REGİONLAR


Tur-aksiyalar məktəblilərə ölkəmizin bu gününü və keçmişini daha dərindən öyrənmək imkanı verir

İmişli, 26 mart, Mahir Babayev, AZƏRTAC

“Ölkəmizi tanıyaq” layihəsi çərçivəsində təşkil edilən tur-aksiyanın İmişlidən olan iştirakçıları martın 26-da sübh tezdən rayondakı Heydər Əliyev parkına toplaşmışdılar. Gəncə-Şəmkir-Göygöl marşrutu üzrə qərb bölgəsinə səfər edən imişlili məktəbliləri rayon icra hakimiyyəti və təhsil şöbəsinin rəhbər işçiləri, valideynlər yola salıblar.

AZƏRTAC-ın bölgə müxbiri xəbər verir ki, məktəblilər əvvəlcə ümummilli lider Heydər Əliyevin abidəsi önünə gül dəstələri qoyaraq, xatirəsini ehtiramla yad ediblər. Sonra aksiya iştirakçıları şəhərdəki Heydər Əliyev Mərkəzində Ulu Öndərin həyat və fəaliyyətinin ayrı-ayrı məqamlarını əks etdirən fotoşəkil və sənədlərlə tanış olublar.

Qrup rəhbəri, rayon icra hakimiyyətinin əməkdaşı Namiq Ağacanov səfər proqramı barədə məlumat verərək deyib: “Prezident İlham Əliyevin tövsiyəsinə əsasən keçirilən maarifləndirici tur-aksiya çərçivəsində İmişlinin ümumtəhsil məktəblərinin IX-XI sinif şagirdləri dörd gün ərzində Gəncə, Şəmkir, Göygöl rayonlarının görməli yerləri, tarixi abidələri, sosial-iqtisadi inkişafı ilə yaxından tanış olacaqlar. Azərbaycanın regionları ilə tanışlıq məktəblilərdə vətənpərvərlik hissinin formalaşmasında əvəzsiz rol oynayır”.

Tur-aksiya iştirakçısı, İmişli şəhər 5 nömrəli tam orta məktəbin IX sinif şagirdi Elcan Əmiraslanov ekskursiyadan zəngin təəssüratla qayıdacaqlarına əmin olduğunu bildirib.

Sonda şagirdlər xüsusi avtobusla Gəncə-Şəmkir-Göygöl marşrutu istiqamətində yola çıxıblar.

X X X

“Ölkəmizi tanıyaq” devizi ilə keçirilən tur-aksiyaya qoşulan məktəblilər arasında Hacıqabul rayonunun təmsilçiləri də var. Rayonun ümumtəhsil məktəblərinin IX-XI sinif şagirdləri və onları müşayiət edən müəllimlər Quba-Qusar-Xaçmaz marşrutu üzrə ekskursiyaya yollanıblar.

Yola düşməzdən əvvəl aksiya iştirakçıları ulu öndər Heydər Əliyevin abidəsi önünə gül dəstələri düzərək, xatirəsini ehtiramla yad ediblər. Sonra məktəblilər Heydər Əliyev Mərkəzində Ümummilli Liderin həyat və fəaliyyətini əks etdirən fotoşəkil və sənədlərlə tanış olublar.

Rayon icra hakimiyyəti və təhsil şöbəsinin məsul işçiləri, valideynlər 40 şagird və 5 nəzarətçi müəllimdən ibarət olan qrupu icra hakimiyyətinin binası qarşısındakı meydandan yola salıblar.

Qrupun rəhbəri Elvin Şıxəliyev bildirib ki, Prezident İlham Əliyevin tövsiyəsi ilə keçirilən tur-aksiyanın iştirakçıları dörd gün ərzində Quba, Qusar, Xaçmazın görməli yerləri ilə tanış olacaq, dünyagörüşlərini artıracaqlar.

