ABŞ-ın sutkalıq neft hasilatı 10,7 milyon barrelə çatıb
Bakı, 10 may, AZƏRTAC
ABŞ-ın gündəlik neft istehsalı 10,7 milyon barrelə çatıb.
AZƏRTAC xəbər verir ki, bu barədə ABŞ-ın Enerji İnformasiya Administrasiyasının (EIA) məlumatında deyilir.
Bildirilir ki, ötən hesabat həftəsində ABŞ-ın xam neft hasilatı əvvəlki həftəyə nisbətdə gündəlik orta hesabla 84 min barrel artaraq 10,7 milyon barrel olub. Bu, ölkə tarixində neft hasilatının ən yüksək göstəricisidir. ABŞ-ın gündəlik neft hasilatı son 17 həftənin 16-da artım göstərib. Ölkədə neft istehsalı sonuncu dəfə 1970-ci ilin noyabrında maksimum - gündəlik orta hesabla 10,04 milyon barrel təşkil edib.
Ötən həftə ABŞ-ın neft idxalı əvvəlki həftəyə görə gündəlik 1,23 milyon barrel azalaraq 7,32 milyon barrelə düşüb. Ölkənin xam neft ixracı da əvvəlki həftə ilə müqayisədə gündəlik 271 min barrel aşağı düşərək 1,88 milyon barrel təşkil edib.
Beynəlxalq Enerji Agentliyinin proqnozuna görə, tezliklə ABŞ dünyanın ən böyük xam neft istehsalçı ola bilər.
EIA-nın may ayı üzrə proqnozuna görə isə, ABŞ-ın xam neft istehsalı bu il sutkalıq orta hesabla 10,7 milyon barrel, gələn il isə 11,9 milyon barrel olacaq. Bununla da ABŞ-ın dünyanın ən böyük neft hasilatçısı olan Rusiyanı geridə qoyacağı gözlənilir.
Bölmənin digər xəbərləri
