Tovuz, 16 oktyabr, Famil Quliyev, AZƏRTAC

Cari ilin doqquz ayında Tovuzda kənd təsərrüfatı sahəsində məhsul istehsalı 6,1 faiz artıb. Ümumilikdə, rayon üzrə 290 min 244 ton kənd təsərrüfatı məhsulları istehsal olunub ki, bu da ötən ilin müvafiq dövrü ilə müqayisədə 6,1 faiz çoxdur.

AZƏRTAC xəbər verir ki, bu faktlar oktyabrın 16-da Tovuz Rayon İcra Hakimiyyətində cari ilin doqquz ayının sosial-iqtisadi inkişafının yekunları və qarşıda duran vəzifələrlə bağlı keçirilən şura iclasında səsləndirilib.

Rayon icra hakimiyyətinin başçısı Tofiq Zeynalovun hesabat məruzəsində bildirilib ki, ötən ildən rayonda kənd təsərrüfatının ənənəvi sahələrinin dirçəldilməsinə başlanılıb. Cari mövsümdə 6 min 870 kiloqram barama tədarük edilib. Bu sahədə keçən ilə nisbətən 4,4 dəfə artım əldə olunub. Gələn il barama istehsalının 10 tona çatdırılması planlaşdırılıb. Tütün əkini sahələri əvvəlki ilə nisbətən 2,5 dəfə artırılaraq, 50 hektara çatdırılıb. Bu günə kimi tütünçülər 140 tondan çox yaşıl tütün istehsal edib və tədarük məntəqələrinə 14 tona yaxın qurudulmuş tütün təhvil veriblər.

Qeyd olunub ki, cari mövsümdə rayon ərazisində 410 hektar sahədə şəkər çuğunduru əkilib. Hazırda çuğundur sahələrində məhsul yığımı davam edir. İndiyədək İmişli şəkər zavoduna 2 min tona yaxın məhsul təhvil verilib.

Bu ilin məhsulu üçün rayonda 20 min 376 hektar dənli bitkilər əkilib. Bunun da 19 min 526 hektarı ərzaq buğdasıdır. Ötən illə müqayisədə dənli bitkilərin əkin sahələri 2 dəfə, o cümlədən ərzaq buğdası əkini 1,9 dəfə artıb. Payızlıq və yazlıq dənli bitkilərdən 65 min 204 ton məhsul götürülüb ki, bu da ötən illə müqayisədə 2 dəfə çoxdur. Payızlıq dənlilərin orta məhsuldarlığı 32 sentner, ərzaq buğdasının məhsuldarlığı isə 32,3 sentnerdir.

Həmçinin cari ildə 14 min 72 ton meyvə, 6 min 281 ton üzüm istehsal olunub ki, bu da ötən ilin müvafiq dövrü ilə müqayisədə xeyli çoxdur və məhsul yığımı davam etdirilir. İstehsal olunan kənd təsərrüfatı məhsullarının xarici bazarlara çıxarılması istiqamətində də lazımi işlər aparılır. Bunun nəticəsində hesabat dövründə xarici bazarlara 15 milyon 540 min manat dəyərində 31 min 620 ton məhsul göndərilib.

Diqqətə çatdırılıb ki, Tovuz şəhərində sənaye zonasının yaradılması bütün infrastrukturla əhatə olunmuş 10 hektar torpaq sahəsi ayrılıb və İqtisadiyyat Nazirliyinə müraciət olunub. Bundan əlavə, rayonda aqroparkın yaradılması istiqamətində də iş aparılır. Bu məqsədlə Ceyrançöl qışlağında 550 hektar sahə ayrılıb və orada yem bitkiləri əkilməsi üçün işlərə başlanılıb. Həmin ərazidə 1000 başlıq heyvandarlıq kompleksinin tikintisinə hazırlıq görülür.

Rayonda 1551 yeni iş yeri açılıb ki, bunun da 951-i daimidir.

Məruzədə bildirilib ki, rayonda dövlət başçısının müvafiq sərəncamları əsasında yol infrastrukturunun yaxşılaşdırılması istiqamətində mühüm işlər görülüb. İlin əvvəlindən bəri Qovlar-Əyyublu-Alakol-İbrahimhacılı-Qoçdərə-Çobansıxnaq-Yoğunbulaq-Sarıtala avtomobil yolunun Qovlar-Əyyublu-Alakol hissəsində yenidən qurma işləri tamamlanıb, digər hissədə işlər davam etdirilir. Bu günlərdə Yuxarı Öysüzlü-Vahidli-Ağdam, Əlibəyli-Hacallı, Əsrik Cırdaxan-Kirən-Baqallı kəndlərarası yolların əsaslı təmirinə başlanması nəzərdə tutulur.

Hesabat yığıncağında təhsil, səhiyyə, mədəniyyət və digər sahələrdə görülən işlər də ətraflı müzakirə olunub.