"Dünyanın xilaskarı" haradadır?
Bakı, 1 aprel, AZƏRTAC
Luvr Muzeyinin Birləşmiş Ərəb Əmirliklərindəki (BƏƏ) filialının əməkdaşları İntibah dövrünün dahi rəssamı Leonardo da Vinçinin burada nümayiş etdirilməsi nəzərdə tutulan "Dünyanın xilaskarı" əsərinin harada olduğunu bilmirlər. AZƏRTAC xəbər verir ki, bu barədə "The New York Times” qəzeti yazıb.
Nəşrin məlumatına görə, həmin əsəri 2018-ci ilin sentyabrında Luvrun Əbu-Dabi filialında nümayiş etdirmək planları izahatsız ləğv edilib. Əbu-Dabi Mədəniyyət və Turizm Departamenti vəziyyətə aydınlıq gətirməkdən boyun qaçırıb. Luvrun Əbu-Dabi filialının adlarının çəkilməsini istəməyən əməkdaşlarının sözlərinə görə, onlar tablonun harada olduğunu bilmirlər.
Qəzet yazır ki, “Dünyanın xilaskarı”nın yerini Luvr Muzeyi də müəyyənləşdirə bilməyib. Luvrla və Əbu-Dabi filialının nümayəndələri arasında məsləhətləşmələrdən xəbərdar olan şəxslər bu informasiyanı təsdiq ediblər. Fransanın hakimiyyət orqanları tablonun tapılacağına ümid bəsləyirlər.
Məqalədə rəssamlıq sahəsində bir sıra ekspertlərin sözləri sitat gətirilib. Onların bəzilərinin fikrincə, tablonun müəllifinin Leonardo da Vinçi olması şübhə doğurur.
"Dünyanın xilaskarı" əsəri 2017-ci ilin noyabrında Nyu-Yorkda, "Christie's" hərracında 450 milyon dollara satılıb. Onu hərraca rusiyalı milyarder Dmitri Rıbolovlev çıxarıb. O, bu tablonu 2013-cü ildə isveçrəli art-diler İv Buvyedən 127,5 milyon dollara alıb. Nəşrin yazdığına görə, tablonun yeni sahibi Səudiyyə Ərəbistanı şahzadəsi Bədr bin Abdulla bin Məhəmməd bin Fərhan Al Səud olub. Lakin sonralar "Christie's"-dən bildiriblər ki, tablo Əbu-Dabi Mədəniyyət və Turizm Departamentinə satılıb.
Luvr Muzeyinin Əbu-Dabi filialı 2018-ci ilin noyabrında öz qapılarını incəsənətsevərlərin üzünə açıb. Burada təqribən 600 incəsənət əsəri nümayiş etdirilir. Onların çoxu başqa muzeylərdən, o cümlədən Fransanın 13 muzeyindən - Luvrdan, Jorj Pompidu Mərkəzindən, Versaldan və s. muzeylərdən alınıb.
Bölmənin digər xəbərləri
