QAN YADDAŞI


“Xocalı soyqırımını xatırlamaq” mövzusunda onlayn dəyirmi masa keçirilib

Bakı, 22 fevral, AZƏRTAC

Banqladeşin Samoy Televiziyasının əməkdaşı, jurnalist Marzia Rahman Mumunun təşkilatçılığı ilə “Xocalı soyqırımını xatırlamaq” mövzusunda onlayn dəyirmi masa keçirilib.

Diasporla İş üzrə Dövlət Komitəsindən AZƏRTAC-a bildiriblər ki, jurnalistin özünün moderatorluğu ilə baş tutan tədbirdə Banqladeş Beynəlxalq Cinayətlər Məhkəməsinin sabiq prokuroru Barrister Tureen Afroz, Barselona Vəkillər Kollegiyasının üzvü Xaviyer Medina Ortiz, Azərbaycanın Milli Qəhrəmanı Füzuli Rüstəmovun yaxın qohumu, Xocalı sakini Mərhəmət Həsənzadə, Azərbaycan Diaspor Gəncləri şəbəkəsinin üzvü, Azərbaycan Diaspor Gəncləri platformasının İndoneziya üzrə koordinatoru Leyla Qarayeva iştirak ediblər.

Tədbirin əvvəlində B.T.Afroz Xocalı qurbanlarına və onların ailə üzvlərinə dərin hüznlə başsağlığı verərək, 29 il öncə baş verənləri insanlıq tarixinə, bəşəriyyətə utanc adlandırıb. Kütləvi qırğın zamanı Cenevrə Konvensiyasının kobudcasına pozulduğunu və cinayət faktı olduğunu nəzərə çatdıran banqladeşli natiq Xocalıya ədalət tələb etməyin vacibliyini vurğulayıb.

X.M.Ortiz bu faciənin tanıdılması üçün İspaniyada, xüsusilə də Barselonada həyata keçirdikləri fəaliyyətdən bəhs edib. Qeyd edib ki, ermənilər özlərini qurban, Azərbaycanı isə işğalçı kimi qələmə verməklə müxtəlif uydurmalarla yerli ictimaiyyəti çaşdırmağa çalışırlar. Lakin Kataloniyadakı erməni lobbisinin güclü cəhdlərinə baxmayaraq, yerli ictimaiyyət hər zaman Azərbaycanın haqlı mövqeyini müdafiə edir. Sonda ispaniyalı vəkil 44 günlük Vətən müharibəsində qazandığı Qələbəyə görə xalqımızı təbrik edib.

M.Həsənzadə Xocalıda baş verən dəhşətli cinayətlərdən, dayısının qəhrəmanlıqla həlak olmasından, L.Qarayeva isə bu qəddar cinayətin erməni hərbi birləşmələri və terrorçu qrupları tərəfindən əvvəlcədən planlaşdırılaraq həyata keçirildiyindən danışıb. Onlar dünya ictimaiyyətini və beynəlxalq birliyi bu soyqırımı aktına biganə qalmamağa, “Xocalıya ədalət!” tələbini dəstəkləməyə çağırıblar.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.