CƏMİYYƏT
® Aqil Məmiyev: Onlayn reputasiyanın qurulması sistemli və müntəzəm iş tələb edir
Bu günün tələbatına uyğun olaraq reputasiya demək olar ki, hər şeydir. Nəhəng bizneslər, layihələr məhz reputasiya üzərində qurulur. “Millionaire Concept" və “Reputation” şirkətlər qrupunun təsisçisi, iş adamı Aqil Məmiyevlə internet və sosial medianın verdiyi imkanlardan istifadə edərək reputasiyamızı inkişaf etdirməyin yollarından və şəxsi brendinq haqqında həmsöhbət olduq. Beynəlxalq səviyyəli layihələrə imza atmaqla dünyanın bir çox ölkəsində həyata keçirdiyi işlərlə adından söz etdirən Aqil Məmiyev reputasiyanın şəxsi inkişafda önəmli faktor olduğunu qeyd edib.
- Onlayn reputasiya nədir və hansı üstünlükləri var?
- Real həyatda ilk dəfə tanış olduğumuz insanların yaratdığı ilkin təəssüratda olduğu kimi virtual aləmdə də reputasiyanın gələcəyi axtarış platformalarında insanların qarşısına çıxan ilkin məlumatlardan asılıdır. İnternet əsrində yaşadığımızı və hər şeyin əlçatan olduğunu nəzərə alsaq, illərini müəyyən bir sahəyə həsr etmiş, kifayət qədər təcrübəli bir mütəxəssis adını axtarış platformasına vuranda adı çıxmırsa, o bu barədə ciddi düşünməlidir. İndi uğurlu imic yaratmağın əsas şərtlərindən biri onlayn reputasiyadır. Dövrün tələbatlarına uyğun olaraq xüsusilə də, pandemiyadan sonra onlayn sistemə sürətli keçid etdiyimiz üçün müştərilər qərar verməzdən öncə axtarış edir. Onlayn reputasiya düzgün qurulmadan uğurlu şəxs, marka və ya şirkət olaraq bazarda tab gətirmək mümkün deyil. Şəxsin məqsədlərinə nail olması üçün reputasiya zamanında başladılmalı və davamlı olmalıdır. Öz reputasiyamızı inkişaf etdirməyimiz, mütəxəssis olduğumuz sahədə tanınmağımız gələcəyimiz üçün etdiyimiz ən yaxşı investisiyadır. Gələcək müqəddəratımızı hansısa şirkətə, şəxsə, rəhbərə etibar edib kölgədə qala bilmərik.
- Şəxsi brendinqdə PR-dan necə düzgün şəkildə istifadə edək ki, mənfi təsirini görməyək?
- Təbii ki, PR şəxsi brendinqin qurulmasında vacib rol oynayır. Amma PR-dan düzgün şəkildə istifadə etməsəniz bu siz və fəaliyyətinizə zərər vuracaq. Şəxsi brendini quran şəxs bilməlidir ki, bu çox həssas məsələdir. O, verilən hər sualı cavablandırmalı, hər mükafatı və dəvəti qəbul etməli deyil. Bu mövzuda söz sahibi olan, özünü yaxşı mənada sübut etmiş şirkətlərlə işləmək vacibdir. Uzun müddət bu sahədə olduğum üçün deyə bilərəm ki, bəzən müştərilər uğurlu reputasiya ilə məşhurluğu qarışdırırlar. Ucuz PR bəzən şəxsin düşməninə çevrilə bilər. Yüksəliş gözləyərkən bunun tam əksi ilə qarşılaşa bilər. Bu zaman müvəqqəti də olsa, hədəf qrupları aldatmaq olar, lakin reputasiyanın inkişafı ilə bağlı qərar verən qrupları aldatmaq olmaz.
- Reputasiyamızın daha sürətli inkişafında media hansı rol oynayır?
- Şirkət olaraq bizə son zamanlar şəxsi reputasiyanın qurulması üçün müraciət edənlər sırasında səhiyyə sektorunun nümayəndələri üstünlük təşkil edir. Bunu nəzərə alaraq “Millionaire Concept” olaraq “Health News” saytını yaratdıq. Hazırda şirkətimiz tərəfindən ildə bir neçə dəfə qlobal səviyyədə tədbirlər təşkil olunur. 29-30 oktyabr tarixlərində “Four Season” hoteldə təşkil olunacaq növbəti layihə də məhz tibb ilə bağlı olacaq. Layihə yerli və xarici səhiyyə nümayəndələrini bir araya gətirəcək.
- Onlayn reputasiya ilə bağlı sizə müraciət edən şəxslər hansı tövsiyələrinizi verirsiniz? Necə bir plan tərtib edirsiniz?
- Onlayn reputasiyanın qurulması sistemli və müntəzəm bir iş tələb edir. Bazar araşdırılması edərək, həmin şəxslərin fəaliyyəti ilə yaxından tanış olaraq, həmin şəxslər üçün vacib məqamlardan ibarət olan bir plan hazırlayırıq. İlk növbədə “Google” axtarış sistemində təsir gücünün artırılması lazımdır. Həm internet resurslarında, həm də “Google” bilgi panelində məlumat qutusunun yaradılması çox vacibdir. Daha sonra mediada tanıtımın həyata keçirilməsi, PR strategiyanın aparılması gəlir. Bu bölməyə həm yerli, həm də xarici media orqanlarında publikasiyalar və müxtəlif xəbərlər aiddir. İlk mərhələdə xəbərlər nüfuzlu və vacib yerli saytlarında, daha sonra isə xarici saytlara dərc olunur. Rəqəmsal brendinq də planımızın ayrılmaz hissəsidir. Rəqəmsal məhsulların yenilənməsi və ya sıfırdan hazırlanması. Daha sonra şəxsi veb-saytın hazırlanmasını qeyd edə bilərəm. Veb-saytın olması bu rəsmilik və statusdan xəbər verir.
- Son zamanlar "Storitellinq" üsulu artıq trendə çevrilib. Bu üsul necə işləyir və faydası nədən ibarətdir?
- Storitellinq - brend, şəxs və ya onun məhsulu haqqında məlumatı auditoriyaya hekayə şəklində təqdim edən bir marketinq üsuludur. Belə hekayələr şirkətlər, şəxslər, məhsul, xidmət və s. haqqında yazılır. Hekayələr insanlar tərəfindən maraqla qarşılanır, yadda qalır və paylaşılır. Hekayə ilə tanınmaq, fəaliyyəti haqqında danışmaq istəyən şəxs mütləq ki, faydalı əlaqələr qazanmalı, mediada müxtəlif pozitiv xəbərlərlə gündəmə gəlməli, sahəsinə uyğun olan vacib tədbirlərdə, layihələrdə yer almalıdır.