ABŞ KONQRESİNİN ÜZVÜ ERMƏNİSTANDAKI SİYASİ PROSESDƏN CİDDİ NARAHATLIĞINI İFADƏ ETMİŞDİR
AZƏRTAC-ın xüsusi müxbiri xəbər verir ki, mayın sonunda ABŞ Konqresinin nümayəndə heyətinin tərkibində Azərbaycana səfər edən pensilvaniyalı konqresmen xanım Allison Şvartz jurnalistlər üçün brifinq keçirmişdir. Xatırladaq ki, Nümayəndələr Palatasının Demokratiyaya Yardım Komitəsinin üzvləri Adam Şiff, Ueyn Gilkrist və Allison Şvartz Pakistan və Əfqanıstana səfərləri çərçivəsində Azərbaycan və Ermənistanda da görüşlər keçirmişdilər. Hazırda Konqresdə Gürcüstan işçi qrupunun həmsədri olan xanım Şvartz səfərdən qayıtdıqdan sonra Azərbaycan işçi qrupuna da qoşulmuşdur.
Xanım Şvartz Bakıdakı görüşlərini şərh edərkən bildirmişdir ki, Prezident İlham Əliyev məsələlərə qərbyönlü yanaşması ilə onları çox təəssüratlandırmışdır. Tərəflər Azərbaycanda qarşıdan gələn prezident seçkilərinin azad və ədalətli keçirilməsi, ölkədə demokratik təsisatların inkişafına dair müzakirələr aparmışlar. Azərbaycan ilə Gürcüstan arasında xoş münasibətlər, eləcə də Dağlıq Qarabağ münaqişəsinin həlli məsələsi diqqət mərkəzində olmuşdur. Allison Şvartz demişdir: “Prezident Əliyevin bəyanatları və sözləri düzgün idi. İndi vəzifə, bu sözləri əməllərlə dəstəkləməkdir.”
Konqres üzvü, həmçinin Ermənistanda seçkiqabağı mərhələdə yaranan vəziyyətə münasibətini bildirmişdir. Yerevanda müxalifət üzvləri ilə də görüşlər keçirən ABŞ qanunvericiləri hakimiyyət tərəfindən həbs edilən siyasi məhbusların ailə üzvləri ilə söhbət aparmışlar. 100-dən çox şəxsin yalnız siyasi səbəblərə görə həbsdə saxlanılmasını, nümayişlərin hökumət tərəfindən dağıdılmasını və müxalifət üzvlərinin ölkədəki siyasi prosesdən kənar qalmasını qeyd edən xanım Şvartz, Ermənistanda hazırda baş verənlərdən çox ciddi narahatlığını ifadə etmişdir.
Bölmənin digər xəbərləri
