SİYASƏT


Səttar Möhbalıyev: Azərbaycan ilə Litva arasında əlaqələr uğurla inkişaf etməkdədir

Bakı, 20 may, AZƏRTAC

Azərbaycanın xarici siyasi strategiyasının mühüm istiqamətlərindən birini Avropa ölkələri ilə münasibətlər təşkil edir. Bu çərçivədə Azərbaycan ilə Litva arasında bir çox istiqamətlərdə, o cümlədən siyasi, iqtisadi-ticari, turizm, mədəniyyət, təhsil sahələrində əməkdaşlıq dinamik inkişaf etməkdədir. Yeri gəlmişkən, xatırladım ki, Litva Azərbaycanın müstəqilliyini tanıyan ilk ölkələrdən biri olub. İkitərəfli münasibətlərdə möhkəm hüquqi baza formalaşdırılıb, bir sıra mühüm sənədlər imzalanıb. Hər iki ölkə daim əlaqələrin inkişafında maraqlı olduqlarını nümayiş etdirir və bu istiqamətdə fəallıq nəzərəçarpacaq dərəcədə yüksəkdir. Dövlət başçıları səviyyəsində qarşılıqlı səfərlər bu əlaqələri daha da möhkəmləndirir. Bu istiqamətdə mayın 18-də Litva Prezidenti Gitanas Nausedanın ölkəmizə rəsmi səfəri çox böyük əhəmiyyət daşıyır. Bu səfər ikitərəfli əlaqələrimizin inkişafına mühüm töhfə verəcək. Həmçinin bu səfər bütün sahələrin, xüsusilə iqtisadi əməkdaşlığımızın daha da dərinləşməsi baxımından böyük rol oynayacaq. Azərbaycanda əlverişli biznes mühitinin mövcudluğu hamıya aydındır. Bu, litvalı investorlar üçün də çox cəlbedicidir. Azərbaycan-Litva biznes forumunun keçirilməsi, bu aspektdə müzakirələrin aparılması və mühüm sənədlərin imzalanması hər iki ölkə üçün son dərəcə əhəmiyyətlidir”.

Bu fikirləri Azərbaycan Həmkarlar İttifaqları Konfederasiyasının (AHİK) sədri, Milli Məclisin deputatı Səttar Möhbalıyev AZƏRTAC-a açıqlamasında deyib.

S.Möhbalıyev dövlətimizin başçısı İlham Əliyevin Azərbaycan-Litva biznes forumunda səsləndirdiyi bir sıra məqamlara diqqət çəkib. Bildirib ki, Azərbaycan dünyanın, eləcə də Avropanın enerji təhlükəsizliyinin təmin olunmasında aparıcı dövlətlərdən birinə çevrilib. Həyata keçirilən uğurlu layihələr, o cümlədən nəhəng Cənub Qaz Dəhlizinin reallaşdırılması bunu deməyə imkan verir. Əgər ölkəmizdə əvvəllər neft-qaz sektoru investisiya üçün daha çox cəlbedici idisə, aparılan uğurlu islahatlar nəticəsində artıq bu gün qeyri-neft sahəsi də xarici şirkətlərin maraq dairəsindədir. Prezidentimizin ifadə etdiyi kimi, Azərbaycan iqtisadiyyatının şaxələndirilməsi prioritet təşkil edir. Təbii ki, bu da ölkə iqtisadiyyatının hərtərəfli inkişafı və dayanıqlı olması baxımından çox vacibdir. Son dörd ayda ölkə iqtisadiyyatında 7,2 faiz artımın müşahidə olunması, xüsusən bunun qeyri-neft sektorunda 11,4 faiz təşkil etməsi, həmçinin ixrac potensialının yüksəlməsi, işsizlik səviyyəsinin xeyli aşağı düşməsi, Azərbaycanın iqtisadi qüdrətinin artan tempini bir daha təsdiqləmiş olur. Bütün bu məqamlar dövlətimizin başçısı İlham Əliyevin rəhbərliyi ilə həyata keçirilən səmərəli islahatların faydalı nəticələridir.

“Azərbaycan və Litva prezidentlərinin mətbuata bəyanatları zamanı dövlətimizin başçısı ölkəmizin mövqeyini bir daha ortaya qoydu: Cənubi Qafqazda sülh, əməkdaşlıq və qarşılıqlı fəaliyyət. Bu, onu göstərir ki, ölkəmiz bölgədə davamlı sülhün, sabitliyin, təhlükəsizliyin və əməkdaşlığın tərəfdarıdır. Təbii ki, Azərbaycanın bölgədə yaratdığı yeni reallıqlar da buna əsaslanır. Odur ki, 30 ilə yaxın müddətdə özünün işğal siyasəti ilə regionu iflic edən, onun inkişafına mane olan Ermənistandan fərqli olaraq Azərbaycanın mövqeyi sülh və təhlükəsizlik şəraitində qarşılıqlı əməkdaşlıqla bölgənin hərtərəfli tərəqqisinə hesablanıb”, - deyə Milli Məclisin deputatı bildirib.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.