd edib.

Avropa İttifaqının Azərbaycandakı nümayəndəliyinin siyasi məsələlər üzrə müşaviri Çertomir Fisinger bildirib ki, layihə COVID-19 pandemiyasının alovlanmasına cavab olaraq başladı və ən həssas insanların tibbi ehtiyaclarını ödəməyə yönəldi: “Pandemiya hər kəsə təsir etdi və beynəlxalq əməkdaşlığın nə qədər vacib olduğunu göstərdi. Qlobal əməkdaşlıq koronavirus pandemiyasının qarşısının alınmasında rol oynadı. Aİ ÜST-lə birlikdə Şərq Tərəfdaşlığı ölkələrinə pandemiyanın nəticələrinin qarşısını almaq üçün yardım məqsədilə iki regional layihə həyata keçirdi. Biri “Sağlamlıq üçün həmrəylik təşəbbüsü”, digəri “COVID-19 vaksini və peyvəndləşmə prosesinə hazırlıq” layihələridir. Bu gün “Sağlamlıq üçün həmrəylik təşəbbüsü” layihəsinin bağlanış mərasimidir. Daha dözümlü səhiyyə sistemlərinin qurulmasına yönələn layihənin müsbət nəticələrinə görə şadıq”.

Səhiyyə nazirinin müavini Nadir Zeynalov kifayət qədər tez planlaşdırma və maliyyələşmə sayəsində layihənin qısa müddətdə başladığını və pandemiya ilə mübarizədə əhəmiyyətli rol oynadığını deyib. Layihənin adının təsadüfi olmadığını deyən nazir müavini pandemiyaya qalib gəlmək üçün həmrəyliyin vacibliyindən söz açıb.

“Sağlamlıq üçün həmrəylik təşəbbüsü” layihəsi milli səhiyyənin COVID-lə mübarizədə apardığı işlərə dəstək verib. Layihə çərçivəsində avadanlıq və tibbi ləvazimatlar ölkəyə gətirilib. Bundan başqa, xəstələrin izlənilməsi və epidemioloji təhlilin aparılması üçün lazım olan elektron vasitələr təqdim olunub. Layihənin çox vacib və dayanıqlı nəticə verən hissəsi təlimlərin təşkil olunmasıdır. Tibb işçiləri, tibb tələbələri üçün aparılan silsilə təlimlər onların COVID-lə bağlı olan bilik və bacarıqlarını artırıb. Layihənin verdiyi töhfələri Səhiyyə Nazirliyi olaraq yüksək qiymətləndiririk. Onun həyata keçirilməsində əziyyəti keçən hər kəsə minnətdarıq”, - deyə N.Zeynalov qeyd edib.

TƏBİB-in İdarə Heyəti sədrinin müşaviri Firəngiz Əliyeva layihə çərçivəsində müharibənin təsirinə məruz qalmış bir neçə rayonda əhaliyə tibbi xidmətlər göstərildiyini, həmin ərazilərdəki xəstəxanaların tibbi ləvazimatlarla təchiz edildiyini bildirib.

“Azərbaycanın ən böyük uğuru pandemiyaya tək səhiyyə sahəsinin deyil, ölkənin problemi kimi yanaşması və bütün qurumların koordinasiyalı şəkildə işləməsi oldu. Bununla yanaşı, beynəlxalq qurumların bizimlə olması sevindirici idi”, - deyə F.Əliyeva vurğulayıb.

Daha sonra layihə haqqında videoçarxlar nümayiş etdirilib və yekunları ilə bağlı hesabat təqdim olunub.

Layihə rəhbəri Tural Qulu “Sağlamlıq üçün həmrəylik təşəbbüsü”nün həyata keçirildiyi dövr ərzində əldə edilmiş nailiyyətlərdən bəhs edən təqdimatla çıxış edib. Qeyd edilib ki, layihənin həyata keçirildiyi müddətdə 521 tibb avadanlığı, o cümlədən 6 ventilyator və 1 BiPAP cihazı, 81 pasiyent monitoru, 141 oksigen konsentratoru və 229 nəbz oksimetri layihə çərçivəsində milli tərəfdaşlara təhvil verilib. Eyni zamanda, COVID-19 ilə ön cəbhədə mübarizə aparanların sağlamlığını qorumaq üçün 1 milyondan artıq fərdi mühafizə vasitəsi və 17 min 600 əl gigiyenası ləvazimatı ölkənin tibb müəssisələrinə təqdim edilib.

COVID-19 ilə mübarizə potensialının gücləndirilməsi məqsədilə 7800 tibb işçisi, tibb tələbəsi, ictimaiyyətlə əlaqələr üzrə mütəxəssis və media nümayəndəsi müvafiq təlimlərə cəlb edilib. Bununla yanaşı, ÜST-nin “OpenWHO” onlayn təlim platformasının Azərbaycan səhifəsi istifadəyə verilib. Qısa müddət ərzində təlim platformasında azərbaycanlı tibb işçiləri tərəfindən qeydiyyatdan keçilən kursların sayı 10 dəfə artaraq 18 minə çatıb.

Layihə çərçivəsində COVID-19 pandemiyası ilə mübarizə və cavab tədbirlərinin gücləndirilməsi məqsədilə müxtəlif istiqamətlərdə milli səhiyyə tərəfdaşlarına texniki dəstək göstərilib. COVID-19 hallarının idarə edilməsi üzrə təlimatın yenilənməsi və infeksiyanın profilaktikası və nəzarət (İPN) üzrə İşçi Qrupunun yaradılması və fəaliyyəti dəstəklənib. Layihə tərəfindən 23 tibb müəssisəsi İPN üzrə, 5 tibb müəssisəsi COVID-19 hallarının idarəolunması, 7 tibb müəssisəsi oksigen təchizatı və istifadəsi üzrə qiymətləndirilib və müvafiq tövsiyələr verilib. “Sağlamlıq üçün həmrəylik təşəbbüsü” ilə ölkənin iki ən böyük psixi sağlamlıq müəssisəsinə doqquz ay ərzində psixoloqlar və sosial işçilər tərəfindən psixoloji yardım və psixo-sosial dəstək verilib.

Benefisiarların çıxışları dinlənilib, açıq müzakirələr aparılıb. Tədbirdə Səhiyyə Nazirliyi, İcbari Tibbi Sığorta üzrə Dövlət Agentliyi, TƏBİB və digər milli tərəfdaşlara dəstək olaraq ölkədə COVID-19 pandemiyasına hazırlıq və cavab tədbirləri istiqamətində görülən işlərin əhəmiyyəti vurğulanıb. Qeyd edilib ki, Aİ-ÜST layihələri bundan sonra da Azərbaycanın səhiyyə sisteminə dəstək olaraq ölkə əhalisinin sağlam gələcəyinin təmin edilməsinə öz töhfəsini verəcək.

Sonda Aİ, ÜST, TƏBİB və Aİ, ÜST və Səhiyyə Nazirliyi arasında təhvil-təslim aktlarının imzalanması mərasimi keçirilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.