Hacıqabul şəhər 1 nömrəli tam orta məktəbin müəllimi Loğman Səmədov isə deyib ki, tur-aksiya təkcə regionlarla tanışlıq məqsədi daşımır, həm də səfər zamanı şagirdlər və müəllimlər təcrübə mübadiləsi etmək imkanı qazanacaqlar.

Tur-aksiya iştirakçısı, dərs əlaçısı, Hacıqabul şəhər 10 nömrəli tam orta məktəbin X sinif şagirdi Lalə Əsədova sevincini belə ifadə edib: “Bizi maraqlı ekskursiya gözləyir. Quba, Qusar, Xaçmaz rayonlarının qədim tarixi, adət-ənənələri, mədəniyyəti ilə tanış olmaq imkanı yaratdığı üçün dövlətimizin başçısına minnətdarlığımızı bildiririk. Azərbaycanın dilbər guşələrinə səyahət etmək çoxdankı arzum idi.”

Sonra məktəblilər onlar üçün ayrılmış avtobusla Qubaya yola düşüblər.

X X X

Maarifləndirici tur-aksiyada iştirak edən biləsuvarlı məktəblilər də Quba-Qusar-Xaçmaz marşrutu istiqamətində yola çıxıblar.

Yolasalma mərasimində rayon rəhbərliyi, müəllim və valideynlər iştirak ediblər.

Tur-aksiya iştirakçıları əvvəlcə ümummilli lider Heydər Əliyevin abidəsi önünə gül dəstələri düzərək, dahi rəhbərin xatirəsini ehtiramla anıblar.

Qrupun rəhbəri, rayon icra hakimiyyətinin əməkdaşı Səbinə Hüseynzadə bildirib ki, “Ölkəmizi tanıyaq” maarifləndirici tur-aksiyası gənclərə dövlət qayğısının təzahürüdür. Maarifləndirici tur-aksiya təkcə regionlarla tanışlıq məqsədi daşımır. Səfər zamanı şagirdlər müxtəlif maraqlı tədbirlərdə iştirak etmək imkanı da əldə edəcəklər.

Sonda biləsuvarlı məktəblilər xüsusi avtobusla Quba-Qusar-Xaçmaz marşrutu istiqamətində ekskursiyaya yollanıblar.

X X X

Maarifləndirici tur-aksiyada iştirak edənlər arasında cəbrayıllı məcburi köçkün məktəblilər də var.

Biləsuvarda cəbrayıllı məcburi köçkünlər üçün salınmış qəsəbədə yerləşən rayon icra hakimiyyətinin qarşısındakı meydanda bu münasibətlə yolasalma mərasimi keçirilib.

Tur-aksiya iştirakçıları, onları yola salan rayon icra hakimiyyəti və təhsil şöbəsinin rəhbər işçiləri, valideynlər ulu öndər Heydər Əliyevin qəsəbədəki abidəsini və şəhidlərin xatirə kompleksini ziyarət ediblər.

Rayon icra hakimiyyəti başçısının humanitar məsələlər üzrə müavini Fəridə İbayeva səfər proqramı barədə məlumat verərək deyib ki, Prezident İlham Əliyevin tövsiyəsinə əsasən keçirilən maarifləndirici tur-aksiya çərçivəsində Cəbrayılın ümumtəhsil məktəblərinin IX-XI sinif şagirdləri dörd gün ərzində Quba-Qusar-Xaçmaz rayonlarının tarixi abidələri, sosial-iqtisadi inkişafı və əsrarəngiz təbiəti ilə yaxından tanış olacaqlar. Tur-aksiya məktəblilərə ölkəmizin bu gününü və keçmişini daha dərindən öyrənmək imkanı verir.

Məktəblilər Tural Kərbalıyev və Elcan Məmmədli ekskursiyadan zəngin təəssüratlarla qayıdacaqlarına əmin olduqlarını bildiriblər.

Sonra şagirdlər xüsusi avtobusla Quba-Qusar-Xaçmaz marşrutu istiqamətində yola çıxıblar.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.